കേന്ദ്ര ജല കമ്മിഷന്റെ രേഖാമൂലമുള്ള നിര്ദേശം: ജൂണ് 10-ന് ഇടുക്കിയില് 76% ജലം മതി
കേന്ദ്ര ജല കമ്മിഷന് ഇടുക്കി ഡാമിലെ ജലനിരപ്പ് ജൂണ് 10-നു പൂര്ണ റിസര്വോയര് നിരപ്പിനെക്കാള് 30 അടി താഴ്ത്തി നിര്ത്തണമെന്നു രേഖാമൂലം നിര്ദേശിച്ചു. ഇടമലയാര്, കക്കി, ബാണാസുരസാഗര് എന്നിവിടങ്ങളിലെ ജലനിരപ്പിലും നിയന്ത്രണം ഏര്പ്പെടുത്തി.
വൈദ്യുതി ഉല്പാദനത്തെക്കാള് ഡാം സുരക്ഷയ്ക്കാണു മുന്ഗണന എന്നതിനാലാണ് ഈ നിലപാട് ജല കമ്മിഷന് സ്വീകരിച്ചത്. 20 കോടി ഘന മീറ്ററിലേറെ വെള്ളം സംഭരിക്കാവുന്ന ഡാമുകള്ക്കാണു കമ്മിഷന് നിയന്ത്രണം ഏര്പ്പെടുത്തുന്നത്.
ജൂണ്, ജൂലൈ മാസങ്ങളില് കനത്ത മഴ പെയ്താല് വെള്ളം തുറന്നുവിടുകയോ വൈദ്യുതി ഉല്പാദനം വര്ധിപ്പിച്ചു ജലനിരപ്പു താഴ്ത്തുകയോ ചെയ്യേണ്ടി വരും. എന്നാല് തുടര്ന്നുള്ള മാസങ്ങളില് മഴ ദുര്ബലമായാല് ഡാമുകളില് വെള്ളമില്ലാത്ത അവസ്ഥ വരികയും വൈദ്യുതിക്ഷാമം ഉണ്ടാകുകയും ചെയ്യും.
20 കോടി ഘന മീറ്ററിലേറെ വെള്ളം സംഭരിക്കാവുന്ന ഡാമുകളേക്കാള് ചെറിയ ഡാമുകളാണെങ്കിലും ഷോളയാര്, പെരിങ്ങല്ക്കുത്ത്, മാട്ടുപ്പെട്ടി, പൊന്മുടി, കക്കയം, പമ്പ എന്നിവയ്ക്കു കെഎസ്ഇബി അടിയന്തര കര്മപദ്ധതി തയാറാക്കി. വെള്ളപ്പൊക്കം ഉണ്ടായാല് ഇതനുസരിച്ചാകും നടപടി.
2400 അടി വരെ ജലനിരപ്പ് ഉയരുമ്പോഴാണു ഡാം തുറക്കുന്നതിനെക്കുറിച്ചു മുന്പ് കെഎസ്ഇബി ആലോചിച്ചിരുന്നത്. ഇടുക്കിയില് ജൂണ് 10ന് 2373 അടി വെള്ളമാണു നിശ്ചയിച്ചിരിക്കുന്നത്.
https://www.facebook.com/Malayalivartha