സ്പീക്കര്‍ പി.ശ്രീരാമകൃഷ്ണന്റെ നേതൃത്വത്തില്‍ ഇന്നലെ ചേര്‍ന്ന ഉദ്യോഗസ്ഥ യോഗത്തില്‍ ഭാരതപ്പുഴയില്‍ ഒഴുക്കിനു തടസ്സമായി നില്‍ക്കുന്ന പുല്‍ക്കാടുകള്‍ നീക്കം ചെയ്യാനും ചെറിയ മണല്‍ത്തിട്ടകള്‍ പുഴയില്‍ തന്നെ തട്ടി നിരത്താനും തീരുമാനമായി. ചെളിയും മണലും കരയിലേക്ക് മാറ്റി പുഴയ്ക്ക് ആഴം കൂട്ടല്‍ ഇത്തവണ നടക്കില്ല.

പുഴയില്‍ ജലനിരപ്പുയരുന്നതു വരെയുള്ള ഏതാനും ദിവസങ്ങളില്‍ മണ്ണുമാന്തി യന്ത്രം പുഴയിലിറക്കി ഒഴുക്ക് തടസ്സപ്പെട്ടു കിടക്കുന്ന ഭാഗത്തെ മണല്‍ത്തിട്ട തട്ടിനിരത്താനാണ് തീരുമാനം. പുഴയിലെ മണല്‍ത്തിട്ടകളും കുന്നുകൂടി കിടക്കുന്ന വലിയ ചങ്ങണക്കാടുകളും നീക്കം ചെയ്യുന്നതിന് വിശദമായ പഠനം വേണ്ടി വരുമെന്ന് ഉദ്യോഗസ്ഥര്‍ വ്യക്തമാക്കിയതോടെയാണ് പ്രതീക്ഷകളെല്ലാം അസ്തമിച്ചത്.

മണ്ണുമാന്തി യന്ത്രം പുഴയിലിറക്കി ഒഴുക്ക് തടസ്സപ്പെട്ടു കിടക്കുന്ന ഭാഗത്തെ മണല്‍ത്തിട്ട തട്ടിനിരത്തുന്നത് എത്രത്തോളം ഗുണകരമാകുമെന്ന കാര്യത്തിലും ഉറപ്പില്ല. എല്ലാം പുഴയില്‍ തന്നെ ഇളക്കിയിടുക മാത്രമേ ചെയ്യൂ. ഇതോടെ ഭാരതപ്പുഴയോരത്ത് ഇത്തവണയും കാര്യമായ മുന്‍കരുതലുകളുണ്ടാകില്ലെന്ന് ഉറപ്പായി കഴിഞ്ഞു.

പൊന്നാനി കര്‍മ റോഡിനടിയിലുള്ള പൈപ്പുകളിലൂടെ പുഴവെള്ളം ഇരച്ചു കയറുന്നത് തടയാന്‍ പൈപ്പുകള്‍ക്ക് ഷട്ടറിടുന്ന കാര്യത്തിലും അന്തിമ തീരുമാനമായിട്ടില്ല. ഷട്ടറിട്ട് പുഴയില്‍ വെള്ളം കെട്ടിനിര്‍ത്തിയാല്‍ റോഡിന് ഭീഷണിയാകുമെന്ന് മരാമത്ത് വകുപ്പ് മുന്നറിയിപ്പു നല്‍കിയിട്ടുണ്ട്. മാത്രവുമല്ല, പൈപ്പുകള്‍ അടച്ചതുകൊണ്ട് മാത്രം വെള്ളം ഇരച്ചു കയറുന്നത് ഒഴിവാക്കാന്‍ കഴിയില്ലെന്നും പൈപ്പുകള്‍ക്ക് മുകളില്‍ പാറക്കഷ്ണങ്ങളിട്ട് റോഡ് ഉയര്‍ത്തിയതിനാല്‍ പാറക്കഷണങ്ങള്‍ക്കിടയിലൂടെയും വെള്ളം കരയിലേക്കു കയറുമെന്നും വകുപ്പ് ചൂണ്ടിക്കാട്ടിയിരുന്നു.

കഴിഞ്ഞദിവസം പദ്ധതി പ്രദേശം സന്ദര്‍ശിച്ചപ്പോള്‍ തന്നെ ഉദ്യോഗസ്ഥര്‍ നിസ്സഹായാവസ്ഥ ചൂണ്ടിക്കാട്ടിയിരുന്നതാണ്. വരാനിരിക്കുന്ന കാലവര്‍ഷത്തിലും പുഴയില്‍ കാര്യമായ തോതില്‍ ജലനിരപ്പുയര്‍ന്നാല്‍ പ്രദേശത്ത് പ്രളയസമാനമായ സാഹചര്യങ്ങളുണ്ടാകും. യോഗത്തില്‍ സ്പീക്കര്‍ക്കു പുറമെ മന്ത്രിമാരായ കെ.കൃഷ്ണന്‍ കുട്ടി, കെ.ടി.ജലീല്‍ എന്നിവരും പങ്കെടുത്തു.