കോർപ്പറേഷൻ യോഗത്തിനിടെ നടന്ന സംഘർഷത്തിൽ മുൻ മേയർ പ്രശാന്തിന് പരിക്ക് പറ്റിയ സംഭവത്തിൽ 20 ബി.ജെ.പി കൗൺസിലർമാരുൾപ്പെടെ 21 പേർക്കെതിരെ കന്റോൺമെന്റ് പോലീസ് വധശ്രമത്തിന് കുറ്റപത്രം സമർപ്പിച്ച കേസിൽ കുറ്റപത്രത്തിൻമേൽ വാദം ബോധിപ്പിക്കാൻ തിരുവനന്തപുരം ഒന്നാം അഡീഷണൽ അസി. സെഷൻസ് കോടതി ഉത്തരവിട്ടു.

ക്രിമിനൽ നടപടി ക്രമത്തിലെ വകുപ്പ് 226 പ്രകാരം കുറ്റപത്രത്തിൻ്റെ സാധുത വിവരിക്കാനും പ്രതികൾക്കെതിരെയുള്ള കുറ്റകൃത്യം തെളിയിക്കാൻ എന്ത് തെളിവുകളാണ് ഹാജരാക്കിയിട്ടുള്ളതെന്നും ബോധിപ്പിക്കാൻ പ്രോസിക്യൂട്ടറോടാണ് കോടതി നിർദേശിച്ചത്.

രാഷ്ട്രീയ പ്രേരിതമായ കേസെന്നും വധശ്രമക്കുറ്റം പ്രഥമദൃഷ്ട്യാ വെളിവാകുന്നില്ലെന്നും ആയത് തെളിയിക്കുന്ന മെഡിക്കൽ റെക്കോർഡുകളുടെ അഭാവത്താലും 20 കൗൺസിലർമാർക്കും ജില്ലാ സെഷൻസ് കോടതി 2017 ഡിസംബർ ആറിന് മുൻകൂർ ജാമ്യം നൽകിയിരുന്നു.

അതേ സമയം ബി ജെ പി കൗൺസിലർമാരെ മേയറടക്കം 8 സി പി എം കൗൺസിലർമാർ ആക്രമിച്ചതിന് 8 പേരെയും പ്രതി ചേർത്ത് എടുത്ത ആക്രമണക്കേസ് കന്റോൺമെന്റ് പോലീസ് മുക്കി. പട്ടിക ജാതി / പട്ടിക വർഗ്ഗ അതിക്രമം തടയൽ നിയമപ്രകാരം മേയറടക്കമുള്ള സി പി എം കൗൺസിലർമാർക്കെതിരെ എടുത്ത കേസ് അന്വേഷണ ഉദ്യോഗസ്ഥനായ കന്റോൺമെന്റ് അസി. കമ്മീഷണർ എഴുതി തള്ളി റഫർ റിപ്പോർട്ട് ജില്ലാ കോടതിയിൽ സമർപ്പിച്ചു. റഫർ റിപ്പോർട്ട് തള്ളി 8 പ്രതികൾക്കെതിരെ കോടതി നേരിട്ട് കേസെടുത്ത് 8 പേരെയും വിചാരണ ചെയ്യണമെന്നാവശ്യപ്പെട്ട് ബി ജെ പി കൗൺസിലർമാർ പ്രൊട്ടസ്റ്റ് കംപ്ലയിന്റ് ( സ്വകാര്യ അന്യായം) ജില്ലാ കോടതിയിൽ സമർപ്പിച്ചു.

2017 നവംബർ 18 ശനിയാഴ്ച നടന്ന കോർപ്പറേഷൻ കൗൺസിൽ യോഗമാണ് സംഘർഷത്തിൽ കലാശിച്ചത്. പിടിവലിയായി നടന്ന സംഘർഷത്തിനിടെ കൗൺസിൽ ഹാളിൽ നിന്ന് ഔദ്യോഗിക മുറിയിലേക്ക് കടക്കുന്നതിനിടെ ഗോവണിയിൽ മേയർ പ്രശാന്ത് വീഴുകയായിരുന്നു. തിക്കിലും തിരക്കിലും പെട്ട് മേയറുടെ കാലിനും കഴുത്തിനും തലയ്ക്കും നിസ്സാര പരിക്കേറ്റു. ഉടൻ മെഡിക്കൽ കോളേജിലെ തീവ്ര പരിചരണ യൂണിറ്റിലേക്ക് മാറ്റി വിദഗ്ദ ചികിത്സയും നൽകിയിരുന്നു.