അതിരപ്പിള്ളി പദ്ധതിയുമായി മുന്നോട്ടുപോകാന്‍ കെഎസ്ഇബിക്കു സംസ്ഥാന സര്‍ക്കാര്‍ അനുമതി നല്‍കി, എതിര്‍പ്പുമായി സിപിഐയും പ്രതിപക്ഷവും
അതിരപ്പിള്ളി ജലവൈദ്യുത പദ്ധതിയുമായി മുന്നോട്ടുപോകാന്‍, സഖ്യകക്ഷിയായ സിപിഐയുടെ എതിര്‍പ്പു നില്‍ക്കെ കെഎസ്ഇബിക്കു സംസ്ഥാന സര്‍ക്കാര്‍ അനുമതി നല്‍കി. എന്‍ഒസി (നോണ്‍ ഒബ്ജക്ഷന്‍ സര്‍ട്ടിഫിക്കറ്റ്) നല്‍കിയതില്‍ കൃത്യമായ മറുപടി നല്‍കാതെ മന്ത്രി എം.എം.മണി ഒഴിഞ്ഞുമാറി. സര്‍ക്കാര്‍ തീരുമാനത്തിനെതിരെ എഐവൈഎഫ് രംഗത്തെത്തി.
പദ്ധതിയുടെ സാങ്കേതിക, സാമ്പത്തിക, പാരിസ്ഥിതിക അനുമതികള്‍ക്കായി സര്‍ക്കാര്‍ എന്‍ഒസി അനുവദിക്കുകയായിരുന്നു. ഏഴു വര്‍ഷമാണ് എന്‍ഒസിയുടെ കാലാവധി. അനുമതി ലഭിച്ചു കഴിഞ്ഞ് പദ്ധതി പൂര്‍ത്തിയാക്കാന്‍ ഏഴു വര്‍ഷം വേണ്ടിവരും എന്നതിനാലാണിത്. കേന്ദ്ര വൈദ്യുതി അതോറിറ്റിയാണ് എന്‍ഒസി ആവശ്യപ്പെട്ടത്. പദ്ധതിയെപ്പറ്റി ആലോചന തുടങ്ങി 41 വര്‍ഷങ്ങള്‍ക്കുശേഷം യാഥാര്‍ഥ്യമാക്കാനുള്ള നീക്കത്തിലാണു സര്‍ക്കാര്‍.
നേരത്തെ ലഭിച്ച വനം വകുപ്പിന്റെയും പരിസ്ഥിതി വകുപ്പിന്റെയും അനുമതിയുടെ സമയം 2017-ല്‍ കഴിഞ്ഞിരുന്നു. പദ്ധതിയില്‍ നിന്നും പിന്മാറുന്നതായി 2018-ല്‍ വൈദ്യുതി മന്ത്രി എം.എം.മണി നിയമസഭയില്‍ പ്രഖ്യാപിക്കുകയും ചെയ്തു. അതിരപ്പിള്ളി വെള്ളച്ചാട്ടത്തിന് അഞ്ചു കിലോമീറ്റര്‍ മുകളിലുള്ള നിര്‍ദിഷ്ട അണക്കെട്ടിലൂടെ 163 മെഗാവാട്ട് വൈദ്യുതി ഉത്പാദനമാണു ലക്ഷ്യമിടുന്നത്. മന്ത്രിസഭയിലും ജനങ്ങള്‍ക്കിടയിലും പദ്ധതിയോട് ഇപ്പോഴും എതിര്‍പ്പുണ്ടെന്ന് പറഞ്ഞ വൈദ്യുതിമന്ത്രി, ഭാവി നിലപാടില്‍ വ്യക്തത നല്‍കിയില്ല.
സംസ്ഥാന സര്‍ക്കാര്‍ പ്രകൃതി ദുരന്തം അടിച്ചേല്‍പിക്കുകയാണെന്ന് സര്‍ക്കാര്‍ തീരുമാനത്തെ വിമര്‍ശിച്ച് മുന്‍ കേന്ദ്ര പരിസ്ഥിതി മന്ത്രിയും കോണ്‍ഗ്രസ് നേതാവുമായ ജയറാം രമേഷും രംഗത്തെത്തി. അതിരപ്പിള്ളിയില്‍ ഡാം നിര്‍മിക്കാനുള്ള തീരുമാനം ഉപേക്ഷിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. യുഡിഎഫ് ശക്തമായി നേരിടും. പദ്ധതിയുമായി മുന്നോട്ടു പോകാനുള്ള തീരുമാനം ജനവഞ്ചനയാണ്. പദ്ധതി നടപ്പാക്കാന്‍ അനുവദിക്കില്ലെന്നും ചെന്നിത്തല വ്യക്തമാക്കി.
മണ്ണിനെയും മനുഷ്യനെയും മറക്കാത്ത വികസനമെന്നാണു മുഖ്യമന്ത്രി പ്രഖ്യാപിച്ചിട്ടുള്ളത്. എല്‍ഡിഎഫില്‍ ചര്‍ച്ച ചെയ്തിട്ടു വേണം ഇത്തരം നീക്കങ്ങളിലേക്ക് കടക്കാനെന്നും ചര്‍ച്ച ചെയ്ത് ഉപേക്ഷിച്ച പദ്ധതിയാണിതെന്നും മുന്നണിയില്‍ ചര്‍ച്ച ചെയ്യാതെ അതിരപ്പിള്ളിയുമായി മുന്നോട്ടുപോകാനാവില്ലെന്നും സിപിഐ നേതാവ് ബിനോയ് വിശ്വം പറഞ്ഞു. പുതിയ നീക്കത്തില്‍ ദുരൂഹതയുണ്ടെന്നും അദ്ദേഹം ആരോപിച്ചു. സിപിഐയുടെ യുവജന വിഭാഗമായ എവൈഐഎഫും പ്രതിഷേധവുമായി രംഗത്തെത്തി.
https://www.facebook.com/Malayalivartha
