ചാവശ്ശേരിയിൽ ബസ്സുകൾ തമ്മിൽ കൂട്ടിയിടിച്ച് നിരവധി പേർക്ക് പരിക്ക്. മട്ടന്നൂർ ചാവശ്ശേരിയിൽ ബസ്സുകൾ തമ്മിൽ കൂട്ടിയിടിച്ച് 20ഓളം യാത്രക്കാർക്ക് പരിക്കേറ്റു.

ഇന്നലെ രാത്രി ഏഴോടെ ചാവശ്ശേരി ടൗണിലായിരുന്നു അപകടം. തലശ്ശേരിയിൽ നിന്നും ഇരിട്ടിയിലേക്ക് പോകുന്ന ഹോളിമാത ബസ്സിന്റെ പിറകിൽ ഇതേ റൂട്ടിൽ വന്ന സാഗർ ബസ് ഇടിച്ചു കയറുകയായിരുന്നു. കൂത്തുപറമ്പ് മുതൽ തന്നെ ഇവർ മത്സരിച്ചു ഓടാൻ തുടങ്ങിയതായി ബസ്സിലെ യാത്രക്കാർ പറഞ്ഞു. യാത്രക്കാർ പരാതി പറഞ്ഞിട്ടും അതൊന്നും കേൾക്കാതെ ഇവർ മത്സരിച്ചു ഓടുകയായിരുന്നു.

അപകടത്തിൽ പരിക്കേറ്റ യാത്രക്കാർ മട്ടന്നൂരിലെയും കണ്ണൂരിലെയും സ്വകാര്യ ആശുപത്രികളിൽ ചികിത്സ തേടി. മട്ടന്നൂർ പോലീസ് സ്ഥലത്തെത്തി അപകടത്തിൽപ്പെട്ട ബസ്സുകൾ പോലീസ് സ്റ്റേഷനിലേക്ക് മാറ്റിയിരിക്കുകയാണ്.