നെടുമ്പാശേരിയില്‍ മിനികൂപ്പര്‍ അപകടക്കേസില്‍ പ്രതികളുടെ ജാമ്യാപേക്ഷയില്‍ വിധി നാളെ. ഇന്ന് അങ്കമാലി മജിസ്‌ട്രേറ്റ് കോടതിയില്‍ വാദം പൂര്‍ത്തിയായെങ്കിലും വിധിയുണ്ടായില്ല. നാളെയാകും ഉത്തരവെന്ന് കോടതി വ്യക്തമാക്കി.

അതേസമയം ജാമ്യാപേക്ഷയില്‍ കോടതിയില്‍ ശക്തമായ വാദപ്രതിവാദങ്ങളാണ് നടന്നത്. മൂന്നുപേര്‍ ഒരു സ്‌കൂട്ടറില്‍ സഞ്ചരിച്ചതു കൊണ്ട് അപകടം വിളിച്ചുവരുത്തിയെന്ന് പ്രതിഭാഗം വാദിച്ചു. അതുകൊണ്ടാണോ അവരെ ഇടിച്ചിട്ടതെന്ന് കോടതി ചോദിച്ചു. നിയമലംഘനം എന്നായിരുന്നു പ്രതിഭാഗം ഇതിന് മറുപടി നല്‍കിയത്. അവര്‍ മരിച്ചുപോയില്ലേ,? അവര്‍ക്കെതിരെ എന്ത് നടപടി എന്നായിരുന്നു കോടതിയുടെ മറുപടി. വാഹനാപകടം നടന്ന ശേഷമുള്ള ആദ്യമൊഴി,? തൊട്ടുപുറകെ വാഹനത്തില്‍ വന്ന പ്രിയാദ് എന്നയാളുടേതാണ്. അപകടശേഷമാണ് ഇയാള്‍ എത്തിയത്. ഇയാള്‍ ദൃക്‌സാക്ഷി അല്ല. അതുകൊണ്ട് പ്രാഥമിക മൊഴി നല്‍കാന്‍ ഇയാള്‍ക്ക് എങ്ങനെ കഴിയും. പ്രിയാദ് മൊഴി നല്‍കാന്‍ സംഭവം കണ്ടതായി തെളിവുണ്ടോ,? ഇതില്‍ സംശയമുണ്ട് എന്നും പ്രതിഭാഗത്തിനായി ഹാജരായ അഡ്വ. സെബി കിടങ്ങൂര്‍ ചോദിച്ചു.

പ്രതികളും മരിച്ചവരും സംഭവസ്ഥലത്ത് എങ്ങനെ എത്തിയെന്ന് പൊലീസ് ഇതുവരെ അന്വേഷിച്ചിട്ടില്ല. അപകടം നടന്നതായി ദൃക്‌സാക്ഷി മൊഴി പോലും ഇല്ല. എന്താണ് കേസിന്റെ പിന്നില്‍ എന്ന് ആര്‍ക്കും അറിയില്ലെന്നും പ്രതിഭാഗം അഭിഭാഷകന്‍ പറഞ്ഞു. പ്രതികള്‍ക്കെതിരെ വലിയ ഗൂഢാലോചന നടക്കുന്നുണ്ടെന്നും പ്രിയാദിന്റെ മൊഴിയില്‍ സംശയമുണ്ടെന്നും പ്രതിഭാഗം അഭിഭാഷകന്‍ കൂട്ടിച്ചേര്‍ത്തു.

അപകടത്തിന് ശേഷം പ്രതി ' കേസ് തന്റെ വാപ്പ നോക്കിക്കോളും ' എന്ന് പറഞ്ഞതായി മരിച്ച ഗോപികയുടെ കുടുംബത്തിന്റെ അഭിഭാഷകന്‍ കോടതിയില്‍ വ്യക്തമാക്കി മുന്‍പ് ഏതെങ്കിലും കേസുകള്‍ പ്രതിയുടെ പിതാവ് ഒതുക്കിയിട്ടുണ്ടോ എന്ന് പരിശോധിക്കപ്പെടണം എന്നും അഭിഭാഷകന്‍ ആവശ്യപ്പെട്ടു.