കഠിനംകുളം കൂട്ട ബലാത്സംഗക്കേസിലെ പ്രതികളെ അഞ്ചുദിവസത്തെ പൊലീസ് കസ്റ്റഡിയില്‍ വിട്ടു. സംഭവത്തില്‍ ഗൂഢാലോചന നടന്നിട്ടുണ്ടോ എന്നതടക്കമുള്ള കുറ്റങ്ങള്‍ തെളിയിക്കുന്നതിന് പ്രതിയായ രാജന്റെ വെട്ടുതുറയിലെ ആള്‍ താമസമില്ലാത്ത വീട്ടില്‍ കൊണ്ടുപോയി തെളിവെടുപ്പ് നടത്തി. രാജന്റെ വീട്ടില്‍ വെച്ചാണ് ഏഴ് പ്രതികളും മദ്യപിച്ചശേഷം യുവതിക്ക് മദ്യം നല്‍കിയത്. ഇവിടെ വെച്ചാണ് രക്ഷപ്പെടാന്‍ പോയ യുവതിയെ ബലമായി ഓട്ടോയില്‍ കയറ്റി ആളൊഴിഞ്ഞ കുറ്റിക്കാട്ടിലേക്ക് കൊണ്ടുപോയത്. രാജന്റെ വീട്ടില്‍ വെച്ചാണ് യുവതിയുടെ ഭര്‍ത്താവിന് പ്രതിയായ രാജന്‍ പണം കൈമാറിയത്.

കേസില്‍ ഗൂഢാലോചന നടന്നതും രാജന്റെ വീട്ടിലാണെന്ന് പൊലീസ് പറഞ്ഞു. മുഴുവന്‍ പ്രതികളെയും കസ്റ്റഡിയില്‍ വാങ്ങിയെങ്കിലും യുവതിയുടെ ഭര്‍ത്താവിനെയും മറ്റൊരു പ്രതിയായ അര്‍ഷാദിനെയും ഒഴികെ ബാക്കി അഞ്ച് പ്രതികളെയാണ് ഞായറാഴ്ച രാജന്റെ വീട്ടില്‍ കൊണ്ട് പോയി തെളിവെടുപ്പ് നടത്തിയത്. ആറ്റിങ്ങല്‍ ഡിവൈ.എസ്.പി എസ്.വൈ. സുരേഷിന്റെ നേതൃത്വത്തിലായിരുന്നു തെളിവെടുപ്പ്. മുഴുവന്‍ പ്രതികളെയും തിങ്കളാഴ്ച യുവതിയെ പീഡനത്തിനായി കൊണ്ടുപോയ ചാന്നാങ്കരയിലെ കുറ്റിക്കാട്ടില്‍ കൊണ്ടുപോകുമെന്ന് അന്വേഷണസംഘം പറഞ്ഞു.

പ്രതികളെ കസ്റ്റഡിയില്‍ വാങ്ങിയ ആദ്യദിവസം റൂറല്‍ എസ്.പി അശോകന്റെ നേതൃത്വത്തിലുള്ള പൊലീസ് സംഘം ചോദ്യംചെയ്തു. വരുംദിവസങ്ങളിലും പ്രതികളെ കൂടുതല്‍ ചോദ്യംചെയ്യുമെന്ന് ആറ്റിങ്ങല്‍ ഡിവൈ.എസ്.പി എസ്.വൈ. സുരേഷ് അറിയിച്ചു. കഴിഞ്ഞ നാലിനാണ് കണിയാപുരം സ്വദേശിനിയായ യുവതിയെ ഭര്‍ത്താവും സുഹൃത്തുക്കളും ചേര്‍ന്ന് മദ്യം നല്‍കിയതിന് ശേഷം കുട്ടിയുടെ മുന്നില്‍ വെച്ച് ക്രൂരമായി പീഡിപ്പിച്ചത്.

സംഭവത്തില്‍ യുവതിയുടെ ഭര്‍ത്താവ് ഉള്‍പ്പെടെ ഏഴ് പ്രതികളെ കഠിനംകുളം പൊലീസ് അറസ്റ്റ് ചെയ്തിരുന്നു. പ്രതികളെ കോവിഡ് പരിശോധനക്ക് ശേഷമാണ് കസ്റ്റഡിയില്‍ വാങ്ങിയത്.