കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദിപ്കെയെ ഡൽഹി കോടതി ഉപാധികളോടെ വിട്ടയക്കാൻ ഉത്തരവിട്ടു. എസ്ഐആറുമായി (SIR) ബന്ധപ്പെട്ട ക്രമക്കേടുകൾക്കെതിരെ ഡൽഹിയിലെ കൊണാട്ട് പ്ലേസിൽ സിജെപിയുടെ നേതൃത്വത്തിൽ നടത്താനിരുന്ന 'തിരംഗ മാർച്ചിന്' തൊട്ടുമുമ്പാണ് കഴിഞ്ഞദിവസം ദിപ്കെയെ പോലീസ് കരുതൽ തടങ്കലിൽ എടുത്തത്. ദേശീയപതാകയുമേന്തി മാർച്ച് നടത്താൻ പുറപ്പെടുന്നതിനിടെയായിരുന്നു ഈ പോലീസ് നടപടി. ദിപ്കെയെ കസ്റ്റഡിയിലെടുത്ത ശേഷം എങ്ങോട്ടേക്കാണ് മാറ്റിയതെന്ന് വ്യക്തമാക്കാത്തതിനെ തുടർന്ന് പോലീസിനെതിരെ സിജെപി നേതൃത്വം വലിയ രീതിയിൽ ആരോപണങ്ങൾ ഉന്നയിച്ചിരുന്നു. തുടർന്ന് കെസിഎം സ്പെഷ്യൽ എക്സിക്യൂട്ടീവ് മജിസ്ട്രേറ്റ് കോടതിയാണ് അഭിജീത് ദിപ്കെയ്ക്ക് ജാമ്യം അനുവദിച്ചത്. അടുത്ത ഒരു വർഷത്തേക്ക് സമാധാനാന്തരീക്ഷം തകർക്കരുത്, യാതൊരുവിധ അക്രമസംഭവങ്ങളിലും ഏർപ്പെടരുത്, അനധികൃതമായി ആളുകളെ സംഘടിപ്പിക്കരുത് തുടങ്ങിയ കർശന വ്യവസ്ഥകളോടെയാണ് കോടതി ജാമ്യം നൽകിയിരിക്കുന്നത്