ജന്മദിനം ആഘോഷിക്കാനും പുതിയ ബൈക്ക് വാങ്ങാനും പണം കണ്ടെത്തുന്നതിന് 17കാരനായ സുഹൃത്തിനെ രണ്ട് പേര്‍ ചേര്‍ന്ന് കൊലപ്പെടുത്തി. മഹാരാഷ്ട്രയിലെ താണെ ആസാദ് നഗര്‍ സ്വദേശിയായ പ്രജ്യോത് കാംബ്ലെയാണ് കൊല്ലപ്പട്ടത്. പ്രജ്യോതിന്റെ സുഹൃത്തുക്കളാണ് പ്രതികള്‍. പ്രജ്യോത് ധരിച്ചിരുന്ന സ്വര്‍ണമാല കവരാനായിരുന്നു സുഹൃത്തുക്കളുടെ ക്രൂരതയെന്നാണ് പൊലീസ് വ്യക്തമാക്കുന്നത്. ഇരുവരും കുറ്റം സമ്മതിച്ചതായും അന്വേഷണം പുരോഗമിക്കുന്നതായും പൊലീസ് വ്യക്തമാക്കി.

പ്രതികള്‍ കൊലപാതകത്തിനു ശേഷം മൃതദേഹം കത്തിക്കുകയും പൊലീസിനെ തെറ്റിദ്ധരിപ്പിക്കാനായി മൊബൈല്‍ ഫോണ്‍ ഓടിക്കൊണ്ടിരുന്ന ബസിലേക്ക് എറിയുകയും ചെയ്തു. സെപ്തംബര്‍ 24ന് രാത്രി ഏഴുമണിയോടെയാണ് പ്രജ്യോതിനെ കാണാതായത്. തൊട്ടടുത്ത ദിവസം പിതാവ് പൊലീസ് സ്‌റ്റേഷനില്‍ പരാതി നല്‍കി. പ്രജ്യോതിന്റെ സുഹൃത്തുക്കളിലൊരാളെ പൊലീസ് ചോദ്യം ചെയ്തപ്പോള്‍ അജ്ഞാതനായ ഒരാള്‍ക്കൊപ്പം ബൈക്കില്‍ ഘോഡ്ബന്ദര്‍ ഭാഗത്തേക്ക് പോയെന്നായിരുന്നു മൊഴി.

എന്നാല്‍, ഈ റൂട്ടിലെ സിസിടിവി ദൃശ്യങ്ങള്‍ പരിശോധിച്ചപ്പോള്‍ മൊഴി വ്യാജമാണെന്ന് പൊലീസിന് വ്യക്തമാകുകയായിരുന്നു. തുടര്‍ന്ന് ശാസ്ത്രീയ തെളിവുകളുടെയും മൊബൈല്‍ ലൊക്കേഷന്‍ വിവരങ്ങളുടെയും അടിസ്ഥാനത്തില്‍ വീണ്ടും സുഹൃത്തിനെ ചോദ്യം ചെയ്തതോടെയാണ് കൊലപാതകത്തിന്റെ ചുരുളഴിഞ്ഞത്.

പ്രജ്യോത് കഴുത്തില്‍ സ്വര്‍ണമാല ധരിക്കാറുണ്ടായിരുന്നു. പ്രതികളായ രണ്ട് ആണ്‍കുട്ടികളില്‍ ഒരാള്‍ക്ക് ജന്മദിനം ആഘോഷിക്കാനും മറ്റേയാള്‍ക്ക് പുതിയ ബൈക്ക് വാങ്ങുന്നതിനുമായി പ്രജ്യോതിന്റെ മാല കവരാന്‍ പദ്ധതിയിടുകയായിരുന്നു. സെപ്തംബര്‍ 24ന് പുകവലിക്കാനെന്ന വ്യാജേന താണെയിലെ ബ്രഹ്മാണ്ഡ് ഫേസ് 2 പ്രദേശത്തിനടുത്തുള്ള വിജനമായ കാട്ടുപ്രദേശത്തേക്ക് പ്രജ്യോതിനെ ഇരുവരും കൂട്ടിക്കൊണ്ടുപോയി. അവിടെവച്ച് കത്തികൊണ്ട് കുത്തുകയും വലിയ കല്ലുകൊണ്ട് തലയ്ക്കടിക്കുകയും ചെയ്ത് കൊലപ്പെടുത്തിയെന്നാണ് പൊലീസ് അന്വേഷണത്തില്‍ കണ്ടെത്തിയത്.

തെളിവുകള്‍ നശിപ്പിക്കാന്‍ അടുത്ത ദിവസം മൃതദേഹത്തില്‍ പെട്രോളൊഴിച്ച് തീ കൊളുത്തി. പൊലീസ് അന്വേഷണം വഴിതെറ്റിക്കാനായി പ്രജ്യോതിന്റെ മൊബൈല്‍ ഫോണ്‍ ഒരു ബസിലേക്ക് എറിയുകയും ചെയ്തു. ഫോണിന്റെ ലൊക്കേഷന്‍ മാറിക്കൊണ്ടിരിക്കുന്നതിലൂടെ അന്വേഷണത്തെ തെറ്റായ ദിശയിലേക്ക് നയിക്കാമെന്നായിരുന്നു പ്രതികളുടെ പദ്ധതി. എന്നാല്‍ സിസിടിവി പരിശോധിച്ച പൊലീസ് ഇരുവരെയും കസ്റ്റഡിയില്‍ എടുക്കുകയായിരുന്നു.