പുഴകളില്‍ നിന്നുള്ള അനധികൃത മീന്‍പിടിത്തത്തിനെതിരെ നടപടിയുമായി ഫിഷറീസ് വകുപ്പ്
മഴക്കാലം തുടങ്ങിയതോടെ ജലസ്രോതസ്സുകളിലെ മീന്‍ പിടിത്തം സജീവമാണ്. മീനുകളുടെ പ്രജനന സമയമായ ജൂണ്‍, ജൂലൈ മാസങ്ങളില്‍ ചെറിയ കണ്ണിവല ഉപയോഗിച്ചും പുഴയ്ക്കു കുറുകെ വല കെട്ടിയും മീന്‍ പിടിക്കുന്നതും വ്യാപകമായി. പുഴകളിലെ ഇപ്രകാരമുള്ള അനധികൃത മത്സ്യബന്ധനത്തിന് എതിരെ ഫിഷറീസ് വകുപ്പ് നടപടി തുടങ്ങി.
വല സ്ഥാപിക്കുകയും കൂട് സ്ഥാപിക്കുകയും ചെയ്യുമ്പോള്‍ പുഴയുടെ സ്വാഭാവിക ഒഴുക്ക് തടസ്സപ്പെടും. ഇത് നാടന്‍ മത്സ്യങ്ങളുടെ പ്രജനനത്തെ സാരമായി ബാധിക്കുകയും അവയുടെ നാശത്തിന് ഇടയാക്കുകയും ചെയ്യും.
ഇത്തരത്തില്‍ അനധികൃതമായി സ്ഥാപിച്ച വലകള്‍ നശിപ്പിക്കുമെന്നും വരും ദിവസങ്ങളില്‍ വയനാട് ജില്ലയില്‍ പരിശോധന വ്യാപകമാക്കുമെന്നും അധികൃതര്‍ പറഞ്ഞു.
അതേസമയം, മഴക്കാലം ആരംഭിക്കുമ്പോള്‍ മത്സ്യബന്ധനം ഉപജീവന മാര്‍ഗമായി സ്വീകരിക്കുന്നവര്‍ ഒട്ടേറെയുണ്ട്. പുഴകളിലും മറ്റു ജല സ്രോതസ്സുകളിലുമുള്‍പ്പെടെ മീന്‍ പിടിക്കുന്നതിനു പാലിക്കേണ്ട നിയമങ്ങളെ കുറിച്ച് പലര്‍ക്കും അറിവില്ലെന്നും അധികൃതര്‍ പറഞ്ഞു.
https://www.facebook.com/Malayalivartha
