വിദ്യാര്‍ഥിനി ആത്മഹത്യ ചെയ്ത സംഭവത്തില്‍ കൈയക്ഷര പരിശോധന നടത്താനൊരുങ്ങി അന്വേഷണ സംഘം. ഇതിനായി ഉടന്‍ കോടതിയില്‍ അപേക്ഷ നല്‍കും. കോളജ് അധികൃതര്‍ക്ക് വീഴ്ച സംഭവിച്ചെന്ന മൊഴിയുലറച്ച് നില്‍ക്കുകയാണ് മരിച്ച പൊടിമറ്റം സ്വദേശിനിയായ അഞ്ജു ഷാജിയുടെ കുടുംബാംഗങ്ങള്‍. കഴിഞ്ഞ ദിവസമാണ് അന്വേഷണസംഘം ബന്ധുക്കളുടെ മൊഴിയെടുത്തത്. അഞ്ജുവിന്റെ പിതാവ് ഷാജി, സഹോദരീ ഭര്‍ത്താവ് പ്രവീണ്‍, അനിയന്‍ എന്നിവരില്‍ നിന്നാണ് കാഞ്ഞിരപ്പള്ളി ഡിവൈ.എസ്.പി ജെ. സന്തോഷ് കുമാറിന്റെ നേതൃത്വത്തിലെ സംഘം മൊഴിയെടുത്തത്. കോളജ് അധികൃതരുടെ മാനസിക പീഡനമാണ് മരണത്തിന് കാരണമെന്ന് ബന്ധുക്കള്‍ മൊഴി നല്‍കിയതായാണ് വിവരം.
പാരലല്‍ കോളജ് ആയതിനാലാണ് കാഞ്ഞിരപ്പള്ളി സെന്റ് ആന്റണീസ് കോളജിലെ ബിരുദ വിദ്യാര്‍ഥിയായ അഞ്ജു പരീക്ഷ എഴുതാനായി പാലാ ചേര്‍പ്പുങ്കല്‍ ഹോളിക്രോസ് കോളജിലെത്തിയത്. വിദ്യാര്‍ഥിനി കോപ്പിയടിച്ചുവെന്ന് തെളിയിക്കാനായി കോളജ് അധികൃതര്‍ സി.സി.ടി.വി ദൃശ്യങ്ങള്‍ പുറത്തുവിട്ടിരുന്നു.

വിദ്യാര്‍ഥിനി കോപ്പിയടിച്ചെന്ന ആരോപണം തെളിയിക്കാന്‍ കോളജ് അധികൃതരും കുട്ടിയുടെ നിരപരാധിത്വം തെളിയിക്കാന്‍ കുടുംബവും ശ്രമിക്കുകയാണ്. പഠനകാര്യങ്ങളില്‍ മിടുക്കിയായിരുന്നു അഞ്ജുവെന്നാണ് സഹപാഠികളും ബന്ധുക്കളും പറയുന്നത്. ആദ്യ രണ്ടു സെമസ്റ്ററില്‍ മികച്ച മാര്‍ക്കോടെയാണവള്‍ വിജയിച്ചതെന്ന് അധ്യാപകരും സാക്ഷ്യപ്പെടുത്തി. കോപ്പിയടി പിടിക്കപ്പെട്ടാല്‍ അധികൃതര്‍ പാലിക്കേണ്ട തുടര്‍ നടപടികളൊന്നും കോളജിന്റെ ഭാഗത്തു നിന്നുണ്ടായില്ലെന്ന് വ്യക്തമായിട്ടുണ്ട്.