അച്ഛന്‍ കയറ്റാതിരുന്ന പുതിയ വീട്ടില്‍ അല്പനേരം അമ്മയെ കിടത്തണം, അമ്മയ്ക്കുവേണ്ടി ദിവസങ്ങള്‍ക്ക് മുമ്പ് മൂത്ത മകള്‍ വാങ്ങിവെച്ച പുതിയ സാരി മൃതദേഹത്തില്‍ പുതപ്പിക്കണം..സ്‌റ്റേഷനില്‍ നിന്ന താക്കോലെത്തിച്ച് മൃതദേഹം കിടത്തി, ഇനി ആരും തടയാനില്ല, ഇഷ്ടം പോലെ ഈ വീട്ടില്‍ നടക്കാമെന്നുള്ള മക്കളുടെ നിലവിളി കണ്ടു നിന്നവരെ കണ്ണീരിലാഴ്ത്തി. ഭര്‍ത്താവിന്റെ അടിയേറ്റു മരിച്ച റിട്ട. എസ്.ഐ. ലീലയുടെ ശവസംസ്‌കാരം ഇന്നലെ നടന്നു. സംഭവത്തിനു പിന്നാലെ തൂങ്ങിമരിച്ച ഭര്‍ത്താവ് പൊന്നന്റെ (റിട്ട. എ.എസ്.ഐ.) ശവസംസ്‌കാരം വെള്ളിയാഴ്ച നടന്നിരുന്നു.

മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെ വെള്ളിയാഴ്ച രാവിലെയാണ് ലീല മരിച്ചത്. കോവിഡ് പരിശോധന ഉള്‍പ്പെടെ നടത്തി. ഇതിന്റെ പരിശോധനാഫലം നെഗറ്റീവ് ആയതോടെയാണ് ശനിയാഴ്ച വൈകീട്ട് നടപടികള്‍ പൂര്‍ത്തിയാക്കിയത്. ഞായറാഴ്ച പോസ്റ്റുമോര്‍ട്ടം കഴിഞ്ഞ് ഉച്ചയ്ക്ക് പന്ത്രണ്ടേകാലോടെ മൃതദേഹം വീട്ടില്‍ എത്തിച്ചു. അച്ഛന്‍ കയറ്റാതിരുന്ന പുതിയ വീട്ടില്‍ അല്പനേരം അമ്മയെ കിടത്തണമെന്നും അമ്മയ്ക്കുവേണ്ടി ദിവസങ്ങള്‍ക്ക് മുമ്പ് മൂത്ത മകള്‍ വാങ്ങിവെച്ച പുതിയ സാരി മൃതദേഹത്തില്‍ പുതപ്പിക്കണമെന്നും മക്കള്‍ ആഗ്രഹം പ്രകടിപ്പിച്ചതിനെ തുടര്‍ന്ന് പോലീസ് സ്റ്റേഷനില്‍നിന്നു താക്കോല്‍ എത്തിച്ച് വീട് തുറന്നു.

പുതിയ വീട്ടിലെ ഹാളില്‍ രണ്ട് മിനിറ്റു നേരം ലീലയുടെ മൃതദേഹം കിടത്തി. തടയാന്‍ ആരും ഇല്ലെന്നും അമ്മയ്ക്ക് എണീറ്റ് ഇഷ്ടം പോലെ ഈ വീട്ടില്‍ നടക്കാമെന്നും മക്കളായ പൊന്നമ്പിളിയും പൊന്നഞ്ജലിയും നിലവിളിച്ചു. ഈ കാഴ്ച കണ്ടു നിന്നവരെ ഏറെ സങ്കടത്തിലാക്കി. പിന്നീട് മുറ്റത്ത് പൊതുദര്‍ശനത്തിനു വെച്ചു.മക്കളുടെ ആഗ്രഹപ്രകാരം അമ്മയ്ക്കുവേണ്ടി വാങ്ങിവെച്ചിരുന്ന പുതിയ സാരിയും മൃതദേഹത്തില്‍ പുതപ്പിച്ചു. ഉച്ചയ്ക്ക് 1.30-ന് തൈക്കാട് ശാന്തികവാടത്തില്‍ മൃതദേഹം സംസ്‌കരിച്ചു.