എഴുത്തുകാരനും സാഹിത്യ വിമര്‍ശകനും മലയാളം അധ്യാപകനുമാ യിരുന്ന ഡോ.ആര്‍. ഭദ്രന് നാടിന്റെ അന്ത്യാഞ്ജലി
പത്തനംതിട്ട ജില്ലയിലെ സാംസ്‌കാരിക വേദികളിലെ സജീവ സാന്നിധ്യമായിരുന്ന എഴുത്തുകാരനും സാഹിത്യ വിമര്‍ശകനും കാതോലിക്കേറ്റ് കോളജ് മലയാള വിഭാഗം അധ്യാപകനുമായിരുന്ന ഡോ.ആര്‍. ഭദ്രന് (62) നാടിന്റെ അന്ത്യാഞ്ജലി. മൃതദേഹം ഇന്നലെ മൈനാഗപ്പള്ളി കോവൂര്‍ ഉത്രട്ടാതി വീട്ടുവളപ്പില്‍ സംസ്‌കരിച്ചു. ജനനം കൊല്ലത്തായിരുന്നെങ്കിലും ഡോ.ആര്‍. ഭദ്രന്റെ തട്ടകം പത്തനംതിട്ടയായിരുന്നു.
കോട്ടയം ബസേലിയോസ് കോളജിലെ അധ്യാപനത്തിനു ശേഷമാണ് കാതോലിക്കേറ്റ് കോളജിലേക്ക് എത്തുന്നത്. പ്രഭാഷകനായും സംഘാടകനായുമൊക്കെ അദ്ദേഹം പത്തനംതിട്ടയുടെ ഹൃദയത്തില്‍ നിറഞ്ഞു നിന്നു. വലിയ ശിഷ്യസമ്പത്തും ജില്ലയിലുണ്ട്. അദ്ദേഹത്തിന്റെ പ്രഭാഷണങ്ങള്‍ തുറന്നു പറച്ചിലുകളുടേതായിരുന്നു. അഗാധമായ ചിന്ത അദ്ദേഹത്തിന്റെ വാക്കുകളെ വേറിട്ടതാക്കി. പുതിയ തലമുറയിലെ എഴുത്തുകാര്‍ക്കും കലാകാരന്‍മാര്‍ക്കും അദ്ദേഹം പ്രോത്സാഹനമായി മാറി.
കോട്ടയത്തു തമ്പുരാന്റെ കാലകേയവധം ആട്ടക്കഥയുടെ പഠനവും വ്യാഖ്യാനവും, ചിന്തയുടെ വര്‍ണങ്ങള്‍, സാംസ്‌കാരിക ജാലകം, വിമര്‍ശനത്തിന്റെ ജാഗരൂഗതകള്‍, വാക്കിന്റെ ബഹിരാകാശങ്ങള്‍ എന്നിവയാണ് പ്രധാന കൃതികള്‍. ഇ.വി. കൃഷ്ണപിള്ള സ്മാരക പുരസ്‌കാരം, കെ.പി.അപ്പന്‍ പുരസ്‌കാരം തുടങ്ങിയവ ലഭിച്ചിട്ടുണ്ട്.
ആനുകാലികങ്ങളില്‍ രചിച്ച സാഹിത്യ വിമര്‍ശന ലേഖനങ്ങള്‍ക്ക് ഏറെ വായനക്കാരുണ്ടായിരുന്നു. കെ.പി.അപ്പന്‍, പുനത്തില്‍ കുഞ്ഞബ്ദുല്ല, ബെന്യാമിന്‍ തുടങ്ങിയ എഴുത്തുകാരുടെ കൃതികളെ ആസ്പദമാക്കി നടത്തിയിട്ടുള്ള പഠനങ്ങള്‍ ഏറെ ശ്രദ്ധിക്കപ്പെട്ടു. പുരോഗമന കലാ സാഹിത്യ സംഘം ജില്ലാ കമ്മിറ്റി അംഗം, ജില്ലാ ലൈബ്രറി കൗണ്‍സില്‍ അക്കാദമിക് കമ്മിറ്റി അംഗം, കടമ്മനിട്ട രാമകൃഷ്ണന്‍ ഫൗണ്ടേഷന്‍ അംഗം തുടങ്ങി നിലകളില്‍ പ്രവര്‍ത്തിച്ചിട്ടുണ്ട്. എംജി സര്‍വകലാശാല വിദഗ്ധ പാനലില്‍ അംഗമായിരുന്നു.
ഭാര്യ: എന്‍.എസ്.സുലേഖ, എഴുത്തുകാരി ഡോ. എസ്.ബി.കാര്‍ത്തിക, കാര്‍ത്തിക് എന്നിവരാണ് മക്കള്‍. മരുമകന്‍: അനന്തകൃഷ്ണന്‍.
https://www.facebook.com/Malayalivartha
