ഇരിപ്പിടങ്ങള്‍ ക്രമീകരിച്ച് ഈ മാസം അവസാനം ഒരു ദിവസത്തേക്കു മാത്രം നിയമസഭ ചേരാന്‍ ധാരണ
സാമൂഹിക അകലം ഉറപ്പാക്കുന്നതിന്റെ ഭാഗമായി രണ്ടു പേരുടെ ഇരിപ്പിടങ്ങളില്‍ ഒരാളെ മാത്രം ഇരുത്തി ഈ മാസം അവസാനം ഒരു ദിവസത്തേക്കു മാത്രം നിയമസഭ ചേരാന്‍ ധാരണ. തീയതി മന്ത്രിസഭാ യോഗം തീരുമാനിക്കും.
സഭയുടെ പിന്‍ഭാഗത്ത്, സാമൂഹിക അകലം ഉറപ്പാക്കുന്നതിന്റെ ഭാഗമായി അധികമായി കസേരകളിടാനാണ് ആലോചന. ഈ കസേരകളില്‍ ഇരിക്കുന്ന സാമാജികര്‍ക്കു സംസാരിക്കാന്‍ അവസരം ലഭിക്കുമ്പോള്‍ കോഡ്‌ലെസ് മൈക്ക് ലഭ്യമാക്കുകയോ ആ സമയത്തു മാത്രം സ്വന്തം സീറ്റിനടുത്തു പോയി സംസാരിക്കാനുള്ള ക്രമീകരണമോ ഒരുക്കും. ഇക്കാര്യത്തില്‍ അന്തിമതീരുമാനം വൈകാതെയുണ്ടാകും.
ഒരു ദിവസത്തേക്കു സഭ ചേരാന്‍, സ്പീക്കര്‍ പി.ശ്രീരാമകൃഷ്ണന്‍ കക്ഷിനേതാക്കളുമായി നടത്തിയ വിഡിയോ കോണ്‍ഫറന്‍സിലാണ് തീരുമാനിച്ചത്. കഴിഞ്ഞ സമ്മേളനം മാര്‍ച്ച് 13-ന് അവസാനിച്ചതിനാല്‍ വ്യവസ്ഥയനുസരിച്ചു സെപ്റ്റംബര്‍ 13-ന് അകം സഭ ചേരണം. ധനകാര്യ ബില്‍ പാസാക്കുക മാത്രമാണ് അജന്‍ഡ. സഭ അവസാനിച്ച ദിവസം അവതരിപ്പിച്ച ധനകാര്യ ബില്‍ ജൂലൈ തീരും മുന്‍പു പാസാക്കേണ്ടതുണ്ട്. നിലവിലെ സാഹചര്യത്തില്‍ ഒന്നിലധികം ദിവസം സഭ ചേരേണ്ടതില്ലെന്നു യോഗം തീരുമാനിച്ചു.
ജൂലൈ അവസാനം സമ്മേളിച്ചാല്‍ പിന്നെ 6 മാസത്തിനു ശേഷം ചേര്‍ന്നാല്‍ മതി. പ്രസ് ഗാലറിയിലെ ക്രമീകരണങ്ങള്‍ സംബന്ധിച്ചു മാധ്യമ സ്ഥാപനങ്ങളുമായി സ്പീക്കര്‍ ചര്‍ച്ച നടത്തും. സന്ദര്‍ശകര്‍ക്കും നിയന്ത്രണമുണ്ടാകും തെര്‍മല്‍ സ്‌കാനിങ് ഉള്‍പ്പെടെ ക്രമീകരണങ്ങളും ഒരുക്കും.
https://www.facebook.com/Malayalivartha
