തുലാമാസ പൂജകൾക്കായി ശബരിമല ക്ഷേത്രനട തുറന്നു. സന്നിധാനത്ത് വൻ ഭക്തജനത്തിരക്കാണ് അനുഭവപ്പെടുന്നത്. നട തുറന്ന ആദ്യ ദിവസം തന്നെ 30,000 തീർത്ഥാടകർ ഓൺലൈൻ ബുക്കിങ് വഴി ദർശനത്തിനെത്തി.

പൂജ അവധി ദിനങ്ങൾ കൂടിയായതിനാൽ മണ്ഡലകാലത്തിന് സമാനമായ ഭക്തജന പ്രവാഹമാണ് സന്നിധാനത്തേക്ക് ഉണ്ടാകുന്നത്. തുലാം ഒന്നായ ഒക്ടോബർ 18-ന് 50,000 പേരും ഒക്ടോബർ 19-ന് 40,000 പേരും ഇതിനോടകം ദർശനത്തിനായി ബുക്കിങ് പൂർത്തിയാക്കിക്കഴിഞ്ഞു.
ശബരിമലയെ രാജ്യത്തെ ഏറ്റവും മികച്ച തീർത്ഥാടന കേന്ദ്രമാക്കി മാറ്റുമെന്ന് സന്നിധാനം സന്ദർശിച്ച മുഖ്യമന്ത്രി വി.ഡി. സതീശൻ വ്യക്തമാക്കി.

വരുന്ന തീർത്ഥാടന കാലയളവ് കഴിയുന്നതോടെ ഭക്തർക്കായി തിരുപ്പതി മോഡൽ സൗകര്യങ്ങൾ ഏർപ്പെടുത്തുന്നതിനുള്ള നടപടികൾ ആരംഭിക്കുമെന്നും അദ്ദേഹം പറഞ്ഞു.

മണ്ഡല മകരവിളക്ക് തീർത്ഥാടനത്തിന്റെ മുന്നൊരുക്കങ്ങൾ വിലയിരുത്താനായി് പമ്പ ശ്രീരാമസാകേതം ഓഡിറ്റോറിയത്തിൽ ചേർന്ന വിവിധ വകുപ്പുകളുടെ അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

വഴിപാട്, പ്രസാദം എന്നിവയുടെ വിതരണം ദേവസ്വം ബോർഡിന്റെ പൂർണ്ണ നിയന്ത്രണത്തിലായിരിക്കും. അപ്പം, അരവണ എന്നിവയ്ക്ക് ഇത്തവണ ക്ഷാമമുണ്ടാകില്ലെന്ന് ദേവസ്വം ബോർഡ് പ്രസിഡന്റ് ഉറപ്പുനൽകിയതായും മുഖ്യമന്ത്രി.

തീർത്ഥാടകരുടെ സുഗമമായ ദർശനത്തിനും സുരക്ഷയ്ക്കുമായി പോലീസിനെയും ഫയർഫോഴ്സിനെയും പൂർണ്ണ സജ്ജമാക്കി വിന്യസിക്കുന്നതാണ്. പമ്പയിലെ തിരക്ക് നിയന്ത്രിക്കുന്നതിനായി നിലയ്ക്കലിൽ 6,000 പേർക്ക് തങ്ങാൻ സാധിക്കുന്ന ജർമ്മൻ മാതൃകയിലുള്ള പന്തലുകൾ നിർമ്മിക്കുകയും ചെയ്യും. ഇതുകൂടാതെ 22 എമർജൻസി മെഡിക്കൽ യൂണിറ്റുകളും സജ്ജമാക്കും. മാലിന്യ നിർമ്മാണം സമയബന്ധിതമായി പൂർത്തിയാക്കുമെന്നും പമ്പയിൽ വസ്ത്രങ്ങൾ ഉപേക്ഷിക്കുന്നത് തടയാൻ പ്രത്യേക നിയന്ത്രണങ്ങൾ ഏർപ്പെടുത്തും.

തീർത്ഥാടകർക്കായി കെ.എസ്.ആർ.ടി.സി 461 ബസുകൾ സർവീസ് നടത്തും. വിവിധ പ്രമുഖ ക്ഷേത്രങ്ങളെ ശബരിമലയുമായി ബന്ധിപ്പിച്ച് പ്രത്യേക ‘ടെമ്പിൾ കണക്റ്റിവിറ്റി’ ഉറപ്പാക്കുന്നതാണ്. റോഡ് സുരക്ഷയ്ക്കായി മോട്ടോർ വാഹന വകുപ്പിന്റെ പരിശോധന ശക്തമാക്കുകയും ചെയ്യും.