നെടുമ്പാശേരിയിൽ മൂന്ന് പേരുടെ മരണത്തിനിടയാക്കിയ വാഹനാപകടക്കേസിൽ നാല് പ്രതികളുടെയും ജാമ്യാപേക്ഷ തള്ളിക്കൊണ്ടുള്ള അങ്കമാലി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയുടെ ഉത്തരവ് പുറത്ത്. അപകടത്തിന്റെ ഗൗരവം, അന്വേഷണം പ്രാഥമിക ഘട്ടത്തിലാണെന്ന സാഹചര്യം, തെളിവുകൾ നശിപ്പിക്കാനും സാക്ഷികളെ സ്വാധീനിക്കാനുമുള്ള സാധ്യത എന്നിവ പരിഗണിച്ചാണ് കോടതി ജാമ്യം നിഷേധിച്ചത്. കേസിൽ നേരിട്ട് ദൃക്സാക്ഷികളില്ലാത്തതിനാൽ സാഹചര്യത്തെളിവുകളും ഡിജിറ്റൽ തെളിവുകളുമാണ് അന്വേഷണത്തിൽ നിർണായകമാകുക. സാമ്പത്തികമായും സാമൂഹികമായും സ്വാധീനമുള്ള പ്രതികൾ പുറത്തിറങ്ങിയാൽ സാക്ഷികളെ ഭീഷണിപ്പെടുത്തുകയോ തെളിവുകൾ നശിപ്പിക്കുകയോ ചെയ്യാനുള്ള സാധ്യത തള്ളിക്കളയാനാവില്ലെന്നും കോടതി നിരീക്ഷിച്ചു.