എസ്.എസ്.എല്‍.സി ഉത്തരക്കടലാസുകളുടെ പുനര്‍മൂല്യനിര്‍ണയം, സൂക്ഷ്മപരിശോധന, പകര്‍പ്പ് എന്നിവക്കായുള്ള ഓണ്‍ലൈന്‍ അപേക്ഷ വ്യാഴാഴ്ചമുതല്‍ ജൂലൈ ഏഴിന് വൈകീട്ട് നാലുവരെ സമര്‍പ്പിക്കാം.

sslcexam.kerala.gov.in എ​ന്ന വെ​ബ്​​സൈ​റ്റി​ലെ Revaluation/Photocopy/Scrutiny Applications  എന്ന ലിങ്കിലൂടെയാണ് രജിസ്റ്റര്‍ ചെയ്യേണ്ടത്.

രജിസ്‌ട്രേഷനുശേഷം ലഭിക്കുന്ന പ്രിന്റൗട്ടും അപേക്ഷ ഫീസും പരീക്ഷയെഴുതിയ സെന്ററിലെ പ്രഥമാധ്യാപകന് ജൂലൈ ഏഴിന് വൈകീട്ട് അഞ്ചിന് മുമ്പായി സമര്‍പ്പിക്കണം. അപേക്ഷകള്‍ ജൂലൈ എട്ടിന് വൈകീട്ട് അഞ്ചിന് മുമ്പ് പ്രഥമാധ്യാപകന്‍ കണ്‍ഫര്‍മേഷന്‍ നടത്തണം. ഉത്തരക്കടലാസുകളുടെ പുനര്‍മൂല്യനിര്‍ണയത്തിന് പേപ്പര്‍ ഒന്നിന് 400ഉം പകര്‍പ്പിന് 200 രൂപയും സൂക്ഷ്മപരിശോധനക്ക് 50 രൂപയുമാണ് ഫീസ്.

പുനര്‍മൂല്യനിര്‍ണയത്തിന് അപേക്ഷിക്കുന്ന പേപ്പറിന്റെ സൂക്ഷ്മ പരിശോധനക്കുവേണ്ടി പ്രത്യേകം അപേക്ഷിക്കേണ്ടതില്ല. ഐ.ടി വിഷയത്തിന് പുനര്‍മൂല്യനിര്‍ണയം, പകര്‍പ്പ് ലഭ്യമാക്കല്‍, സൂക്ഷ്മപരിശോധന എന്നിവ ഉണ്ടായിരിക്കില്ല. പ്രഥമാധ്യാപകന്‍ ലഭിച്ച അപേക്ഷയുടെ പ്രിന്റൗട്ട് ഓണ്‍ലൈനില്‍ പരിശോധിച്ചശേഷം ഫീസ് സ്വീകരിച്ചശേഷം അപേക്ഷകര്‍ക്ക് രസീതായി നല്‍കേണ്ടതുമാണ്.

പുനര്‍മൂല്യനിര്‍ണയത്തിലൂടെ ഉയര്‍ന്ന ഗ്രേഡ് ലഭിച്ചാല്‍ പേപ്പറിന് അടച്ച ഫീസ് പരീക്ഷാര്‍ഥിക്ക് തിരികെ നല്‍കും.

ഉത്തരക്കടലാസിന്റെ പകര്‍പ്പ് ലഭിച്ചശേഷം പുനര്‍മൂല്യനിര്‍ണയത്തിന് അപേക്ഷിക്കാന്‍ അവസരമുണ്ടാകില്ല.