തോറ്റുപോയ ഒരാളുണ്ട് കൂട്ടത്തില് ഞാന് അവനെ മാത്രമേ വിളിച്ചുള്ളൂ'ഹൃദയത്തില് തൊടും ... വൈറലായി ഈ അധ്യാപകന്റെ വാക്കുകള്
പത്താംക്ലാസ് പരീക്ഷാഫലം വന്നതോടെ വലിയ ആഘോഷത്തിലാണ് എല്ലാവരും . എ പ്ലസോടെ വിജയിച്ചവരെല്ലാം മതിമറന്നാഘോഷിച്ചു. എന്നാല്, കൂട്ടത്തില് നാം കാണാതെപോയ ചില കുഞ്ഞുങ്ങളുടെ കണ്ണീരുണ്ട്.. സാഹചര്യങ്ങള് കൊണ്ടും നിര്ഭാഗ്യം കൊണ്ടും പരാജയത്തിന്റെ കയ്പ്പുരുചി അറിഞ്ഞവര്. ഒരിക്കലെങ്കിലും പരാജയം അറിഞ്ഞവരുടെ വിജയത്തിന് തിളക്കമേറും എന്ന് അവര്ക്കു പറഞ്ഞുകൊടുക്കാന്,സാന്ത്വനമേകാന്, ഒരു പുഞ്ചിരികൊണ്ട് ആശ്വസിപ്പിക്കാന് മറന്നു പോയോ നമ്മള്.. എങ്കില് ഇതാ ഗുരു എന്ന പദത്തിനെ മഹത്വമെല്ലാം അതുപോലെ അന്വര്ഥമാക്കികൊണ്ടു ഒരു പ്രധാനാധ്യാപകന് എഴുതിയ കുറിപ്പ് ഇപ്പോള് സോഷ്യല് മീഡിയയില് വൈറലാണ്..435 കുട്ടികള് എസ്.എസ്.എല്.സി പരീക്ഷയെഴുതിയ വടകര മടപ്പള്ളിയിലെ ജി.വി.എച്ച്.എസ്.എസില് നിന്ന് ഒരു കുട്ടി മാത്രം ജയിച്ചില്ല. ഫലം വന്ന ദിവസം സ്കൂളിലെ പ്രധാനാധ്യാപകന് വി.പി. പ്രഭാകരന് മാസ്റ്റര് വിളിച്ചത് അവനെ മാത്രമാണ്.
വിജയിച്ച 434 പേരില് ഒരാളെയും വിളിക്കാതെ അധ്യാപകന് തോറ്റ കുട്ടിയെ വിളിച്ചു. അവനോടൊപ്പം തോറ്റു പോയത് നമ്മള് കൂടിയാണല്ലോയെന്ന് അദ്ദേഹം പറയുന്നു. നമ്മുടെ നോട്ടവും കരുതലും സ്നേഹവുമാണല്ലോ ഒരു കുട്ടിയെ വിജയിപ്പിക്കുന്നതെന്ന് അദ്ദേഹം ഓര്മിപ്പിക്കുകയാണ്...
പ്രഭാകരന് മാസ്റ്ററുടെ ഫേസ്ബുക്ക് കുറിപ്പ് വായിക്കാം...
തോറ്റുപോയ ഒരാളുണ്ട് കൂട്ടത്തില്. ഞാന് അവനെ മാത്രമേ വിളിച്ചുള്ളൂ. വിജയിച്ച 434 പേരില് ഒരാളെയും വിളിക്കാതെ. കാരണം അവനോടൊപ്പം തോറ്റയാളില് ഒരാളാണ് ഞാനും. ഇപ്രാവശ്യം ആരും തോല്ക്കുമെന്ന് കരുതിയിരുന്നില്ല. തോല്ക്കുമെന്ന് കരുതിയവരെ നാം കൂടെ കൊണ്ടു നടന്നു. അതില് അക്ഷരം ശരിക്കെഴുതാന് അറിയാത്തവരുമുണ്ടായിരുന്നു. അവരോട് കാണിച്ച കരുതല് , സ്നേഹം പൂര്ണമായും അവര്ക്ക് തിരിച്ചറിയാന് കഴിഞ്ഞു.
പരാജയഭീതിയില് വെളിച്ചമറ്റ കണ്ണുകളില് കണ്ടതിളക്കം, ലൈബ്രറി മുറിയില് പോകുമ്പോഴൊക്കെ ഞാന് തിരിച്ചറിഞ്ഞു. എന്തൊരു സ്നേഹത്തോടെയാണ് ടീച്ചര്മാര് അവരോട് പെരുമാറിയിരുന്നത്. ഒരുപക്ഷേ ആ കുട്ടികള് ജീവിതത്തില് ഈ സ്നേഹം മുമ്പ് അനുഭവിച്ചിട്ടുണ്ടാവില്ല. ഇത്ര സ്റ്റേഹവും കരുതലും നല്കാന് ടീച്ചര്ക്ക് ഇതിനു മുമ്പ് ഒരവസരം ലഭിച്ചിട്ടുമുണ്ടാവില്ല. പരീക്ഷാ ദിനങ്ങളില് ഇവര് ഇരിക്കുന്ന ക്ലാസ് മുറികളില് പോവുമ്പോള് അവരുടെ കണ്ണുകളില് തെളിഞ്ഞ നന്ദി സൂചകമായ നനവിന്റെ തിളക്കം. അവരുടെ അടുത്ത് പോയി തോളില് തട്ടി പ്രശ്നമൊന്നുമില്ലല്ലോ എന്നു പറഞ്ഞപ്പോള് നോക്കിയ നോട്ടത്തിലെ സ്നേഹം.
എനിക്ക് ഇപ്പോള് തോന്നുകയാണ്, തോറ്റുപോയ ആ മോനും ഒരു പക്ഷേ എന്നെ നോക്കിയിട്ടുണ്ടാവാം. ഞാനത് കണ്ടില്ലല്ലോ? നമ്മുടെ നോട്ടത്തില് നിന്ന് കരുതലില് നിന്ന് സ്നേഹത്തില് നിന്ന് വിട്ടു പോയ ഒരു കുട്ടി. ഇന്നു വിളിച്ചപ്പോള് പറഞ്ഞു: സാര് ഞാന് ജയിക്കുമെന്ന് തന്നെയാണ് കരുതിയത്. വീട്ടില് ഉമ്മയില്ലേ എന്ന് ചോദിച്ചപ്പോള് അവര് അടുത്ത വീട്ടിലാണെന്ന് പറഞ്ഞു. കുറച്ച്കഴിഞ്ഞപ്പോള് ഉമ്മ തിരിച്ചുവിളിച്ചു: എന്റെ മോന് മാത്രം തോറ്റു പോയി. പരീക്ഷ കഴിഞ്ഞപ്പോള് അവന് ജയിക്കുമെന്നാണ് എന്നോട് പറഞ്ഞത്.
ജയവും തോല്വിക്കുമിടയില് എന്താണുള്ളത്? വെറുതെ ചിന്തിച്ചു പോയി. നമ്മുടെ കരുതലിന്റെ എന്തെങ്കിലും ഒരു കുറവ്? അവനോടൊപ്പം തോറ്റു പോയത് നമ്മള് കൂടിയാണല്ലോ. റീ വാല്വേഷനല് അവന് ജയിക്കുമായിരിക്കും. അല്ലെങ്കില് സേ പരീക്ഷയില്. നൂറ് ശതമാനം ലഭിക്കുമ്പോഴാണ് എല്ലാ വിജയങ്ങളും ആഘോഷമാവുന്നത്. പക്ഷേ പരീക്ഷകളില് പരാജയപ്പെട്ട എത്രയോ പേര് പിന്നീട് ജീവിതത്തില് വലിയ വിജയം ആഘോഷിച്ചിട്ടുണ്ട് എന്നും നമുക്കറിയാം . ഞാന് അവനോട് പറഞ്ഞു, സാരമില്ല, നീ നാളെ സ്ക്കൂളില് വാ. അവന് പതിഞ്ഞ സ്വരത്തില് പറഞ്ഞു: വരാം സാര്. ഫോണിനപ്പുറത്ത് അവന്റെ മുഖം എനിക്ക് ശരിക്കും കാണാമായിരുന്നു. എന്ന് പറഞ്ഞു കൊണ്ടാണ് അദ്ദേഹം തന്റെ കുറിപ്പ് അവസാനിപ്പിക്കുന്നത്.
അവനാണ് ആ സ്കൂ ളിലെ ഏറ്റവും ഭാഗ്യം ചെയ്ത കുട്ടി..നമുക്കുറപ്പിക്കാം ആ അധ്യാപകന്റെ സ്നേഹാശ്ശിസുകള് ഏറ്റുവാങ്ങാന് കഴിഞ്ഞ അവനാവും നാളെയുടെ താരം .
-----------------------------
https://www.facebook.com/Malayalivartha