ഫെയ്‌സ്ബുക്ക് പോസ്റ്റിനെച്ചൊല്ലി യുവാവിനെ തട്ടിക്കൊണ്ടു പോയി തടവിൽ പാർപ്പിച്ചു കൊലപ്പെടുത്താൻ ശ്രമിച്ച കേസിൽ ക്വട്ടേഷൻ ഗുണ്ടാ സംഘത്തവൻ അടക്കം നാലു പേരെ പൊലീസ് പിടികൂടി. ഫെയ്‌സ്ബുക്ക് പോസ്റ്റിനു ചുവട്ടിൽ കമന്റിട്ടതിനെ തുടർന്ന് പാറോലിച്ചൽ ഭാഗത്ത് ബന്ധുവീട്ടിൽ താമസിച്ചിരുന്ന ഫൈസലിനെ (24) യാണ് ക്വട്ടേഷൻ സംഘംങ്ങൾ തട്ടിക്കൊണ്ടു പോയി അതിക്രൂരമായി ആക്രമിച്ചു കൊലപ്പെടുത്താൻ ശ്രമിച്ചത്..

കഴിഞ്ഞ ദിവസം രാത്രി ഒൻപത് മണിയോടെയായിരുന്നു ഗുണ്ടാ സംഘാംഗങ്ങൾ യുവാവിനെ തട്ടിക്കൊണ്ടു പോയി ക്രൂരമായി ആക്രമിച്ചത്. സംഭവവുമായി ബന്ധപ്പെട്ട് നിരവധി ക്രിമിനൽക്കേസുകളിൽ പ്രതിയും, ഗുണ്ടാ സംഘത്തലവനുമായ അയ്മനം മാങ്കീഴിപ്പടി വിനീത് സഞ്ജയൻ (32), ഇയാളുടെ കൂട്ടാളികളായ വടവാതൂർ പുത്തൻപറമ്പിൽ റഹിലാൽ (27), തെള്ളകം വലിയവീട്ടിൽ ബുദ്ധലാൽ (23), പേരൂർ ഒഴികയിൽ വിഷ്ണു അനിൽ (23), കുടമാളൂർ പുളിഞ്ചുവട് പുതുപ്പറമ്പിൽ അജയ് (38) എന്നിവരെയാണ് ഏറ്റുമാനൂർ പൊലീസ് സംഘം പിടികൂടിയത്.

കഴിഞ്ഞ ദിവസം ഫൈസൽ ഒരു ഫെയ്‌സ്ബുക്ക് പോസ്റ്റിനു കമന്റിട്ടിരുന്നു. ഈ കമന്റിട്ടതിനെച്ചൊല്ലി ഒരു സംഘം ഫൈസലിനെ ഭീഷണിപ്പെടുത്തിയിരുന്നു. ഇതിനു പിന്നാലെയാണ് ഈ സംഘത്തിന്റെ ക്വട്ടേഷൻ ഏറ്റെടുത്ത വിനീതും സംഘവും വീട്ടിലെത്തി ഫൈസലിനെ ആക്രമിച്ചത്. ഫൈസലിനെ തട്ടിക്കൊണ്ടു വന്ന ശേഷം, വിനീതിന്റെ വീട്ടിൽ എത്തിച്ച് തടവിൽ പാർപ്പിക്കുകയായിരുന്നു.

ഇവിടെ വച്ച് ക്വട്ടേഷൻ സംഘാംഗങ്ങൾ ചേർന്നു ഫൈസലിനെ ക്രൂരമായി മർദിക്കുകയായിരുന്നു.
ഫൈസലിന്റെ വീട് ആക്രമിച്ച വിഷയത്തിൽ അടക്കം പരാതി ലഭിച്ചതിനെ തുടർന്നു പൊലീസ് സംഘം സ്ഥലത്ത് എത്തി നടത്തിയ അന്വേഷണത്തിലാണ് ഫൈസലിനെ കണ്ടെത്തിയത്. തുടർന്നു, ഫൈസലിനെ ആശുപത്രിയിൽ എത്തിച്ചു.

തുടർന്നു നടത്തിയ അന്വേഷണത്തിലാണ് വിനീത് സഞ്ജയനെ പൊലീസ് പിടൂകിടയത്്.പ്രതികളെ കോടതിയിൽ ഹാജരാക്കി റിമാൻഡ് ചെയ്തു. നിരവധി ക്രിമിനൽക്കേസുകളിൽ പ്രതിയും, കാപ്പ ചുമത്തി ജില്ലാ പൊലീസ് ജയിലിൽ അടയ്ക്കുകയും ചെയ്ത പ്രതിയാണ് വിനീത് സഞ്ജയൻ.

മർദനമേറ്റ് മൃതപ്രായനായ ഫൈസലിനെ കൊലപ്പെടുത്തുക എന്ന ഉദ്ദേശത്തോടെ വിനീത് സഞ്ജയനും സംഘവും ഇയാളുടെ വീട്ടിൽ തന്നെ സൂക്ഷിച്ചിരിക്കുകയായിരുന്നുവെന്നു പൊലീസ് പറഞ്ഞു. പൊലീസ് എത്തിയാണ് ഫൈസലിനെ രക്ഷിച്ചത്. ഏറ്റുമാനൂരിലും പരിസരത്തും കഞ്ചാവ് , ബ്ലേഡ് മാഫിയ സംഘങ്ങൾക്കു തണലൊരുക്കുന്നത് ഗുണ്ടാ - ക്വട്ടേഷൻ സംഘങ്ങളാണ് തമ്പടിച്ചിരിക്കുന്നത്.

ഈ ക്വട്ടേഷൻ ഗുണ്ടാ സംഘങ്ങളുടെ ഇടപാടുകൾക്കു പണം നൽകുന്നതും, ഇവരുടെ കേസുകൾ അടക്കം നടത്തുന്നതും ഈ ബ്ലേഡ് മാഫിയ സംഘങ്ങളാണ്. ഏറ്റുമാനൂരിൽ ഒരു മാസം മുൻപ് 65 കിലോ കഞ്ചാവ് എക്‌സൈസ് സംഘം പിടിച്ചെടുത്തിരുന്നു. ഇത് എത്തിയത് ഏറ്റുമാനൂരിലെ ക്വട്ടേഷൻ ഗുണ്ടാ സംഘത്തിനാണ് എന്നു കണ്ടെത്തിയിരുന്നു