തൃശ്ശൂരില്‍ ഗുണ്ടാസംഘം വ്യാപാരിയെ തട്ടിക്കൊണ്ടുപോയി. മലപ്പുറം ഏലംകുളം സ്വദേശിയും തൃശൂര്‍ പാട്ടുരായ്ക്കലിലെ മൊബൈല്‍ ഷോപ്പ് ഉടമയുമായ മുഹമ്മദ് നവാസിനെയാണ് (38) തട്ടിക്കൊണ്ടുപോയത്. ബിറ്റ്‌കോയിന്‍ (ഇന്റര്‍നെറ്റിലൂടെ സാമ്പത്തിക ഇടപാടുകള്‍ക്ക് ഉപയോഗിക്കുന്ന ഡിജിറ്റല്‍ നാണയം) ഇടപാടില്‍ സംഭവിച്ച ഒന്നരക്കോടിയുടെ നഷ്ടം തീര്‍ക്കാനാണ് വ്യാപാരിയെ തട്ടിക്കൊണ്ടു പോയത്.

11 പ്രതികളെ 17 മണിക്കൂറിനുള്ളില്‍ ഈസ്റ്റ് പൊലീസ് പിടികൂടി. നവാസിനൊപ്പം ബിറ്റ്‌കോയിന്‍ ഇടപാടുകള്‍ നടത്തി സാമ്പത്തിക നഷ്ടം സംഭവിച്ച താനൂര്‍ സ്വദേശി ഷൗക്കത്ത് നല്‍കിയ ക്വട്ടേഷന്‍ അനുസരിച്ച് ഗുണ്ടാത്തലവന്‍ കുരങ്ങന്‍ നിസാറും സംഘവുമാണ് തട്ടിക്കൊണ്ടുപോയത്. ഷൗക്കത്തും നിസാറും പിടിയിലായവരില്‍പെടുന്നു.

ഗുണ്ടാസംഘം മൂവാറ്റുപുഴയില്‍നിന്ന് വാടകയ്‌ക്കെടുത്ത കാറിലാണ് നവാസിനെ കൊണ്ടുപോയത്. എറണാകുളം തമ്മനത്തും പിന്നീട് അരൂക്കുറ്റിയിലും തടങ്കലില്‍ പാര്‍പ്പിച്ച് നവാസിനെ മര്‍ദിച്ചു. നവാസിന്റെ പേരില്‍ വയനാട്ടിലുള്ള നാലേക്കര്‍ തോട്ടം ഷൗക്കത്തിന് എഴുതിനല്‍കാമെന്നു സമ്മതിപ്പിച്ച് മുദ്രപ്പത്രത്തില്‍ എഴുതി വാങ്ങിയശേഷമാണ് ഇവര്‍ വിട്ടയച്ചത്. ഇതിനകം പൊലീസ് ക്വട്ടേഷന്‍ സംഘത്തെ അരൂക്കുറ്റി, വാടാനപ്പള്ളി എന്നിവിടങ്ങളില്‍ നിന്നു പിടികൂടി.

ക്വട്ടേഷന്‍ സംഘാംഗങ്ങളായ ചേര്‍ത്തല അരൂക്കുറ്റി സ്വദേശികളായ വടുതല തൗഫീഖ് മന്‍സിലില്‍ നിസാര്‍ (കുരങ്ങന്‍ നിസാര്‍ 39), പെരിങ്ങോട്ടുചിറയില്‍ ധനീഷ് (31), കാരിക്കനേഴത്ത് ജെഫിന്‍ (30), കാരിക്കിനേഴത്ത് ജിതിന്‍ (26), കൊഴുപ്പുള്ളിത്തറ ബസ്റ്റിന്‍ (24), നടുവത്ത് അരൂര്‍ വട്ടക്കേരി കായപുറത്ത് ശ്രീനാഥ് (27), എടപ്പള്ളി തോപ്പില്‍പറമ്പില്‍ ധിനൂപ് (31), പരപ്പനങ്ങാടി സ്വദേശികളായ പോക്കുഹാജിന്റെപുരക്കല്‍ ഫദല്‍ (36), പള്ളിച്ചന്റെപുരയ്ക്കല്‍ അനീസ് (27), താനൂര്‍ ഒഴൂര്‍ അടിപറമ്പില്‍ താഹിര്‍ (28) എന്നിവരും ക്വട്ടേഷന്‍ കൊടുത്ത പരിയാപുരം ചെറുവത്ത് കൊറ്റായില്‍ ഷൗക്കത്ത് (45) എന്നിവരുമാണ് അറസ്റ്റിലായത്.