പാമ്പ് പിടിത്തക്കാര്‍ക്ക് അഞ്ച് വര്‍ഷ കാലാവധിയുള്ള ലൈസന്‍സ് ഏര്‍പ്പെടുത്താനും ഇന്‍ഷുറന്‍സ് ഏര്‍പ്പെടുത്താനും സര്‍ക്കാര്‍ തീരുമാനം... പാമ്പ് പിടിത്തത്തിന് വനംവകുപ്പ് മാര്‍ഗനിര്‍ദേശങ്ങള്‍ തയ്യാറാക്കി....
പാമ്പ് പിടിത്തത്തിന് വനംവകുപ്പ് മാര്‍ഗനിര്‍ദേശങ്ങള്‍ തയ്യാറാക്കി. പാമ്പ് പിടിത്തക്കാര്‍ക്ക് അഞ്ച് വര്‍ഷ കാലാവധിയുള്ള ലൈസന്‍സ് ഏര്‍പ്പെടുത്താനും ഇന്‍ഷുറന്‍സ് ഏര്‍പ്പെടുത്താനും സര്‍ക്കാര്‍ തീരുമാനിച്ചു. മാര്‍ഗനിര്‍ദേശപ്രകാരം ലൈസന്‍സ് നേടുന്നവര്‍ക്ക് മാത്രമാകും പാമ്പിനെ പിടിക്കാന്‍ അനുമതി. 65 വയസ്സില്‍ താഴെയുള്ളവര്‍ക്കാണ് ലൈസന്‍സ് അനുവദിക്കുക. മുന്‍ പരിചയം, വൈദഗ്ധ്യം, ആരോഗ്യം, സ്വഭാവം എന്നിവ കണക്കിലെടുക്കും. ലഹരി ഉപയോഗിക്കുന്നവര്‍, പരാതികളും ആക്ഷേപങ്ങളും നേരിടുന്നവര്‍ എന്നിവരെ പരിഗണിക്കില്ല. പാമ്പ് പിടിത്തക്കാരെ തെരഞ്ഞെടുക്കാന്‍ അപേക്ഷ ക്ഷണിക്കും.
സാമൂഹ്യ വനവിഭാഗം അസിസ്റ്റന്റ് ഫോറസ്റ്റ് കണ്‍സര്‍വേറ്ററുടെ നേതൃത്വത്തിലുള്ള വിദഗ്ധ സമിതി അപേക്ഷകള്‍ പരിശോധിച്ച് യോഗ്യരെ തെരഞ്ഞെടുക്കും. തെരഞ്ഞെടുക്കപ്പെടുന്നവര്‍ക്ക് രണ്ട് ദിവസത്തെ പരിശീലനവും ലൈസന്‍സും സുരക്ഷാ ഉപകരണങ്ങള്‍ അടങ്ങിയ കിറ്റും നല്‍കും.സന്നദ്ധ പ്രവര്‍ത്തനമായിട്ടായിരിരിക്കും പാമ്പുപിടിത്തം പരിഗണിക്കുക. വീട്ടിനുള്ളിലോ, പരിസര പ്രദേശങ്ങളിലോ കാണുന്ന പാമ്പിനെ പിടിക്കാന്‍ മാത്രമാണ് അനുമതി. വിഷമില്ലാത്ത പാമ്പുകളെ പിടിക്കുന്നത് പരമാവധി ഒഴിവാക്കണം.
സര്‍ക്കാര്‍ അംഗീകാരമുള്ള പാമ്പ് പിടിത്തക്കാരുടെ കൃത്യനിര്‍വഹണം തടസ്സപ്പെടുത്തിയാല്‍ നിയമ നടപടിയുണ്ടാകും. പാമ്പുകളുടെ പ്രദര്‍ശനം, ഇവയെ ഉപയോഗിച്ച് പ്രസിദ്ധിയാര്‍ജിക്കാനുള്ള പ്രവര്‍ത്തനങ്ങള്‍, ആളുകളെ പരിഭ്രാന്തിയിലാക്കല്‍ എന്നിവ നടത്തിയാല്‍ നടപടി സ്വീകരിക്കുകയും ലൈസന്‍സ് റദ്ദാക്കുകയും ചെയ്യും. സര്‍ക്കാര്‍ അംഗീകൃത പാമ്പ് പിടിത്തക്കാരുടെ ലിസ്റ്റ് തദ്ദേശസ്വയംഭരണ സ്ഥാപനങ്ങള്‍, അഗ്‌നിശമന സേന, പൊലീസ് വിഭാഗങ്ങള്‍ക്ക് ലഭ്യമാക്കും. ലിസ്റ്റ് വനംവകുപ്പിന്റെ വെബ്സൈറ്റിലും നല്‍കും.
അംഗീകൃത പാമ്പ് പിടിത്തക്കാരുടെ സേവനം പ്രയോജനപ്പെടുത്തി പാമ്പുമായി ബന്ധപ്പെട്ട അപകടങ്ങള്‍, പിടികൂടിയ പാമ്പുകള്‍ എന്നിവയുടെ വിവരശേഖരണം നടത്തും. ഇതുമായി ബന്ധപ്പെട്ട് പ്രത്യേക സോഫ്റ്റ്വെയറും തയ്യാറാക്കും. സംസ്ഥാനത്ത് മൂന്ന് വര്‍ഷത്തിനിടയില്‍ പാമ്പ് കടിയേറ്റ് ജീവന്‍ നഷ്ടമായത് 334 പേര്‍ക്കാണ്. ഇതിന് പുറമേ 1860 പേര്‍ക്ക് പാമ്പ് കടിയേറ്റു. അശാസ്ത്രീയമായി പാമ്പ് പിടിത്തത്തില്‍ ഏര്‍പ്പെട്ട് ജീവന്‍ നഷ്ടമാകുന്നതും പാമ്പിനെ ഉപയോഗിച്ച് കൊലപാതകം നടത്തിയതുമുള്‍പ്പെടെയുള്ള സംഭവങ്ങള്‍ റിപ്പോര്‍ട്ട് ചെയ്ത സാഹചര്യത്തിലാണ് പാമ്പ് പിടിത്തത്തിന് വനംവകുപ്പിന്റെ മാര്‍ഗനിര്‍ദേശം.
https://www.facebook.com/Malayalivartha
