സംസ്ഥാനത്ത് കൊറോണ വ്യാപകമായി പടരുന്ന സാഹചര്യത്തിൽ പുറത്തുപോയി തിരിച്ചുവരുന്നവര്‍ വീടിനുള്ളിലും മാസ്ക് ഉപയോഗിക്കണം, ഒപ്പം ശാരീരിക അകലം പാലിക്കണമെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. 'ബ്രേക്ക് ദ് ചെയിൻ' ജീവിതശൈലി ജനങ്ങള്‍ തുടരണമെന്നും മുഖ്യമന്ത്രി പറയുകയുണ്ടായി.

അതേസമയം സംസ്ഥാനത്ത് സമ്പർക്കത്തിലൂടെയുള്ള കൊവിഡ് വ്യാപനം അറുപത് ശതമാനത്തിന് മുകളിലാണ് എത്തിനിൽക്കുന്നത്. തുടർന്ന് രോഗികളുടെ എണ്ണം പതിനായിരം കടന്നു. എന്നാൽ മരണനിരക്ക് കുത്തനെ ഉയർന്നിട്ടില്ല എന്നത് നേരിയ ആശ്വാസം നല്കുന്നു. രോഗവ്യാപനം മൂന്നാം ഘട്ടത്തിലെ രണ്ടാം പാദത്തിലാണിപ്പോള്‍ നിൽക്കുന്നത്. ഉറവിടമറിയാത്ത കേസുകൾ കൂടിയിരിക്കുന്നു. നിരവധി ജില്ലകളിലാണ് ക്ലസ്റ്ററുകൾ രൂപപ്പെടുന്നത്.ഇതേതുടർന്ന് ജാഗ്രത തുടരണമെന്നും മുഖ്യമന്ത്രി അറിയിച്ചു.

കേരളത്തിൽ നിലവിലുള്ള കൊവിഡ് രോഗികളില്‍ 60 ശതമാനത്തിനു മുകളില്‍ ലക്ഷണം പ്രകടിപ്പിക്കാത്തവരാണ്. അപകടസാധ്യതാ വിഭാഗത്തില്‍പ്പെടാത്തവരും രോഗലക്ഷണം ഇല്ലാത്തവരുമായവരെ താമസസ്ഥലത്തിന് തൊട്ടടുത്ത് ചികിത്സാകേന്ദ്രം ഉണ്ടെന്ന് ഉറപ്പുണ്ടെങ്കില്‍ വീട്ടില്‍തന്നെ കഴിയാന്‍ അനുവദിക്കാം എന്ന് മറ്റു ചില രാജ്യങ്ങളിലെ അനുഭവം കാണിക്കുന്നുണ്ട്. അതേസമയം രോഗവ്യാപനം വര്‍ധിച്ചാല്‍ ഇത്തരം നിര്‍ദ്ദേശങ്ങള്‍ കേരളത്തിലും പരിഗണിക്കേണ്ടതായി വന്നേക്കാമെന്നും മുഖ്യമന്ത്രി പറഞ്ഞു. സ്വകാര്യ ആശുപത്രികള്‍ക്കും ചികിത്സാനുമതി നല്‍കുമെന്നും പിണറായി വിജയന്‍ വ്യക്തമാക്കി.