കോട്ടയം: മണർകാട് ക്രൗൺ ക്ലബിലെ ചീട്ടുകളി കളത്തിൽ നിന്നും 18 ലക്ഷം രൂപ പിടിച്ചെടുത്ത സംഭവത്തിൽ പൊലീസിനെ കുറ്റപ്പെടുത്തി മണർകാട് എസ്.എച്ച്.ഒ. കേസിൽ പ്രതി ചേർപ്പെട്ട ക്രൗൺ ക്ലബ് സെക്രട്ടറി മണർകാട് മാലം വാവത്തിൽ കെ.വി സുരേഷു (മാലം സുരേഷ്) മായി നടത്തിയ ഫോൺ സംഭാഷണത്തിലാണ് കേസെടുത്ത ഉദ്യോഗസ്ഥൻ തന്നെ പൊലീസിനെക്കുറ്റപ്പെടുത്തുന്നത്. ഗുരുതരമായ വീഴ്‌ച വരുത്തിയതായി കണ്ടെത്തിയ മണർകാട് എസ്.എച്ച്.ഒ ഇൻസ്‌പെക്‌ടർ രതീഷ് കുമാറിനെതിരെ രഹസ്യാന്വേഷണ വിഭാഗം അന്വേഷണം ആരംഭിച്ചു.

കഴിഞ്ഞ 11 നാണ് മണർകാട് ക്രൗൺ ക്ലബിൽ നടത്തിയ പരിശോധനയിൽ 18 ലക്ഷം രൂപ പൊലീസ് പിടിച്ചെടുത്തത്. ഇവിടെ ചീട്ടുകളിക്കാൻ എത്തിയ ആലപ്പുഴ, എറണാകുളം, ഇടുക്കി, കോട്ടയം സ്വദേശികളായ 43 പേരെ പിടികൂടുകയും ചെയ്‌തിരുന്നു. ഇതിനു പിന്നാലെ മണർകാട് ക്രൗൺ ക്ലബ് ഭാരവാഹികളെ പ്രതി ചേർക്കുകയും ചെയ്‌തിരുന്നു. ഇതിനു പിന്നാലെ കേസിൽ പ്രതി ചേർക്കപ്പെട്ട മാലം സുരേഷ് എസ്.എച്ച്.ഒയുമായി നടത്തുന്ന ഫോൺ സന്ദേശമാണ് ഇപ്പോൾ പുറത്തു വന്നിരിക്കുന്നത്.

ക്ലബിനു താഴെ പ്രവർത്തിക്കുന്ന തൻ്റെ സ്ഥാപനങ്ങളിൽ നിന്നുള്ള പണമാണ് ചീട്ടുകളി സ്ഥലത്തു നിന്നും പൊലീസ് പിടിച്ചെടുത്തതെന്നാണ് മാലം സുരേഷ് ആരോപിക്കുന്നത്. ഇത് ശരിവയ്‌ക്കുകയാണ് മണർകാട് എസ്.എച്ച്.ഒ ചെയ്യുന്നത്. ഇത് കൂടാതെ പാമ്പാടി സ്റ്റേഷൻ ഹൗസ് ഓഫിസർ യു.ശ്രീജിത്താണ് പരിശോധനയ്‌ക്കു പിന്നിലെന്നും മണർകാട് എസ്.എച്ച്.ഒ കുറ്റപ്പെടുത്തുന്നു. ഇതെല്ലാം റെക്കോർഡ് ചെയ്‌തു മാലം സുരേഷ് തന്നെയാണ് പുറത്തു വിട്ടിരിക്കുന്നത്. പൊലീസിനെതിരെ ഹൈക്കോടതിയെ സമീപിക്കുമെന്നു മാലം സുരേഷ് പറയുമ്പോൾ, കോടതിയെ സമീപിക്കുന്നതാണ് എനിക്ക് നല്ലതെന്നും മണർകാട് എസ്.എച്ച്.ഒ പറയുന്നു.

പരിശോധനയ്‌ക്കു നേതൃത്വം നൽകുകയും കേസ് രജിസ്റ്റർ ചെയ്യുകയും ചെയ്‌ത ഉദ്യോഗസ്ഥൻ തന്നെയാണ് പ്രതിയ്‌ക്കു നിയമോപദേശം നൽകുകയും പൊലീസിനെക്കുറ്റപ്പെടുത്തുകയും ചെയ്‌തിരിക്കുന്നത്. ഈ സാഹചര്യത്തിലാണ് ഇദ്ദേഹത്തിനെതിരെ രഹസ്യാന്വേഷണ വിഭാഗം അന്വേഷണം ആരംഭിച്ചിരിക്കുന്നത്.