ബിസിനസ് കാര്‍ഡില്‍ സര്‍ക്കാര്‍ മുദ്ര ഉപയോഗിക്കുന്നത് സംബന്ധിച്ച ബിശ്വാസ് മേത്തയുടെ വാദം തെറ്റെന്നതിന് തെളിവായി ഔദ്യോഗിക രേഖകള്‍
കേരള സര്‍ക്കാരിന്റെ ഔദ്യോഗിക മുദ്രയുള്ള ബിസിനസ് കാര്‍ഡ് ചീഫ് സെക്രട്ടറിയുടെ ഓഫിസിലെ സ്‌പെഷല്‍ സെല്‍ ജീവനക്കാര്‍ ഉപയോഗിക്കുന്നതില്‍ അപാകതയില്ലെന്ന ചീഫ് സെക്രട്ടറി ബിശ്വാസ് മേത്തയുടെ വാദം തെറ്റെന്നതിന് ഔദ്യോഗിക രേഖകള്‍ തന്നെ തെളിവ്.
കിന്‍ഫ്രയില്‍ നിന്നുള്ളവരായതിനാല്‍ സ്‌പെഷല്‍ സെല്‍ ജീവനക്കാര്‍ക്ക് ബിസിനസ് കാര്‍ഡില്‍ ഔദ്യോഗിക മുദ്ര ഉപയോഗിക്കാമെന്നായിരുന്നു ബിശ്വാസ് മേത്തയുടെ ന്യായീകരണം. എന്നാല്‍, ജീവനക്കാര്‍ കിന്‍ഫ്രയില്‍ നിന്നാണെന്ന വാദം തെറ്റാണ്. കിന്‍ഫ്രയ്ക്ക് താല്‍ക്കാലിക ജോലിക്കാരെ ലഭ്യമാക്കുന്ന 'മിന്റ്' എന്ന മാന്‍പവര്‍ ഏജന്‍സിയില്‍ നിന്നുള്ളവരാണു ചീഫ് സെക്രട്ടറിയുടെ സ്‌പെഷല്‍ സെല്ലില്‍ പ്രവര്‍ത്തിക്കുന്ന നിരഞ്ജന്‍ ജെ.നായരും കവിത സി. പിള്ളയും. ഇതേ ഏജന്‍സിയില്‍ നിന്നുള്ള ഒരാള്‍ വ്യവസായ വകുപ്പ് പ്രിന്‍സിപ്പല്‍ സെക്രട്ടറിയുടെ ഓഫിസിലും ജോലി ചെയ്യുന്നുണ്ട്.
കഴിഞ്ഞ വര്‍ഷം ജനുവരി 31-നാണ് വിദേശ രാജ്യങ്ങളില്‍ നിന്നു വരുന്നവരുമായി ഇടപെടാന്‍ സ്‌പെഷല്‍ സെല്‍ രൂപീകരിക്കാനും അവിടെ ടീം ലീഡര്‍ (1 തസ്തിക - ശമ്പളം 75,000 - 1.25 ലക്ഷം), ഡപ്യൂട്ടി ടീം ലീഡര്‍ (2 തസ്തിക - ശമ്പളം 40,000 - 75,000) രൂപീകരിക്കാനും സര്‍ക്കാര്‍ ഉത്തരവിറങ്ങിയത് - ജിഒ.(എംഎസ്) നമ്പര്‍ 21-2019-ജിഎഡി. ആ ഉത്തരവില്‍തന്നെ കൃത്യമായി പറയുന്നു: 'കിന്‍ഫ്രയ്ക്ക് മാന്‍പവര്‍ ലഭ്യമാക്കുന്ന ഏജന്‍സിയിലൂടെയാകണം നിയമനം. ചെലവുകള്‍ കിന്‍ഫ്ര വഹിക്കണം.' നിയമിക്കപ്പെടുന്ന ജീവനക്കാര്‍ക്കു കിന്‍ഫ്ര നേരിട്ടു ശമ്പളം നല്‍കുന്നില്ല. കമ്മിഷന്‍ ചേര്‍ത്തുള്ള തുക ഏജന്‍സിക്കാണു നല്‍കുന്നത്. മാന്‍പവര്‍ ഏജന്‍സിയില്‍ നിന്നുള്ളവര്‍ കഴിഞ്ഞ വര്‍ഷം ജൂണ്‍ മുതല്‍ ചീഫ് സെക്രട്ടറിയുടെ ഓഫിസില്‍ പ്രവര്‍ത്തിക്കുന്നു.
കഴിഞ്ഞ ഏപ്രില്‍ 28-ന് കിന്‍ഫ്ര മാനേജിങ് ഡയറക്ടര്‍ക്ക് അയച്ച കത്തില്‍ (നമ്പര്‍ 52സ്‌പെഷല്‍ സെല്‍സിഎസ്ഒ2020), ടീം ലീഡര്‍ തസ്തികയിലേക്കുള്ള വ്യക്തി ജോലിക്കു ചേര്‍ന്നിട്ടില്ലാത്തതിനാല്‍ ഡപ്യൂട്ടി ലീഡര്‍മാരിലൊരാളായ നിരഞ്ജനെ ലീഡറാക്കാന്‍ ചീഫ് സെക്രട്ടറി നിര്‍ദേശിച്ചെന്ന് ചീഫ് സെക്രട്ടറിയുടെ സ്റ്റാഫ് ഓഫിസര്‍ ഡോ.രേണു രാജ് വ്യക്തമാക്കിയിട്ടുണ്ട്.
നിരഞ്ജനും കവിതയും കഴിഞ്ഞ ഫെബ്രുവരി 10-ന്് തനിക്കും സ്‌പെഷല്‍ സെല്ലിലെ മറ്റുള്ളവര്‍ക്കും ബിസിനസ് കാര്‍ഡ് ആവശ്യമാണെന്ന് ചീഫ് സെക്രട്ടറിക്കു കുറിപ്പു നല്‍കുന്നു (നമ്പര്‍ 32-സ്‌പെഷല്‍ സെല്‍ സിഎസ്ഒ-2020). ഈ കുറിപ്പില്‍, സര്‍ക്കാരിന്റെ ഔദ്യോഗിക മാതൃക ഉള്‍പ്പെടുത്തിയുള്ള ബിസിനസ് കാര്‍ഡ് മാതൃകയും ഉള്‍പ്പെടുത്തി. കുറിപ്പില്‍ ചീഫ് സെക്രട്ടറി പിറ്റേന്നുതന്നെ ഒപ്പുവച്ചു.
സ്വര്‍ണ്ണക്കടത്തു കേസ് പ്രതി സ്വപ്ന സുരേഷിന്റെ നിയമനവും സ്വപ്നയുടെ ബിസിനസ് കാര്‍ഡില്‍ ഔദ്യോഗിക മുദ്ര ഉപയോഗിച്ചതും വിവാദമായപ്പോള്‍, സ്വപ്ന സര്‍ക്കാരിന്റെയോ പ്രൈസ്വാട്ടര്‍ഹൗസ് കൂപ്പേഴ്‌സിന്റെയോ ശമ്പളം പറ്റുന്ന ആളല്ലെന്നും വിഷന്‍ ടെക്‌നോളജീസ് എന്ന മാന്‍പവര്‍ ഏജന്‍സിയുടെ ജീവനക്കാരിയാണെന്നുമായിരുന്നു സര്‍ക്കാര്‍ വാദം. എന്നാല്‍, സ്‌പെഷല്‍സെല്ലിലെ ജീവനക്കാരുടെ വിഷയം വിവാദമായപ്പോള്‍, അവര്‍ മാന്‍പവര്‍ ഏജന്‍സിയില്‍ നിന്നുള്ളവരെന്ന വസ്തുത ഒഴിവാക്കുകയും ചെയ്തു.
https://www.facebook.com/Malayalivartha
