സ്വപ്നയുടെ നാവടങ്ങി... സ്വര്‍ണക്കടത്തു കേസില്‍ നിര്‍ണായക വിവരം നല്‍കേണ്ട അറ്റാഷെ അറബി നാടു വിട്ടപ്പോള്‍ കുറ്റപ്പെടുത്തിയവരുടെ വായടച്ച് എന്‍ഐഎ; അറബിയുടെ ഫ്‌ളാറ്റില്‍ കയറി റെയ്ഡ് നടത്തി; സ്വര്‍ണക്കടത്ത് കേസില്‍ നിര്‍ണായക വിവരങ്ങള്‍ ഇന്ന് കോടതിയില്‍ സമര്‍പ്പിക്കും
കേരളത്തെ എടുത്തു മറിച്ച സ്വര്‍ണക്കടത്ത് കേസില്‍ കേന്ദ്ര സര്‍ക്കാര്‍ പിടി മുറുക്കുകയാണ്. സ്വതന്ത്രമായ അന്വേഷണം നടത്താന്‍ പ്രധാനമന്ത്രി നരേന്ദ്രമോദി അന്വേഷണ സംഘത്തിന് അനുമതി നല്‍കിയിട്ടുണ്ട്. ഏത് കൊലകൊമ്പനേയായാലും പൊക്കി അന്വേഷണം നടത്താനുള്ള പിന്തുണയാണ് നല്‍കിയത്. അതേസമയം കോണ്‍സേറ്റ് അറ്റാഷെ റാഷീദ് ഖാമിസ് ഇന്ത്യ വിട്ടതോടെ ശക്തമായ പ്രതിഷേധമാണ് കേന്ദ്രത്തിനെതിരെ ഉണ്ടായത്. അറബിയെ പേടിച്ചാണ് നാടുവിടാന്‍ സഹായിച്ചതെന്ന തരത്തിലുള്ള പ്രചാരണങ്ങളുമുണ്ടായി. ഇതിന് മറുപടിയായി മുഖ്യ പ്രതിയായ ഫൈസല്‍ ഫരീദിനെ ദുബായിയില്‍ നിന്നു തന്നെ പൊക്കി.
മാത്രമല്ല അറ്റാഷെ കുറ്റക്കാരനെങ്കില്‍ അദ്ദേഹത്തിനെതിരെ നടപടി സ്വീകരിക്കാനുള്ള ശ്രമവും നടത്തി. അറ്റാഷെയ്ക്ക് നയതന്ത്ര പരിരക്ഷയുള്ളതിനാല്‍ ഇന്ത്യയ്ക്ക് ശിക്ഷിക്കാനാവില്ല. പക്ഷെ ശക്തമായ തെളിവുണ്ടെങ്കില്‍ യുഎഇയ്ക്ക് കൈമാറാം. അവരെ കൊണ്ട് അറ്റാഷെയ്‌ക്കെതിരെ നടപടി സ്വീകരിക്കാം. ഈ നിയമോപദേശത്തിന്റെ അടിസ്ഥാനത്തില്‍ അറ്റാഷെയായ അറബിയുമായി ബന്ധപ്പെട്ട് പരമാവധി തെളിവുകള്‍ ശേഖരിക്കുകയാണ് എന്‍ഐഎ.
അറ്റാഷെ റാഷീദ് ഖാമിസ് താമസിച്ചിരുന്ന പാറ്റൂരിലെ ഫ്‌ലാറ്റിലാണ് എന്‍.ഐ.എ റെയ്ഡ് നടത്തിയത്. അറ്റാഷെയടക്കം നാല് അറബി ഉദ്യോഗസ്ഥര്‍ ഇവിടെയാണ് താമസിക്കുന്നത്. ഫ്‌ളാറ്റിലെ സുരക്ഷാ ജീവനക്കാര്‍ ഉള്‍പ്പെടെയുള്ളവരില്‍ നിന്ന് വിവരങ്ങള്‍ ശേഖരിച്ചു. സന്ദര്‍ശക രജിസ്റ്ററും പരിശോധിച്ചു. കോണ്‍സുലേറ്റ് ഉദ്യോഗസ്ഥരെ കാണാന്‍ പ്രതികള്‍ എത്തിയിരുന്നോ എന്ന് കണ്ടെത്താനാണിത്. ഇതിനു പിന്നാലെ കംസ്റ്റംസുമെത്തി വിവരങ്ങള്‍ ശേഖരിച്ചു.
അതേസമയം സ്വപ്നയെയും സന്ദീപ് നായരെയും ചോദ്യം ചെയ്തപ്പോള്‍ സ്വര്‍ണക്കടത്തിലെ ഉന്നത ബന്ധത്തെക്കുറിച്ച് ലഭിച്ച നിര്‍ണായക വിവരങ്ങള്‍ എന്‍.ഐ.എ ഇന്ന് കോടതിയില്‍ സമര്‍പ്പിക്കും. മുദ്രവച്ച കവറില്‍ കൈമാറാനാണ് സാദ്ധ്യത. കസ്റ്റഡി കാലാവധി അവസാനിച്ചതിനാല്‍ ഇരുവരെയും ഇന്ന് കോടതിയില്‍ ഹാജരാക്കും. സരിത്തിനെ ചോദ്യം ചെയ്യുന്നത് തുടരും. ദുബായ് പൊലീസ് കഴിഞ്ഞ ദിവസം അറസ്റ്റുചെയ്ത ഫൈസല്‍ ഫരീദിനെ കിട്ടിയാലേ സ്വര്‍ണം വിറ്റുകിട്ടുന്ന പണം ഭീകര പ്രവര്‍ത്തനങ്ങള്‍ക്ക് പോകുന്നതിന്റെ ചുരുളഴിക്കാനാകൂവെന്ന് അന്വേഷണ സംഘം പറഞ്ഞു. മൂന്നാം പ്രതിയും തൃശൂര്‍ കൈപ്പമംഗലം സ്വദേശിയുമായ ഫരീദാണ് നയതന്ത്ര ചാനല്‍ വഴി ദുബായില്‍ നിന്ന് സ്വര്‍ണം കയറ്റിവിട്ടിരുന്നത്.
ഫരീദിനെ രണ്ടു ദിവസത്തിനുള്ളില്‍ കൊച്ചിയിലെത്തിക്കുമെന്ന് എന്‍.ഐ.എ സൂചന നല്‍കി. കുറ്റവാളികളെ കൈമാറുന്നതിനു മുമ്പ് ഇരുരാജ്യങ്ങളിലെയും വിദേശകാര്യ മന്ത്രാലയങ്ങള്‍ ചില രേഖകള്‍ തയ്യാറാക്കണം. കേസുമായി ബന്ധപ്പെട്ട വിവരങ്ങളാണിത്.ഫൈസലിനെ ദുബായ് പൊലീസ് ചോദ്യം ചെയ്യുന്നത് തുടരുന്നു. സ്വര്‍ണക്കടത്തില്‍ കോണ്‍സുലേറ്റിന്റെ ബന്ധത്തെക്കുറിച്ചാണ് പ്രധാനമായും അന്വേഷിക്കുന്നത്.തിരുവനന്തപുരത്ത് വീടുകളും ഫ്‌ളാറ്റുകളും വാടകയ്‌ക്കെടുത്തത് സ്വര്‍ണം വേര്‍തിരിച്ച് സൂക്ഷിക്കാനും കൈമാറാനുമാണെന്ന് സ്വപ്നയും സന്ദീപും സമ്മതിച്ചിരുന്നു. ചോദ്യങ്ങള്‍ക്ക് മുന്നില്‍ മിക്കപ്പോഴും കരച്ചിലായിരുന്നു സ്വപ്‌ന. സന്ദീപും സരിത്തും സ്വര്‍ണക്കടത്തിനെക്കുറിച്ചുള്ള വിവരങ്ങള്‍ കൈമാറി. ഇതൊന്നും സ്വപ്‌ന നിഷേധിച്ചില്ല.
സന്ദീപില്‍ നിന്ന് സ്വര്‍ണം വാങ്ങിയ പെരിന്തല്‍മണ്ണ സ്വദേശി റെമീസ്, സ്വര്‍ണക്കടത്തിന് പണം സമാഹരിച്ച മൂവാറ്റുപുഴ സ്വദേശി ജലാല്‍ എന്നിവരെ കോടതിയുടെ അനുമതിയോടെ എന്‍.ഐ.എ അടുത്തദിവസം അറസ്റ്റുചെയ്യും. കസ്റ്റംസ് കേസില്‍ ഇരുവരും ജയിലിലാണ്.
https://www.facebook.com/Malayalivartha
