ഇനി കാത്തിരിക്കുന്നത് ഏത് കാഴ്ചയ്ക്കാണ്... എത്രകൊണ്ടാലും പഠിക്കാത്തവര്‍.. വഴിയരികില്‍ ഉപേക്ഷിച്ച നിലയില്‍ ഉപയോഗിച്ച മാസ്‌കുകള്‍.. കോവിഡ് കൂടുന്നു എന്ന് നിലവിളിയും
എത്ര കൊണ്ടാലും പഠിക്കാത്തവരായി മാറുകയാണ് നമ്മളില്‍ ചിലര്‍. അതിന്റെ ദുരന്തം പേറുന്നത് നാമെല്ലാവരുമാണ് . കോവിഡ് പ്രതിരോധങ്ങളെ കുറിച്ച് വാതോരാതെ മുന്നറിയിപ്പുകളും അവബോധലാസ്സുകളും ചുറ്റും നടക്കുന്നുണ്ട്.ടിവിയിലും ആരെയെങ്കിലും ഒന്ന് ഫോണ്‍ വിളിക്കാന്‍ എടുത്താല്‍ നമ്മുടെ ചെവിയിലും നിരന്തരം മുഴങ്ങുന്നത് കോവിഡ് സുരക്ഷാ മുന്‍കരുതലുകള്‍ എങ്ങനെയാവണം എന്നതാണ്..എന്നിട്ടും പഠിക്കാത്തവരായി നമുക്കു ചുറ്റും ഉണ്ട് ചിലര്‍. ഉപയോഗിച്ച മസ്‌കുകള്‍ വഴിയരികില്‍ ഉപേക്ഷിച്ച നിലയില്‍ കണ്ടെത്തുന്നു എന്നത് ഇതാദ്യത്തെ വാര്‍ത്തയല്ല. പലതവണയായി നമ്മള്‍ കടന്നുപോകുന്ന പലയിടങ്ങളിലും ഉപേക്ഷിച്ച മാസ്‌കുകള്‍ കാണാന്‍ സാധിക്കും.പിന്നെ എങ്ങനെയാണു നമുക്കു കോവിഡിനെ അതിജീവിക്കാന്‍ സാധിക്കുക?
ഉപയോഗിച്ച മാസ്‌കുകള്‍ വഴിയരികില്‍ ഉപേക്ഷിക്കുന്നത് കൊവിഡ് രോഗ പ്രതിരോധത്തിന് വലിയ തിരിച്ചടിയാണുണ്ടാക്കുക. നിരത്തുകളില്‍ ഉപേക്ഷിക്കപ്പെട്ട മാസ്‌കുകള്‍ ഇന്ന് സാധാരണ കാഴ്ചയായി മാറിയിരിക്കുന്നു. തൃശൂരില്‍ നിയമ ലംഘകര്‍ക്കെതിരായ നിരീക്ഷണം പൊലീസ് ശക്തമാക്കി.
രോഗ വ്യാപനം തുടരുമ്പോഴും മാസ്‌ക് വഴിയരികില്‍ ഉപേക്ഷിക്കുന്ന രീതി തുടരുകയാണ്. ഇവ നശിപ്പിക്കുന്നത് സംബന്ധിച്ച് സര്‍ക്കാര്‍ നിര്‍ദേശമുണ്ടായിട്ടും പലരും പാലിച്ചിട്ടുമില്ല. തൃശ്ശൂര്‍ സ്വരാജ് റൗണ്ടിന് ചുറ്റും മാത്രം കഴിഞ്ഞ ദിവസം അന്‍പതോളം മാസ്‌കുകളാണ് കണ്ടെത്തിയത്. മാസ്‌ക് നശിപ്പിക്കുന്നതിനെക്കുറിച്ചുള്ള അജ്ഞതയും ഇതിന് പ്രധാന കാരണമാണ്. നഗരത്തിലെ വിവിധ ഭാഗങ്ങളിലുള്ള ക്യാമറകളിലൂടെ പൊലീസ് നിരീക്ഷണം ശക്തമാക്കി. നഗര പരിധിയില്‍ മാത്രം കൊവിഡ് പ്രതിരോധത്തില്‍ വീഴ്ച വരുത്തിയവര്‍ക്കെതിരെ 13,000ത്തില്‍ അധികം കേസുകള്‍ റജിസ്റ്റര്‍ ചെയ്തു.
തദ്ദേശ സ്വയം ഭരണ സ്ഥാപനങ്ങളുടെ നേതൃത്വത്തില്‍ മാസ്‌കുകള്‍ ശേഖരിച്ച് നശിപ്പിക്കണമെന്ന ആവശ്യം ശക്തമാവുകയാണ്. ഇപ്പോള്‍ തന്നെ ഇത്തരം നടപടികള്‍ വൈകിയെന്നാണ് ആരോഗ്യ വിദഗ്ധര്‍ അഭിപ്രായപ്പെടുന്നത്.
എല്ലാം ഉദ്യോഗസ്ഥരുടെയും സന്നദ്ധ പ്രവര്‍ത്തകരുടെയും ചുമതലയാണെന്നും പറഞ്ഞു ഒഴിഞ്ഞു മാറാവുന്ന ഒരു സാഹചര്യമല്ല നിലവിലുള്ളത്. ഓരോ വ്യക്തിയും സ്വയം പ്രതിരോധം തീര്‍ക്കുകയും സുരക്ഷാ മുന്‍കരുതലുകള്‍ സ്വീകരിക്കുകയും ചെയ്യേണ്ടത് അനിവാര്യമാണെന്ന ഓര്‍മ്മപ്പെടുത്തലുകള്‍ നിരന്തരം ഉണ്ടാവുമ്പോഴും നമുക്കു ചുറ്റും കാണാന്‍ സാധിക്കുന്നത് വഴിയരികില്‍,പെട്ടിക്കടകള്‍ക്കരികില്‍, ഇപ്പോഴും കൂട്ടം കൂടി നില്കുന്നവരെയും മാസ്‌ക് അലക്ഷ്യമായി വലിച്ചെറിയുന്നവരെയും ,മാസ്‌ക് ഇപ്പോഴും ഉപയോഗിക്കാത്തവരെയും ,സാമൂഹിക അകലം എന്നത് ജലരേഖയാക്കുന്നവരെയും ഒക്കെ ആണ് എന്നത് ആശങ്കകള്‍ക്ക് ഇട നല്‍കുന്നുണ്ട്..
https://www.facebook.com/Malayalivartha
