സ്വര്‍ണക്കടത്ത് കേസിലെ മുഖ്യപ്രതികളായ സ്വപ്‌ന സുരേഷും സന്ദീപും കുറ്റം സമ്മതിച്ചതായി എന്‍ഐഎ. സ്വര്‍ണക്കടത്തിന്റെ മുഖ്യകണ്ണി റമീസാണെന്നും റിമാന്‍ഡ് റിപ്പോര്‍ട്ടില്‍ എന്‍ഐഎ വ്യക്തമാക്കുന്നു. പിടിയിലാകുന്നതിന് മുമ്പ് പ്രതികള്‍ ടെലഗ്രാം, വാട്‌സ് ആപ്പ് എന്നിവയിലൂടെ അയച്ച സന്ദേശങ്ങള്‍ ഡിലീറ്റ് ചെയ്തിരുന്നതായും എന്‍ഐഎ കണ്ടെത്തി.

ലോക്ഡൗണ്‍ സമയത്തെ രാജ്യത്തെ സ്ഥിതികള്‍ ഉപയോഗപ്പെടുത്തി കൂടുതല്‍ സ്വര്‍ണം രാജ്യത്തേക്ക് കൊണ്ടുവരുന്നതിന് മുൻകൈയെടുത്തത് റമീസാണ് എന്നും റിപ്പോർട്ടിൽ വ്യക്തമാക്കുന്നു. ഈ ആശയം മുന്നോട്ടുവെച്ചത്‌ ഇയാളാണെന്നാണ് സന്ദീപിൻറെ വെളിപ്പെടുത്തൽ. വിദേശത്തുള്ള കള്ളക്കടത്ത് സംഘങ്ങളുമായി റമീസിന് അടുത്ത ബന്ധമുണ്ടെന്നും റിമാന്‍ഡ് റിപ്പോര്‍ട്ടില്‍ പറയുന്നു.

ആറ് മൊബൈല്‍ ഫോണുകളും ലാപ്‌ടോപ്പുമാണ് സ്വപ്‌ന സുരേഷില്‍നിന്ന് എന്‍ഐഎ പിടിച്ചെടുത്തത്. ഇവ വിശദമായി പരിശോധിച്ചു. ഇതില്‍ രണ്ട് മൊബൈല്‍ ഫോണുകൾ ഫേസ് ലോക്ക് ചെയ്തിട്ടുള്ളവയാണ്. ഇവ രണ്ടും സ്വപ്‌നയുടെ സാന്നിധ്യത്തില്‍ തുറന്ന് പരിശോധിച്ചു. ഇതില്‍ ഇവരുടെ സമൂഹമാധ്യമ അക്കൗണ്ടുകള്‍ വിശദമായി പരിശോധിച്ചു.

സ്വര്‍ണം കസ്റ്റംസ് തടഞ്ഞുവെക്കുന്നതു മുതല്‍ ഇവര്‍ പിടിയിലാകുന്നതിന് മുമ്പുവരെയുള്ള സന്ദേശങ്ങള്‍ ടെലഗ്രാം, വാട്ട്‌സ് ആപ്പ് അക്കൗണ്ടുകളില്‍ ഉണ്ടായിരുന്നു. ഇതില്‍ സുപ്രധാനമായ ചാറ്റുകള്‍ ഇവര്‍ ഡിലീറ്റ് ചെയ്തിരുന്നു. ഇവ വീണ്ടെടുക്കാനുള്ള ശ്രമങ്ങള്‍ നടന്നുവരികയാണ്. സ്വപ്‌ന സുരേഷ് യുഎഇ പ്രതിനിധിയുമായി നടത്തിയ ചാറ്റുകളും അന്വേഷണ സംഘം കണ്ടെത്തിയിട്ടുണ്ട്.

ആദ്യമായാണ് ഇത്രയും വലിയ അളവില്‍ സ്വര്‍ണം കേരളത്തിലേക്ക് കടത്തുന്നത്. 30 കിലോ സ്വര്‍ണമാണ് ഇവര്‍ കടത്തിയത്. സ്വര്‍ണക്കടത്തിന്റെ സാമ്പത്തികവശങ്ങള്‍ കൈകാര്യം ചെയ്തിട്ടുള്ളത് കെ.ടി, റമീസും അതോടൊപ്പം മുവാറ്റുപുഴ സ്വദേശികളായ ജലാല്‍ അടക്കമുള്ളവരുമാണ്. കള്ളക്കടത്തിലൂടെ ഇവര്‍ സമ്പാദിച്ച തുക ഭീകരവാദ പ്രവര്‍ത്തനങ്ങള്‍ക്ക് ഉപയോഗിച്ചുവെന്ന് സംശയമുണ്ടെന്നും റിമാന്‍ഡ് റിപ്പോര്‍ട്ടില്‍ പറയുന്നു.

സ്വപ്‌ന സുരേഷ് സ്വര്‍ണക്കടത്തുവഴി ലഭിച്ച പണം പല രൂപത്തിലാണ് നിക്ഷേപിച്ചത്. ബാങ്കിലും അല്ലാതെയുമുള്ള നിക്ഷേപങ്ങള്‍ സംബന്ധിച്ച വിവരങ്ങളും ഇവര്‍ എന്‍ഐഎയ്ക്ക് നല്‍കി. ഇക്കാര്യങ്ങള്‍ പരിശോധിച്ച് വരികയാണെന്നും എൻ.ഐ.എ പറയുന്നു. ഇതിനുപുറമേ വിവിധ ലോക്കറുകളില്‍ സ്വര്‍ണവും പണവും സൂക്ഷിച്ചിട്ടുണ്ടെന്നും ഇവ പരിശോധിക്കുകയാണെന്നും റിമാന്‍ഡ് റിപ്പോര്‍ട്ടിൽ വ്യക്തമാക്കി. സ്വപ്നയ്ക്ക് ആറ് ഫോണുകളും രണ്ട് ലാപ് ടോപ്പുകളുമാണ് ഉളളത്. ഇതില്‍ രണ്ട് ഫോണുകള്‍ ഫേസ് ലോക്ക് ഉപയോഗിച്ച്‌ തുറന്നിട്ടുണ്ട്. ഇതില്‍ സ്വര്‍ണക്കടത്തിന്റ വിശദാംശങ്ങളാണ് ഉളളത്.