ഈ കോവിഡ് കാലത്ത് കുട്ടികളുടെ വിദ്യാഭ്യാസം തടസപ്പെടാതിരിക്കാനായി സർക്കാർ കൊണ്ടുവന്ന സംവിധാനമാണ് വിക്ടേഴ്‌സ് ചാനൽ വഴിയുള്ള ഓൺലൈൻ വിദ്യാഭ്യാസം. എന്നാൽ ഓൺലൈൻ വിദ്യാഭ്യാസത്തിന് കഴിയാത്ത നിരവധികുട്ടികൾ ഇപ്പോഴും നമ്മുടെ നാട്ടിലുണ്ടെന്ന കാര്യം യാഥാർഥ്യമാണ്. 

വീടുകളില്‍ വൈദ്യുതി ഇല്ലാത്ത കാരണത്താൽ ഓണ്‍ലൈന്‍ വിദ്യാഭ്യാസം നിഷേധിക്കപ്പെട്ട 24 കുട്ടികളാണ് അട്ടപ്പാടി കുടിയേറ്റഗ്രാമമായ കുറുക്കന്‍കുണ്ടിലുള്ളത്. കേരളത്തിലെ ഭൂരിഭാഗം വരുന്ന വിദ്യാര്‍ത്ഥികള്‍ ഓണ്‍ലൈന്‍ വിദ്യാഭ്യാസം ഉപയോഗപ്പെടുത്തുമ്പോൾ തങ്ങള്‍ക്ക് അത് നിഷേധിക്കപ്പെടുന്നതിനെതിരെ വീട്ടുമുറ്റത്ത് സമരത്തിനിറങ്ങിയിരിക്കുകയാണ് ഇവര്‍.

വൈദ്യുതിയ്ക്കും മറ്റ് അടിസ്ഥാന സൗകര്യങ്ങള്‍ക്കുംവേണ്ടി കുറുക്കന്‍കുണ്ടിലെ ഇരുപത്തിയേഴ് കുടുംബങ്ങള്‍ പല സര്‍ക്കാര്‍ ഓഫീസുകളിലും കയറിയിറങ്ങുകയാണ്. എന്നാല്‍ ആറ് പതിറ്റാണ്ടായി കൈവശമുള്ള ഭൂമിയില്‍ വൈദ്യുതിയും, വെള്ളവും, വഴിയും ലഭിക്കാന്‍ തടസമാവുന്നത് വനംവകുപ്പ് തന്നെയാണെന്നാണ് ഇവര്‍ പറയുന്നത്. വനത്താല്‍ ചുറ്റപ്പെട്ട കുറുക്കന്‍കുണ്ടിലേക്ക് എത്തണമെങ്കില്‍ സാമൂഹിക വനത്തിലൂടെയുള്ള റോഡിലൂടെ സഞ്ചരിക്കണം. എന്നാല്‍ ഈ ഭൂമി വനം വകുപ്പിന്റെതാണെന്ന് പറഞ്ഞുകൊണ്ടാണ് ഇതിലെ റോഡ് ടാറ് ചെയ്യാനോ, വൈദ്യുതി ലൈന്‍ എടുക്കാനോ അവര്‍ അനുവദിക്കുന്നില്ലെന്നാണ് പ്രദേശവാസികള്‍ പറയുന്നത്.

ഇക്കാലമത്രയും ഈ ഗ്രാമത്തിലെ കുട്ടികള്‍ ഏഴ്കിലോമീറ്റര്‍ നടന്നാണ് സ്‌കൂളുകളില്‍ പോയിരുന്നത്. ഒന്നാം ക്ലാസ് മുതല്‍ പീജി വരെ പഠിക്കുന്ന കുട്ടികള്‍ ഇവിടെയുണ്ട്. ഓണ്‍ലൈന്‍ പഠനംമാത്രം സാധ്യമാവുന്ന ഈ കൊറോണക്കാലത്ത് ഈ കുട്ടികൾക്ക് അവരുടെ പഠനത്തിനുള്ള അവകാശം ലഭിക്കാതെ പോകുകയാണ്. കൈയ്യിലുള്ള മൊബൈല്‍ ഫോണുകള്‍ ചാര്‍ജ് ചെയ്യാന്‍പോലും നാല് കിലോമീറ്റര്‍ അപ്പുറമുള്ള വീടുകളില്‍ പോവേണ്ട അവസ്ഥയാണ്.

ജില്ലാ കളക്ടര്‍ക്കും ജില്ലയിലെ ജനപ്രതിനിധികള്‍ക്കും വിദ്യാഭ്യാസ വകുപ്പിനും വിദ്യാര്‍ത്ഥികള്‍തന്നെ തങ്ങളുടെ പ്രശ്‌നങ്ങള്‍ അറിയിച്ച്‌ പരാതി നല്‍കിയിരുന്നു. എന്നാല്‍ പരാതികള്‍ അവഗണിക്കപ്പെട്ടപ്പോഴാണ് ഇവിടുത്തെ വിദ്യാര്‍ത്ഥികള്‍ സമരത്തിനായി മുന്നിട്ടിറങ്ങിയത്. തങ്ങള്‍ക്ക് പഠിക്കാന്‍ വൈദ്യുതി വേണമെന്ന് ആവശ്യപ്പെട്ട് അഗളി കെഎസ്‌ഇബി ഓഫീസിന് മുന്‍പില്‍ സമരം ചെയ്യുന്നതിനുള്ള അനുവാദത്തിനായി പോലീസ് സ്‌റ്റേഷനില്‍ എത്തിയെങ്കിലും ഹൈക്കോടതി 31വരെ സമരങ്ങള്‍ വിലക്കിയിരിക്കുന്നതിനാൽ ആ വഴിയും അടഞ്ഞു. .

ഇതേതുടര്‍ന്ന് വീടിന് മുന്‍പില്‍ നിരാഹാരം ഇരിക്കാന്‍ ഇവര്‍ തീരുമാനിക്കുകയായിരുന്നു. വീടിന് മുന്‍പിലെ ചുമരുകളില്‍ വിദ്യാഭ്യാസ വകുപ്പ്, വൈദ്യുതി വകുപ്പ് എന്നൊക്കെ എഴുതി ഒട്ടിച്ച്‌, ഇരുട്ടല്ല വെളിച്ചമാണ് ആവശ്യം. 'അജ്ഞതയല്ല അറിവാണ് ആവശ്യം. ഞങ്ങളും കുട്ടികളാണ് ഞങ്ങള്‍ക്കും പഠിക്കണം' തുടങ്ങിയ പ്ലാക്കര്‍ഡുകളും പിടിച്ച്‌ അവര്‍ സമരം ആരംഭിക്കുകയിരുന്നു.