ഓരോ നാള്‍ കഴിയും തോറും സ്വര്‍ണക്കടത്തിന്റെ അമ്പരപ്പിക്കുന്ന വിവരങ്ങളാണ് പുറത്ത് വരുന്നത്. നയതന്ത്ര ചാനലിലൂടെ സ്വര്‍ണം കടത്തിയ കേസിലെ രണ്ടാം പ്രതി സ്വപ്‌ന സുരേഷ് കള്ളക്കടത്തിലൂടെ നേടിയ വന്‍ സമ്പത്ത് ഭീകര പ്രവര്‍ത്തനത്തിന് ഉപയോഗിച്ചതായുള്ള എന്‍ഐഎയുടെ സൂചന എല്ലാവരേയും അമ്പരപ്പിലാക്കിയിരിക്കുകയാണ്. അതേസമയം ഇത് പുതിയ രാഷ്ട്രീയ വിവാദത്തിന് കളമൊരുക്കുകയാണ്. സ്വപ്‌ന സുരേഷിനെയും നാലാംപ്രതി സന്ദീപ് നായരെയും ഇന്നലെ എന്‍.ഐ.എ കോടതിയില്‍ ഹാജരാക്കിയപ്പോള്‍ സമര്‍പ്പിച്ച കസ്റ്റഡി റിപ്പോര്‍ട്ടിലാണ് അമ്പരപ്പിക്കുന്ന വിവരമുള്ളത്. സ്വപ്നയ്ക്ക് ബാങ്കുകളിലും മറ്റിടപാടുകളിലുമായി വന്‍ സാമ്പത്തിക നിക്ഷേപമുണ്ടെന്നും കള്ളക്കടത്തിലൂടെ ലഭിച്ച സമ്പത്ത് പലമാര്‍ഗങ്ങളിലൂടെ ഭീകരപ്രവര്‍ത്തനങ്ങള്‍ക്കു ഫണ്ട് ചെയ്യാന്‍ ഉപയോഗിച്ചതായി സംശയിക്കുന്നുവെന്നും കസ്റ്റഡി റിപ്പോര്‍ട്ടില്‍ പറയുന്നു.

ഇതോടെ ഉന്നതങ്ങളിലെ സ്വാധീനത്തിന്റെ മറവില്‍ നയതന്ത്രചാനലിലൂടെ വരെ സ്വര്‍ണം കടത്തിയും മറ്റും സമ്പത്ത് വാരിക്കൂട്ടിയ സ്വപ്നയുടെയും കൂട്ടാളികളുടെയും ഭീകരബന്ധങ്ങളിലേക്കാണ് എന്‍. ഐ. എ അന്വേഷണം എത്തുന്നത്.രാജ്യത്തിന്റെ സാമ്പത്തിക സുരക്ഷയെ തകര്‍ക്കുന്ന വന്‍ സ്വര്‍ണക്കടത്താണ് പ്രതികള്‍ നടത്തിയിരുന്നത്. ഇതിന്റെ സൂത്രധാരന്‍ കസ്റ്റംസ് അറസ്റ്റുചെയ്ത പെരിന്തല്‍മണ്ണ സ്വദേശി കെ.ടി. റമീസാണ്. ഇയാളെ കോടതിയുടെ അനുമതിയോടെ എന്‍.ഐ.എ അറസ്റ്റുചെയ്ത് ചോദ്യംചെയ്യും.

സ്വര്‍ണ്ണക്കടത്ത് യു.എ.ഇയുമായുള്ള നയതന്ത്ര ബന്ധത്തിനും ഇന്ത്യയുടെ സാമ്പത്തിക സുരക്ഷയ്ക്കും പ്രത്യാഘാതമുണ്ടാക്കും. മറ്റു പ്രതികളെയും കള്ളക്കടത്തിന്റെ നേട്ടം ലഭിച്ചവരെയും കണ്ടെത്തണം. ഈ നിരീക്ഷണങ്ങളുമുണ്ടായിരുന്നു. ചോദ്യംചെയ്യലും തെളിവെടുപ്പും പൂര്‍ത്തിയാകാത്തതിനാല്‍ രണ്ടു പ്രതികളെയും കോടതി ജൂലായ് 24 വരെ വീണ്ടും എന്‍.ഐ.എയുടെ കസ്റ്റഡിയില്‍ വിട്ടു.

വിവിധ ബാങ്കുകളുടെ ലോക്കറുകളില്‍ സ്വപ്ന പണവും ആഭരണങ്ങളും സൂക്ഷിച്ചിട്ടുണ്ടെന്നാണ് സ്വപ്നയുടെ കസ്റ്റഡി റിപ്പോര്‍ട്ടില്‍ പറയുന്നത്. അക്കൗണ്ട് വിവരങ്ങള്‍ ശേഖരിച്ച് അന്വേഷണം പുരോഗമിക്കുന്നു. ബാങ്കിംഗ് ഇതര മേഖലയിലും സ്വപ്നയ്ക്ക് നിക്ഷേപമുണ്ട്. സ്വപ്നയില്‍ നിന്നും ആറ് മൊബൈല്‍ ഫോണുകളും രണ്ട് ലാപ് ടോപ്പുകളും പിടിച്ചെടുത്തു. രണ്ട് മൊബൈലുകള്‍ തുറന്ന് വാട്ട്‌സ് ആപ്പ് പരിശോധിച്ചു.

ഡിപ്‌ളോമാറ്റിക് ബാഗിനെ പറ്റി ഒന്നാം പ്രതി സരിത്ത്, കോണ്‍സുലേറ്റ് അധികൃതര്‍ എന്നിവരുമായി നടത്തിയ ചാറ്റിന്റെ വിവരങ്ങള്‍ ലഭിച്ചു. നീക്കിയ ചാറ്റുകള്‍ ഡിജിറ്റല്‍ ഫോറന്‍സിക് അനാലിസിസിലൂടെ വീണ്ടെടുക്കാന്‍ സി ഡാക്കിന് കൈമാറാന്‍ കോടതിയില്‍ സമര്‍പ്പിച്ചു. ഇമെയില്‍ വിവരങ്ങളും ഫേസ്ബുക്ക്, ടെലിഗ്രാം, ഇന്‍സ്റ്റഗ്രാം അക്കൗണ്ട് വിവരങ്ങളും സ്വപ്ന കൈമാറി. സ്വപ്നയും സന്ദീപും മറ്റു പ്രതികളും കേരളത്തില്‍ എവിടെയെല്ലാം ഗൂഢാലോചന നടത്തിയെന്നും എവിടെയെല്ലാം ബാഗുകള്‍ സ്വീകരിച്ചെന്നും വെളിപ്പെടുത്തിയിട്ടുണ്ട്. ഇവ പരിശോധിച്ച് കൂടുതല്‍ തെളിവുകള്‍ കണ്ടെത്തി വീണ്ടും ചോദ്യംചെയ്യണം.

തിരുവനന്തപുരത്ത് 11 സ്ഥലങ്ങളിലാണ് 18 ന് തെളിവെടുത്തത്. പ്രതികളുടെ ചിത്രങ്ങളുണ്ടെന്ന് സംശയിക്കുന്ന ഡിജിറ്റല്‍ വീഡിയോ റെക്കാര്‍ഡര്‍ കണ്ടെടുത്തു. സോഷ്യല്‍ മീഡിയ വിവരങ്ങളും ശേഖരിച്ചിട്ടുണ്ട്. എറണാകുളത്ത് സ്വപ്നയ്‌ക്കൊപ്പം ഒളിവില്‍ കഴിഞ്ഞ സ്ഥലം വെളിപ്പെടുത്തി. ഇവിടെ നാലിടങ്ങളിലായി 20ന് തെളിവെടുത്തു. ഇലക്‌ട്രോണിക് ഉപകരണങ്ങളും പിടിച്ചെടുത്തു.

ലോക്ക് ഡൗണില്‍ രാജ്യത്തിന്റെ സാമ്പത്തികസ്ഥിതി ദുര്‍ബലമായതിനാല്‍ പരമാവധി തവണകളിലായി വന്‍തോതില്‍ സ്വര്‍ണം കടത്താന്‍ റമീസ് നിര്‍ബന്ധിച്ചുവെന്നും വെളിപ്പെടുത്തി. റമീസ് എപ്പോഴും ഒരു സംഘത്തിനൊപ്പമായിരുന്നു. ഇയാളുടെ ആജ്ഞയ്ക്കനുസരിച്ചാണ് കാര്യങ്ങള്‍ നടന്നത്. അതിനാല്‍ റമീസിനെ കൂടി എന്‍.ഐ.എയുടെ കേസില്‍ ഉള്‍പ്പെടുത്തും. ഇതോടെ കൂടുതല്‍ അന്വേഷണത്തിന് എന്‍ഐഎ കോടതി അനുമതി നല്‍കുകയായിരുന്നു.