ലോകമെമ്പാടും കൊറോണ വൈറസ് താണ്ഡവമാടിയപ്പോഴും മഹാരാഷ്ട്രയും ഡൽഹിയും തമിഴ്നാടും കോവിഡിൽ വിറച്ചപ്പോഴും കേരളം മഹാമാരിക്കു മുന്നിൽ തലയുയർത്തി നിന്ന കാഴ്ചയായിരുന്നു ഈ മാസം തുടക്കം വരെ.

കേരള മോഡലിനെ എല്ലാവരും വാനോളം പുകഴ്ത്തി. കേരളത്തിന്റെ കോവിഡ് പ്രതിരോധം മാതൃകയാക്കണമെന്ന് ലോകാരോഗ്യ സംഘടന വരെ പറഞ്ഞുവെച്ചു . കേരളത്തിന്റെ ആരോഗ്യരംഗത്തെ ലോകനെറുകയിലെത്തിച്ച മന്ത്രി കെ.കെ.ശൈലജയ്ക്കു ഐക്യരാഷ്ട്രസഭയുടെ വെബിനാറിലും ക്ഷണം ലഭിച്ചു. ലോകം മുഴുവനും വാഴ്ത്തിപ്പാടിയ കേരളം ഇപ്പോൾ സമ്പർക്കവ്യാപനം തടയാനാകാതെ പകച്ചുനിൽക്കുന്നതാണ് ഇപ്പോൾ കാണുന്നത് ..കീം പരീക്ഷ എഴുതിയ വിദ്യാർത്ഥികൾക്ക് വരെ കോവിഡ് ബാധിച്ചതും കേരളം കണ്ടു

വുഹാനിൽനിന്ന് കേരളത്തിലെത്തിയ മെഡിക്കൽ വിദ്യാർഥിക്കാണ് ഇന്ത്യയിലെ ആദ്യത്തെ കോവിഡ് രോഗം സ്ഥിരീകരിച്ചത്. 2020 ജനുവരി 30-ന് തൃശൂരിൽ ആണ് ആദ്യ കേസ് സ്ഥിരീകരിച്ചത് .. അന്ന് മുതൽ തന്നെ കേസുകളുടെ എണ്ണം വർധിക്കുകയായിരുന്നു. മാർച്ചിൽ മറ്റു സംസ്ഥാനങ്ങളിൽ വലിയതോതിൽ കോവിഡ് കേസുകൾ റിപ്പോർട്ട് ചെയ്യപ്പെടാൻ തുടങ്ങി.

മാർച്ച് 23ന് പ്രധാനമന്ത്രി നരേന്ദ്ര മോദി സമ്പൂർണ ലോക്ഡൗൺ പ്രഖ്യാപിക്കുമ്പോൾ 91 സജീവ കോവിഡ് രോഗികൾ മാത്രമാണ് കേരളത്തിൽ ഉണ്ടായിരുന്നത്. ഒരു ദിവസം രോഗം സ്ഥിരീകരിക്കുന്നവർ 28 പേരും.

മേയ് മാസത്തോടെ കൃത്യമായ പരിശോധന, ഐസലേഷൻ തുടങ്ങിയ മാർഗങ്ങളിലൂടെ കേരളത്തിന് പുതിയ കേസുകൾ കുറച്ചുകൊണ്ടുവരാനായി. പുതിയ കേസുകൾ ഒരെണ്ണം പോലുമില്ലാത്ത ദിവസങ്ങളും കേരളത്തിനുണ്ടായി. കേരളം ‘കർവ് ഫ്ലാറ്റൻ’ ചെയ്യുകയാണെന്നതിനെക്കുറിച്ചും ചർച്ചകൾ നടന്നു. ‘വലിയ അദ്ഭുതമാണ് കേരളം നേടിയതെന്ന് ലോകാരോഗ്യ സംഘടനാ വരെ അനുമോദിച്ചു

പക്ഷെ വളരെ പെട്ടെന്ന് തന്നെ കാര്യങ്ങൾ കൈവിട്ടു പോകുന്ന കാഴ്ചയാണ് വരും നാളുകളിൽ കേരളം കണ്ടത് ..ജൂലൈ 21 വൈകിട്ടുള്ള കോവിഡ് അവലോകന കണക്കു പരിശോധിക്കുമ്പോൾ 8,056 പേരാണ് കോവിഡ് ബാധിച്ചു ചികിൽസയിൽ കഴിയുന്നത്. ജൂലൈ 21 ന് മാത്രം രോഗം സ്ഥിരീകരിച്ചത് 720 പേർക്കും .

മേയ് 24ന് സംസ്ഥാനമൊട്ടാകെയുള്ള കണക്കുകൾ പരിശോധിക്കുമ്പോൾ അഞ്ചുപേർക്കു മാത്രമാണ് സമ്പർക്കത്തിലൂടെ രോഗബാധ കണ്ടെത്തിയിരുന്നത്. ഈ മാസം ഒന്നിന് 16 പേർക്കു മാത്രമായിരുന്നു സമ്പർക്കത്തിലൂടെ രോഗം പകർന്നത്. എന്നാൽ ജൂലൈ 21 ലെ കണക്കുകൾ പ്രകാരമുള്ള 720 പ്രതിദിന രോഗികളിൽ 583 പേർക്കും രോഗബാധ സമ്പർക്കത്തിലൂടെയാണ്

തിരുവനന്തപുരത്ത് പൂന്തുറയിലും പുല്ലുവിളയിലും സമൂഹവ്യാപനം നടന്നുവെന്ന് മുഖ്യമന്ത്രി പിണറായി വിജയൻ തന്നെ തുറന്നു സമ്മതിച്ചു. ഇതിനും ദിവസങ്ങൾക്കു മുൻപുതന്നെ കേരളത്തിൽ സമൂഹവ്യാപനമുണ്ടെന്ന ഐഎംഎ റിപ്പോർട്ട് നൽകിയിരുന്നു. എന്നാൽ അത് അംഗീകരിക്കാൻ സർക്കാർ തയ്യാ റായിരുന്നില്ല

കേരളത്തിലെ കോവിഡ് കേസുകൾ വർധിക്കാൻ കാരണമായി ചൂണ്ടിക്കാട്ടുന്നവയിലൊന്ന് പ്രവാസികളുടെ മടങ്ങിവരവാണ്. ഗൾഫിൽനിന്നും ഇന്ത്യയിലെ മറ്റു സ്ഥലങ്ങളിൽനിന്നും ലക്ഷക്കണക്കിനുപേർ കേരളത്തിലേക്കു തിരിച്ചുവന്നു..

തുടക്കം മുതൽ സാഹചര്യം നന്നായി കൈകാര്യം ചെയ്തിരുന്ന സംസ്ഥാന സർക്കാരിന് പ്രവാസികളുടെയും ഇതര സംസ്ഥാന മലയാളികളുടെയും തിരിച്ചുവരവോടെ അടിപതറുകയായിരുന്നുവെന്നാണു വിലയിരുത്തൽ. തിരികെ എത്തുന്ന പ്രവാസികൾക്ക് നിർബന്ധിത ക്വാറന്റീൻ എന്ന നിർദേശം നടപ്പാക്കാൻ കഴിഞ്ഞിരുന്നില്ല. സർക്കാർ ക്വാറന്റീന്‍ എന്ന പദ്ധതിയും പാളിയതോടെ സർക്കാർ വിഷമവൃത്തത്തിലാവുകയായിരുന്നു

അതിനുപിന്നാലെ ജൂൺ 14ന് ഹോം ക്വാറന്റീനിലുണ്ടായിരുന്ന 2,42,767 പേരിൽ 1,22,040 പേർ ഒറ്റദിവസം ക്വാറന്റീൻ പൂർത്തിയാക്കി ഇറങ്ങിയിരുന്നു. അന്ന് കേരളത്തിലുണ്ടായിരുന്ന സമ്പർക്ക രോഗികൾ വെറും മൂന്ന് പേരായിരുന്നു .

എന്നാൽ ദിവസങ്ങൾ പിന്നിട്ടതോടെ സമ്പർക്ക രോഗികളുടെ എണ്ണം അനിയന്ത്രിതമായ വർധിച്ചുവെന്ന് കണക്കുകൾ വ്യക്തമാക്കുന്നു. പുറത്തിറങ്ങിയ ഒന്നേകാൽ ലക്ഷത്തോളം പേരുടെയും സ്രവസാംപിളുകള്‍ പരിശോധിച്ചിരുന്നില്ലെന്നാണു വിവരം. അതിനാൽതന്നെ ഇവരിൽ രോഗികൾ ഉണ്ടായിരുന്നോ എന്നത് വ്യക്തമല്ല..ലോക്ഡൗണിൽ ഇളവ് അനുവദിച്ചപ്പോൾ കൃത്യമായ മുൻകരുതലുകളില്ലാതെ ജനങ്ങൾ വീടിനു പുറത്തിറങ്ങിയത് കാര്യങ്ങൾ വഷളാക്കി

കൂടാതെ ഇളവുകൾ കൊടുത്തത് പലതും ദുരുപയോഗം ചെയ്യുകയാണ്. കുത്തഴിഞ്ഞ നിലയിലാണ് കാര്യങ്ങൾ പോകുന്നത്. പൗരബോധത്തോടകൂടി എല്ലാവരും പെരുമാറണം. ഓരോ വ്യക്തിയും മുൻകരുതലുകൾ അവരുടെ ഉത്തരവാദിത്തം എന്നു വിചാരിക്കണം.

ജനപ്രതിനിധികൾ മാസ്ക് വച്ചാൽ ജനവും അതിനു തയാറാകും. മുഖ്യമന്ത്രിയും മന്ത്രിമാരുമടക്കം എല്ലാവരും മാസ്ക് വയ്ക്കാൻ തയാറാകണം. സമരങ്ങൾ കോടതി പറഞ്ഞിട്ടല്ല നിർത്തേണ്ടത്. നമുക്ക് സ്വയം ബോധമുണ്ടായാൽ സമരങ്ങൾ നടത്താൻ പോലും ആരും തയാറാകില്ലെന്നും ഐഎംഎ പ്രസി‍ഡന്റ് എബ്രഹാം വർഗീസ് പറയുന്നു

അകലം പാലിക്കുക, മാസ്ക് ധരിക്കുക തുടങ്ങിയ മുൻകരുതലുകൾ എടുക്കണം. ഓരോ പ്രദേശങ്ങളിലായി നിയന്ത്രണങ്ങൾ കടുപ്പിക്കുകയാണ്. ഒരു ലോക്ഡൗണ്‍ കഴിഞ്ഞയുടൻ മറ്റൊരു ലോക്ഡൗൺ എന്നത് ഒരിക്കലും നടക്കില്ല. അത് സാമ്പത്തികമായി വലിയ പ്രതിസന്ധിയിലേക്ക് നയിക്കും.

മൊത്തത്തിൽ കേരളം മികച്ച സേവനമാണ് നടത്തിയിട്ടുള്ളതെന്നാണ് മിക്ക എപ്പിഡെമിയോളജിസ്റ്റുകളും വിശ്വസിക്കുന്നത്. പോസിറ്റീവ് ആകുന്നവരുടെ എണ്ണം നോക്കുമ്പോൾ കേരളത്തിലെ മരണനിരക്ക് കുറവാണ്. ഇന്ത്യയിലെ ഏറ്റവും കുറവ് മരണനിരക്ക് കേരളത്തിലാണ്. ആശുപത്രികളിൽ രോഗികളുടെ തള്ളിക്കയറ്റമില്ല. ഇന്ത്യയിലെ ഏറ്റവും മികച്ച പൊതു ജനാരോഗ്യ സംവിധാനമാണ് കേരളത്തിനുള്ളത്.

കർവ് ഫ്ലാറ്റൻ ചെയ്യുക എന്നത് ദീർഘനാളെടുത്തും പരിശ്രമിച്ചും ചെയ്യേണ്ട ജോലിയാണ്. ‘കോവിഡിനെ നേരിടുക എന്നാൽ ട്രെഡ് മില്ലിൽ സ്പീഡ് കൂട്ടി ഓടുന്നതുപോലെയാണ്. വൈറസിനെ മെരുക്കാൻ വളരെ വേഗത്തിൽ ഓടണം. അതു ശ്രമകരമാണ്. പക്ഷേ വേറേ വഴിയില്ല

കോവിഡിനെതിരെ വേണ്ടത് കരുതലും ജാഗ്രതയും ആണ്.. അത്യാവശ്യത്തിനു മാത്രം വീടിനു പുറത്തിറങ്ങാം. പൊതുവിടങ്ങളിൽ രണ്ടു മീറ്ററെങ്കിലും അകലം പാലിക്കാം, മാസ്കും കൈ കഴുകലും ശീലമാക്കാം, മഹാമാരിയെ നമുക്ക് ഒറ്റക്കെട്ടായി പ്രതിരോധിക്കേണ്ടതുണ്ട് . ആരോഗ്യസംബന്ധമായ സഹായങ്ങൾക്ക് സംസ്ഥാന ആരോഗ്യ വകുപ്പിന്റെ ദിശ ടോൾ ഫ്രീ നമ്പർ 1056 ൽ ബന്ധപ്പെടാം