ഒന്ന് ഒച്ചവച്ചിരുന്നെങ്കില്‍... സ്വര്‍ണക്കടത്ത് കേസില്‍ തനിക്ക് യാതൊരു പങ്കുമില്ലെന്ന് ആണയിടുന്ന സ്വപ്ന സുരേഷിനെതിരെ ഗുരുതര സാമ്പത്തിക കുറ്റം ചുമത്തുന്നു; ഒരുകോടി രൂപയ്ക്ക് മേല്‍ കള്ളക്കടത്ത് നടത്തുന്നവര്‍ക്കെതിരെ ചുമത്തുന്ന കൊഫെപൊസയും ചുമത്തും; ഇതോടെ സര്‍വതും കൈവിട്ടു പോകും
സ്വര്‍ണക്കടത്ത് കേസ് അന്വേഷണം നിര്‍ണായക വഴികളിലൂടെയാണ് സഞ്ചരിക്കുന്നത്. മുഖ്യ പ്രതികളുടെ ഉന്നത ബന്ധം ഉള്‍പ്പെടെയുള്ളവ പുറത്തെത്തിക്കാനുള്ള തീവ്ര ശ്രമത്തിലാണ് അന്വേഷണ സംഘം. അതിനിടെ സ്വപ്ന ഉള്‍പ്പെടെയുള്ള പ്രതികളെ ആശങ്കയിലാക്കി മറ്റൊരു സാമ്പത്തിക കുറ്റം കൂടി ചുമത്തനുള്ള ശ്രമത്തിലാണ് കേന്ദ്രം. നയതന്ത്ര ചാനല്‍ വഴി 15 കോടിയുടെ സ്വര്‍ണം കടത്തിയ കേസിലെ പ്രതികള്‍ക്കെതിരെ കേന്ദ്ര ധനമന്ത്രാലയത്തിന്റെ ഇക്കണോമിക്‌സ് ഇന്റലിജന്‍സ് ബ്യൂറോ കൊഫെപൊസ അഥവാ കണ്‍സര്‍വേഷന്‍ ഒഫ് ഫോറിന്‍ എക്‌സ്‌ചേഞ്ച് ആന്‍ഡ് പ്രിവന്‍ഷന്‍ ഒഫ് സ്മഗ്‌ളിംഗ് ആക്ടിവിറ്റീസ് ആക്ട് ചുമത്തും. ഒരുകോടി രൂപയ്ക്ക് മേല്‍ കള്ളക്കടത്ത് നടത്തുന്നവര്‍ക്കെതിരെയാണ് കൊഫെപൊസ ചുമത്താറ്.
ഇതോടെ സ്വപ്നയും കൂട്ടുകാരും പെട്ടുപോകുന്ന അവസ്ഥയാണുള്ളത്. പ്രതികളുടെ സ്വത്തുക്കള്‍ കണ്ടുകെട്ടുകയും ബാങ്ക് അക്കൗണ്ടുകള്‍ മരവിപ്പിക്കുകയും ചെയ്യാം.
കൊഫെപൊസ പ്രകാരം അറസ്റ്റിലാകുന്നവരെ ഒരു വര്‍ഷംവരെ കരുതല്‍ തടങ്കലില്‍ വയ്ക്കാം. പ്രതികള്‍ക്ക് അപ്പീല്‍ നല്‍കാനാവും. ഹൈക്കോടതിയിലെ മൂന്നു ജഡ്ജിമാര്‍ അംഗങ്ങളായ ഉപദേശക സമിതിക്കാണ് നിവേദനം നല്‍കേണ്ടത്. ഹൈക്കോടതിയില്‍ റിട്ട് ഹര്‍ജിയും ഫയല്‍ ചെയ്യാം. നിവേദനവും ഹര്‍ജിയും തള്ളിയാല്‍ സ്വത്തു കണ്ടെടുക്കുന്നതിനുള്ള നടപടികള്‍ ആരംഭിക്കും. ഉദ്യോഗസ്ഥരുടെയും കടത്തുകാരുടെയും വിദേശ ബന്ധങ്ങളെക്കുറിച്ചും വരുമാന മാര്‍ഗങ്ങളെക്കുറിച്ചും നിലവിലെ സ്വത്തുകള്‍ എങ്ങനെ ലഭിച്ചു എന്നതിനെക്കുറിച്ചും അന്വേഷണം നടത്തും.
നേരത്തേ തിരുവനന്തപുരം വിമാനത്താവളത്തിലൂടെ കോടികളുടെ സ്വര്‍ണം കടത്തിയ കേസില്‍ എയര്‍ കസ്റ്റംസ് സൂപ്രണ്ടായിരുന്ന രാധാകൃഷ്ണനടക്കം ആറു പ്രതികള്‍ക്കെതിരെ കൊഫെപൊസ ചുമത്തിയിരുന്നു.
അതേസമയം സ്വര്‍ണക്കടത്ത് കേസില്‍ അന്വേഷണം ഡിജിറ്റല്‍ വഴിയിലേക്ക് കടക്കുകയാണ്. കേസിലെ നിര്‍ണായക തെളിവുകള്‍ ഇനിയാണ് പുറത്തുവരുക. പ്രതികള്‍ ഉപയോഗിച്ചിരുന്ന സ്മാര്‍ട്ട് ഫോണുകള്‍, ലാപ്‌ടോപ്പ്, ഡിജിറ്റല്‍ വീഡിയോ റെക്കോഡര്‍ എന്നിവയുടെ പരിശോധന ഉടന്‍ നടക്കും. ഗൂഢാലോചന യോഗങ്ങള്‍ രഹസ്യമായി പ്രതികള്‍ പകര്‍ത്തിസൂക്ഷിച്ചിരുന്നെന്ന് എന്‍.ഐ.എ. സംശയിക്കുന്നുണ്ട്. ഇതിനുപുറമേ ഉന്നതരെ ബ്ലാക്ക് മെയില്‍ ചെയ്യാനുള്ള ദൃശ്യങ്ങളും ഇതില്‍ കണ്ടേക്കാമെന്നാണു കരുതുന്നത്.
സന്ദീപാണ് ഡിജിറ്റല്‍ വീഡിയോ റെക്കോഡര്‍ സൂക്ഷിച്ചിരുന്നത്. ആസൂത്രിതമായി ചെയ്യുന്ന കള്ളക്കടത്തില്‍ എന്തിനായിരുന്നു ദൃശ്യങ്ങള്‍ സൂക്ഷിച്ചിരുന്നതെന്നത് ദുരൂഹമാണ്. ഗൂഢാലോചനയില്‍ പങ്കാളികളായവര്‍ പിന്മാറാതിരിക്കാനോ ഭാവിയില്‍ ഭീഷണിപ്പെടുത്തി കാര്യസാധ്യത്തിന് ഉപയോഗിക്കാനോ ആകാം ഇതെന്ന് അന്വേഷണസംഘം കരുതുന്നു.
സ്വപ്‌നയില്‍ നിന്നുമാത്രം ആറ് സ്മാര്‍ട്ട്‌ഫോണാണ് കണ്ടെടുത്തത്. ഇതില്‍ രണ്ടെണ്ണം ഫേസ് ലോക്ക് ഉള്ളതായിരുന്നു. ഇവ രണ്ടും എന്‍.ഐ.എ. പരിശോധിച്ചു. സ്വര്‍ണക്കടത്തിനു മറയാക്കിയ നയതന്ത്ര ബാഗേജിനെക്കുറിച്ച് ഒന്നാംപ്രതി സരിത്തുമായും യു.എ.ഇ. അധികൃതരുമായും സ്വപ്ന നടത്തിയ വാട്‌സാപ്പ് ചാറ്റുകള്‍ അന്വേഷണസംഘം പരിശോധിച്ചു. ഇതില്‍ ചിലത് നശിപ്പിച്ചിട്ടുണ്ട്. ഇത് എന്താണെന്നറിഞ്ഞാല്‍ മാത്രമേ തെളിവുകള്‍ കൂട്ടിയോജിപ്പിക്കാനാകൂ.
സ്വപ്‌നയുടെ ജിമെയില്‍ അക്കൗണ്ടുകളില്‍ നിന്ന് കിട്ടിയ വിവരങ്ങള്‍ അന്വേഷണസംഘം കണ്ടെടുത്തു. മുഴുവന്‍ വിവരങ്ങളും നല്‍കാന്‍ ഗൂഗിള്‍ കമ്പനിയോട് എന്‍.ഐ.എ. ആവശ്യപ്പെട്ടിട്ടുണ്ട്. ഇങ്ങനെ ഡിജിറ്റല്‍ ഡേറ്റകള്‍ കൂട്ടിയോജിപ്പിച്ച് പരമാവധി തെളിവുകള്‍ ശേഖരിക്കാനുള്ള ഒരുക്കത്തിലാണ് അന്വേഷണ സംഘം.
"
https://www.facebook.com/Malayalivartha
