മലയാളിയ്ക്ക് ജീവപര്യന്തം തടവും നാടുകടത്തലും ശിക്ഷ വിധിച്ച് ദുബായ് ക്രിമിനല്‍ ഫസ്റ്റ് ഇന്‍സ്റ്റന്‍സ് കോടതി. കൊല്ലം തിരുമുല്ലവാരം പുന്നത്തല അനുഗ്രഹയില്‍ ചന്ദ്രശേഖരന്‍ നായരുടെ മകള്‍ സി.വിദ്യ ചന്ദ്രനെ(40) കുത്തിക്കൊലപ്പെടുത്തിയ കേസിലാണ് ഭര്‍ത്താവ് തിരുവനന്തപുരം നേമം സ്വദേശി യുഗേഷിനെ്(43) ശിക്ഷിച്ചത്.

2019 സെപ്റ്റംബര്‍ ഒന്‍പതിന് ഓണത്തിനു വിദ്യ നാട്ടിലേക്കു പുറപ്പെടാനിരിക്കെ ആയിരുന്നു സംഭവം. അല്‍ഖൂസിലെ വിദ്യയുടെ ഓഫിസിലെത്തിയ യുഗേഷ് അവരെ പാര്‍ക്കിങ് സ്ഥലത്തേക്കു കൂട്ടിക്കൊണ്ടുപോയി കത്തികൊണ്ടു കുത്തുകയായിരുന്നു. ഓഫിസ് ഉടമയായ തമിഴ്‌നാട് സ്വദേശിയാണ് ഒന്നാം സാക്ഷി.

വിദ്യയും യുഗേഷും തമ്മില്‍ വിവാഹിതരായിട്ട് 16 വര്‍ഷമായി. എങ്കിലും തുടക്കം മുതല്‍ അസ്വാരസ്യം പതിവായിരുന്നെന്നു ബന്ധുക്കള്‍ പറയുന്നു. ബികോം ബിരുദധാരിയായ വിദ്യ, കൊല്ലപ്പെടുന്നതിനു 11 മാസം മുന്‍പാണ് ദുബായിലെത്തിയത്. ഭര്‍ത്താവ് സാമ്പത്തികമായി സഹായിക്കാതിരുന്നതിനാല്‍ കടങ്ങള്‍ വീട്ടാനും മറ്റുമായാണു ജോലി സമ്പാദിച്ചത്.

കൊലപാതകത്തിന് ഒരുമാസം മുന്‍പ് ദുബായിലെത്തിയ യുഗേഷ്, പലവട്ടം വിദ്യയുടെ ഓഫിസില്‍ ചെന്നു വഴക്കുണ്ടാക്കിയിരുന്നു. മാനേജരുടെ മുന്നില്‍ വച്ചു മോശമായി പെരുമാറിയതു വിദ്യ ചോദ്യം ചെയ്തതിനു പിന്നാലെയാണു കൊലപ്പെടുത്തിയത്. ഇവരുടെ മൂത്ത മകള്‍ പ്ലസ് ടു പരീക്ഷയില്‍ എല്ലാ വിഷയത്തിലും എ പ്ലസ് നേടി. ഇളയമകള്‍ രണ്ടാം ക്ലാസില്‍. രണ്ടുപേരും വിദ്യയുടെ മാതാപിതാക്കളോടൊപ്പമാണ്.