ചാവക്കാട് നഗരസഭ ഓഫിസില്‍ 2 ജീവനക്കാര്‍ക്കു കൂടി കോവിഡ് സ്ഥിരീകരിച്ചതോടെ നഗരസഭാധ്യക്ഷനും കൗണ്‍സിലര്‍മാരും ജീവനക്കാരും സ്വയം നിരീക്ഷണത്തിലാവുകയും സ്രവം പരിശോധനയ്ക്ക് അയയ്ക്കുകയും ചെയ്തു. 106 പേരുടെ സ്രവം ഞായറാഴ്ചയും 46 പേരുടെ സ്രവം തിങ്കളാഴ്ചയും പരിശോധിച്ചു. ഇതില്‍ ആദ്യം പരിശോധിച്ച 2 പേര്‍ക്കാണു രോഗം കണ്ടെത്തിയത്.

ഇതോടെ ഓഫിസിലാകെ കോവിഡ് സ്ഥിരീകരിച്ച ജീവനക്കാരുടെ എണ്ണം നാലായി. ശുചീകരണ തൊഴിലാളിക്കും ശുചിത്വമിഷന്‍ ഓഫിസിലെ വനിതാ ജീവനക്കാരിക്കുമാണു രോഗം സ്ഥിരീകരിച്ചത്. കഴിഞ്ഞ ദിവസം നൈപുണ്യ പരിശീലന (എന്‍യുഎല്‍എം) വിഭാഗത്തിലെ 2 ജീവനക്കാര്‍ക്കും രോഗം കണ്ടെത്തിയിരുന്നു.

കുന്നംകുളം, ചാവക്കാട് നഗരസഭകളുടെ ചുമതലയുള്ള എന്‍യുഎല്‍എം ഉദ്യോഗസ്ഥനില്‍ നിന്നു രോഗം പകര്‍ന്നെന്നാണ് നിഗമനം. നഗരസഭയുടെ പ്രവര്‍ത്തനം തല്‍ക്കാലം നിര്‍ത്തിവച്ചിരിക്കയാണ്. പരിശോധനയില്‍ രോഗമില്ലെന്നു കണ്ടെത്തിയ ജീവനക്കാരെ ഉപയോഗിച്ച് ഇന്ന് നഗരസഭയുടെ പ്രവര്‍ത്തനം പുനരാരംഭിക്കുമെന്ന് നഗരസഭാധ്യക്ഷന്‍ എന്‍.കെ. അക്ബര്‍ അറിയിച്ചു.

താന്ന്യം പഞ്ചായത്തിലെ കോവിഡ് കണ്ടെയ്ന്‍മെന്റ് സോണുകളായ കിഴുപ്പിള്ളിക്കര, അഴിമാവ് വാര്‍ഡുകളില്‍ പ്രാഥമിക സമ്പര്‍ക്കപ്പട്ടികയിലുള്ളത് 22 പേര്‍. ഒരാളുടെ സ്രവപരിശോധന നടത്തി.

അതിനിടെ ദേശീയപാതയില്‍ സര്‍വേ നടത്താനെത്തിയ ഉദ്യോഗസ്ഥര്‍ക്കു നേരെ എടക്കഴിയൂരില്‍ നാട്ടുകാരുടെ പ്രതിഷേധം. വിജ്ഞാപനവുമായി ബന്ധപ്പെട്ട ഹിയറിങ് അടുത്തയാഴ്ച നടക്കാനിരിക്കെയാണ് ഉദ്യോഗസ്ഥര്‍ സര്‍വേ നടപടികളുമായെത്തിയതെന്നാണ് നാട്ടുകാരുടെ ആക്ഷേപം. കോവിഡ് മാനദണ്ഡങ്ങള്‍ ലംഘിച്ചുളള സര്‍വേ നിര്‍ത്തിവയ്ക്കണമെന്ന് ആക്ഷന്‍ കൗണ്‍സില്‍ ഭാരവാഹികള്‍ ആവശ്യപ്പെട്ടു. പൊലീസ് സ്ഥലത്തെത്തി. ദേശീയപാത 66 ആക്ഷന്‍ കൗണ്‍സില്‍ മണ്ഡലം കമ്മിറ്റി ഭാരവാഹികളായ സി. ഷറഫുദ്ദീന്‍, ജലീല്‍ കാര്യടത്ത്, അയ്യത്തയില്‍ ജിഷാര്‍, പി.പി. അഹമ്മദ് എന്നിവരുടെ നേതൃത്വത്തിലായിരുന്നു പ്രതിഷേധം.

കുന്നംകുളം നഗരത്തിലെ റെഡ്‌സോണ്‍ മേഖലയില്‍ വഴിയോര കച്ചവടം കര്‍ശനമായി നിരോധിക്കാനും കണ്ടെയ്ന്‍മെന്റ് സോണുകളില്‍ 29 വരെ മാര്‍ക്കറ്റുകള്‍ അടച്ചിടാനും തീരുമാനം. കോവിഡ് പ്രതിരോധ പ്രവര്‍ത്തനങ്ങള്‍ അവലോകനം ചെയ്യാന്‍ വിളിച്ച സിഎഫ്എല്‍ടിസി കമ്മിറ്റി അംഗങ്ങളുടെ യോഗത്തിലാണ് ധാരണ. ബിരിയാണി പോലുള്ള ഭക്ഷ്യവസ്തുക്കള്‍ പായ്ക്ക് ചെയ്ത് നഗരസഭ മേഖലയിലെ വഴിയോരങ്ങളില്‍ വില്‍ക്കുന്നതിനെതിരെ നടപടിയെടുക്കും.