സ്വര്‍ണക്കടത്ത് കേസിലെ പ്രതികളായ സ്വപ്ന സുരേഷിന്റെയും സന്ദീപ് നായരുടെയും സരിത്തിന്റെയും സ്വത്തുക്കള്‍ കണ്ടുകെട്ടാന്‍ സഫേമ നിയമപ്രകാരം കസ്റ്റംസ് നടപടികള്‍ ആരംഭിച്ചു. മൂവര്‍ക്കും വലിയതോതില്‍ ബിനാമി ഉള്‍പ്പെടെ സ്വത്തുണ്ടെന്ന് അന്വേഷണ ഏജന്‍സികള്‍ വിവരങ്ങള്‍ ശേഖരിച്ചതിന്റെ അടിസ്ഥാനത്തിലാണ് നടപടി.ഭൂസ്വത്തിന്റെ വിവരങ്ങള്‍ തേടി സംസ്ഥാന രജിസ്ട്രേഷന്‍ വകുപ്പിനും റവന്യൂവകുപ്പിനും കസ്റ്റംസ് കത്ത് നല്‍കി. ബന്ധുക്കളുടെയും സ്വത്തുവിവരങ്ങള്‍ പരിശോധിക്കുന്നുണ്ട്.

വിദേശനാണ്യ വിനിമയചട്ടം ലംഘിച്ച് സ്വത്ത് സമ്പാദനം നടത്തിയാല്‍ അത് കണ്ടുകെട്ടാനുള്ള നിയമമാണ് സഫേമ. ചെന്നൈയിലാണ് ഇത്തരം കേസുകള്‍ക്കായി കോടതിയുള്ളത്.നയതന്ത്ര പാര്‍സലെന്ന മറവില്‍ 23 തവണ സ്വര്‍ണം കടത്തിയെന്നാണ് നിഗമനം. നേരിട്ട് പണമായും സ്വര്‍ണമായുമാണ് പ്രതിഫലം കൈപ്പറ്റിയത്.
കണ്ണേറ്റുമുക്കില്‍ വീട് നിര്‍മിക്കുന്ന പിതാവ് സുരേഷിന്റെ പേരിലുള്ള ഭൂമി അദ്ദേഹത്തിന്റെ മരണശേഷം ലഭിച്ചതാണ്.

ഓരോ ഇടപാടിലും അഞ്ചുമുതല്‍ 15 ലക്ഷം രൂപ വരെ ലഭിച്ചു. കിട്ടിയ തുകയെല്ലാം ചെലവഴിച്ച് തീര്‍ക്കാന്‍ വഴിയില്ല. ഒരു കോടിക്കുമേല്‍ ബിനാമി നിക്ഷേപമുണ്ടെന്നാണ് സൂചന. സന്ദീപിന് നെടുമങ്ങാട് പത്താംകല്ലില്‍ കാര്‍ബണ്‍ ഡോക്ടര്‍, കുറവന്‍കോണത്ത് ബ്യൂട്ടി പാര്‍ലര്‍ എന്നിവയുണ്ടെന്ന് കണ്ടെത്തി. സരിത്തിന്റെ വ്യക്തിപരമായ സ്വത്ത് സമ്പാദനത്തിന് പുറമെ ബന്ധുക്കളുടെ സമ്പാദ്യവും പരിശോധിക്കുന്നുണ്ട്. റവന്യൂ ഇന്റലിജന്‍സ് വിഭാഗവും എന്‍ഫോഴ്‌സ്മന്റെ് ഡയറക്ടറേറ്റും ഇവരുടെ സ്വത്ത് സംബന്ധിച്ച വിശദാംശങ്ങള്‍ പരിശോധിക്കുന്നുണ്ട്.