സ്വര്‍ണത്തിന് പുറകെ മാനും... സ്വപ്നയും കൂട്ടരും ഉള്‍പ്പെട്ട സ്വര്‍ണക്കടത്ത് കേസ് കേരളം വിട്ട് ഡല്‍ഹിയിലേക്ക്; പാര്‍ലമെന്റ് സമിതികളില്‍ സ്വര്‍ണക്കടത്തും സ്വപ്നയും ചര്‍ച്ചയായതോടെ നെഞ്ചിടിച്ച് പലരും; സ്വര്‍ണക്കടത്തിന് ദേശീയ ചര്‍ച്ച കൂടിയാകുമ്പോള്‍ പെടുന്നത് സ്വപ്ന തന്നെ
കൊറോണയ്ക്കിടെ കേരളത്തില്‍ സ്വപ്ന സുരേഷും കൂട്ടരും ഉണ്ടാക്കിയ രാഷ്ട്രീയ ചര്‍ച്ചയുടെ ഗതി നമ്മള്‍ കണ്ടതാണ്. ഈ ചര്‍ച്ച കേരളത്തിന്റെ അതിര്‍ത്തി വിട്ട് അങ്ങ് ഡല്‍ഹിയിലേക്കും എത്തിയിരിക്കുകയാണ്. ഇന്നലെ അപൂര്‍വമായൊരു ചര്‍ച്ചയാണ് ഡല്‍ഹിയില്‍ നടന്നത്. കേരളത്തിലെ സ്വര്‍ണക്കടത്തുമായി ബന്ധപ്പെട്ട വിഷയങ്ങള്‍ പാര്‍ലമെന്റിന്റെ സ്ഥിരം സമിതിയിലും വിഷയമായി. ഇന്നലെ ചേര്‍ന്ന വിദേശകാര്യ വകുപ്പ്, എസ്റ്റിമേറ്റ് സ്ഥിരം സമിതി യോഗങ്ങളില്‍ കേരളത്തില്‍ നിന്നുള്ള അംഗങ്ങള്‍ ഇതുന്നയിച്ചു. ഇത് കരുതിക്കൂട്ടിയുള്ള ചര്‍ച്ചയാണെന്നാണ് വിലയിരുത്തുന്നത്. സ്വര്‍ണക്കടത്ത് കേസില്‍ ഇനിയും പലരും പെടുമെന്നാണ് അറിയുന്നത്. അവരെയെല്ലാം മുള്‍മുനയില്‍ നിര്‍ത്തുന്നതാണ് ഡല്‍ഹിയിലെ ഈ ചര്‍ച്ചകള്‍. മാത്രമല്ല സംസ്ഥാനത്തെ ചില നേതാക്കന്‍മാരെ ഉന്നംവച്ചു കൊണ്ടുള്ളതാണ് ചര്‍ച്ച. സംസ്ഥാന സര്‍ക്കാരിനെ പ്രതിരോധത്തിലാക്കാനുള്ള ശ്രമവും ഇതോടൊപ്പം നടക്കുന്നുണ്ട്. ഏതായാലും ചര്‍ച്ചയില്‍ താരമായതും സ്വപ്ന സുരേഷ് തന്നെ.
വിദേശത്തു നിന്ന് ലൈഫ് പദ്ധതിക്ക് സന്നദ്ധ സംഘടനയുടെ ഗ്രാന്റ് വാങ്ങിയതിനെക്കുറിച്ച് വിദേശകാര്യ സമിതിയിലും എസ്റ്റിമേറ്റ് സമിതിയിലും ചോദ്യങ്ങളുയര്‍ന്നു. ഇത്തരം സഹായം വാങ്ങാന്‍ വകുപ്പുണ്ടോ എന്നതു സംബന്ധിച്ച് അന്വേഷിച്ച് അറിയിക്കാമെന്ന് ബന്ധപ്പെട്ട വകുപ്പുദ്യോഗസ്ഥര്‍ അറിയിച്ചു. ലൈഫ് പദ്ധതിക്കുള്ള കേന്ദ്രസര്‍ക്കാരിന്റെ ഗ്രാന്റ് എത്രയെന്നും കേരളത്തില്‍ ഇതുവരെ എത്ര നല്‍കിയെന്നും അവിടെ നിന്ന് അതിന്റെ റിപ്പോര്‍ട്ട് ലഭിച്ചോയെന്നും എസ്റ്റിമേറ്റ് സമിതിയില്‍ ചോദ്യങ്ങളുണ്ടായി. എന്തായാലും സ്വര്‍ണക്കടത്ത് ദേശീയ ശ്രദ്ധയില്‍ കൊണ്ടുവരാന്‍ ഈ ചര്‍ച്ചയിലൂടെയായി.
അതേസമയം സ്വര്‍ണക്കടത്തിന് പിന്നാലെ മാന്‍ വേട്ടയും സജിവമാകുകയാണ്. സ്വര്‍ണക്കടത്തിന് കേസിലെ മുഖ്യകണ്ണി പെരിന്തല്‍മണ്ണ സ്വദേശി കെ.ടി.റമീസിനെ വനംവകുപ്പ് മാന്‍വേട്ടക്കേസില്‍ ചോദ്യം ചെയ്യാന്‍ തുടങ്ങി. പാലക്കാട് ഡിഎഫ്ഒ നരേന്ദ്രനാഥ് വേലൂരി, വാളയാര്‍ റേഞ്ച് ഓഫിസര്‍ കെ.പി.ജില്‍ജിത്ത് എന്നിവരുടെ നേതൃത്വത്തിലുള്ള സംഘം റമീസിനെ സംഭവസ്ഥലത്തെത്തിച്ച് ഒരു മണിക്കൂറിലധികം തെളിവെടുത്തു.
കനത്ത സുരക്ഷയിലായിരുന്നു നടപടി. രാവിലെ 9 മുതല്‍ ഒലവക്കോട് വനം ഓഫിസില്‍ ആരംഭിച്ച ചോദ്യം ചെയ്യലില്‍ മാന്‍വേട്ടയുടെ മുഖ്യ സൂത്രധാരന്‍ റമീസാണെന്നും അധികൃതര്‍ സ്ഥിരീകരിച്ചു. 2014 ജൂലൈയില്‍ പുതുശ്ശേരി വാളയാര്‍ റേഞ്ചിനു കീഴില്‍ കോങ്ങാട്ടുപാടത്ത് വനത്തിനകത്താണു മാനുകളെ വെടിയേറ്റു ചത്ത നിലയില്‍ കണ്ടെത്തിയത്.
അന്ന് അറസ്റ്റിലായ കോങ്ങോട്ടുപാടം സ്വദേശി രാജീവ്, കഞ്ചിക്കോട് ഹില്‍വ്യൂ നഗര്‍ കൊട്ടാംപാറ ദുരൈസ്വാമി, ചടയന്‍കാലായ് ഉമ്മിണികുളം സി.ജയകുമാര്‍ എന്നിവര്‍ നല്‍കിയ മൊഴിയിലാണു വേട്ടക്കാരനായ കെ.ടി.റമീസിനെക്കുറിച്ചു വിവരം ലഭിച്ചത്.
തുടര്‍ന്നു പിടികൂടാന്‍ നീക്കം ആരംഭിച്ചപ്പോഴേക്കും റമീസ് വിദേശത്തേക്കു കടന്നിരുന്നു. നടപടിക്രമങ്ങള്‍ പൂര്‍ത്തിയാക്കിയ ശേഷം റമീസിനെ ഇന്ന് എന്‍ഐഎക്കു കൈമാറുന്നതാണ്.
ഇവിടെ ഡല്‍ഹി ചര്‍ച്ചയും മാന്‍ കേസും പുരോഗമിക്കുനനതിനിടെ നയതന്ത്ര ബാഗേജിലൂടെ സ്വര്‍ണം കടത്തിയ കേസിലെ പ്രതികളായ സരിത്ത്, സ്വപ്ന സുരേഷ്, സന്ദീപ് നായര്‍ എന്നിവരെ ജുഡിഷ്യല്‍ ഫസ്റ്റ് ക്‌ളാസ് മജിസ്‌ട്രേട്ട് കോടതി മൂന്ന് ദിവസം കൂടി എന്‍ഫോഴ്‌സ്‌മെന്റിന്റെ കസ്റ്റഡിയില്‍ വിട്ടു.
പ്രതികള്‍ക്ക് ഉന്നതബന്ധമുണ്ടെന്ന് സമര്‍ത്ഥിക്കാന്‍ അന്വേഷമ സംഘത്തിനായി. സ്വര്‍ണക്കടത്തിന് പിന്നിലെ ഹവാല ഇടപാടുകളെക്കുറിച്ചും വിശദമായി അന്വേഷിക്കണം. കേസില്‍ കൂടുതല്‍ പ്രതികളെ കണ്ടെത്താനുമുണ്ട്. അതിനാല്‍ കൂടുതല്‍ അന്വേഷണത്തിനായി പ്രതികളെ അഞ്ച് ദിവസം കൂടി വിട്ടുകിട്ടണമെന്നായിരുന്നു എന്‍ഫോഴ്‌സ്‌മെന്റ് ആവശ്യം. എന്തായാലും ഡല്‍ഹി ചര്‍ച്ചയും, മാന്‍കേസും, അന്താരാഷ്ട്ര ബന്ധങ്ങളും കൂടി ഒന്നിന് മേല്‍ ഒന്നൊന്നായി സ്വര്‍ണക്കടത്ത് കേസിനെ സജീവമാക്കുകയാണ്.
"
https://www.facebook.com/Malayalivartha
