നേഹ ബോറയുടെ സമാധാന ബോണ്ട് ഹര്‍ജി തള്ളി ഡല്‍ഹി ഹൈക്കോടതി
പീസ് ബോണ്ടുമായി ബന്ധപ്പെട്ട് ഐസ പ്രസിഡന്റ് നേഹ ബോറ സമര്‍പ്പിച്ച ഹര്‍ജി ഡല്‍ഹി ഹൈക്കോടതി തള്ളി. തുടര്‍നടപടികളില്‍ നിയമപരമായ നടപടിക്രമങ്ങള്‍ കൃത്യമായി പാലിക്കണമെന്ന് മജിസ്‌ട്രേറ്റിന് നിര്‍ദേശം നല്‍കി. കേസുമായി ബന്ധപ്പെട്ട് ആശ്രയിക്കുന്ന എല്ലാ രേഖകളും വിവരങ്ങളും ഹര്‍ജിക്കാരിക്ക് ലഭ്യമാക്കണമെന്നും കോടതി വ്യക്തമാക്കി. സമാധാനം നിലനിര്‍ത്താനായി 10000 രൂപയുടെ വ്യക്തിഗത ബോണ്ടും ആള്‍ജാമ്യവും നല്‍കണമെന്ന് പൊലീസ് അയച്ച നോട്ടീസ് ചോദ്യം ചെയ്ത് നേഹ സമര്‍പ്പിച്ച ഹര്‍ജിയാണ് ഹൈക്കോടതി തള്ളിയത്.
മുഖ്യ തിരഞ്ഞെടുപ്പ് കമ്മിഷണര്‍ക്കെതിരേ ഒക്ടോബര്‍ 16ന് മാണ്ഡി ഹൗസില്‍ നടന്ന പ്രതിഷേധത്തിനിടെയാണ് നേഹ ബോറയെ പൊലീസ് കസ്റ്റഡിയിലെടുത്തത്. തുടര്‍ന്ന് അന്വേഷണം പൂര്‍ത്തിയാകുന്നതുവരെ സമാധാനം നിലനിര്‍ത്തുമെന്ന് ഉറപ്പുനല്‍കി 10,000 രൂപയുടെ ബോണ്ട് സമര്‍പ്പിക്കണമെന്ന് ഡല്‍ഹി സ്‌പെഷ്യല്‍ എക്‌സിക്യൂട്ടീവ് മജിസ്‌ട്രേറ്റ് നിര്‍ദേശിച്ചു. ഭാരതീയ നാഗരിക് സുരക്ഷാ സംഹിതയിലെ 126, 130, 135(3) വകുപ്പുകള്‍ പ്രകാരമായിരുന്നു നടപടി. മജിസ്‌ട്രേറ്റിന്റെ ഈ നിര്‍ദേശത്തിന്റെ നിയമസാധുത ചോദ്യം ചെയ്താണ് നേഹ ഡല്‍ഹി ഹൈക്കോടതിയെ സമീപിച്ചത്.
നേഹയ്ക്കുവേണ്ടി ഹാജരായ അഭിഭാഷകന്‍ പ്രതിഷേധം സമാധാനപരമായിരുന്നുവെന്നും ജനാധിപത്യത്തില്‍ ഭരണമാറ്റം ആവശ്യപ്പെടുന്നത് തെറ്റല്ലെന്നും കോടതിയില്‍ വാദിച്ചു. എന്നാല്‍, നിരോധനാജ്ഞ ലംഘിച്ചുള്ള പ്രതിഷേധവും മുദ്രാവാക്യവും കണക്കിലെടുത്താണ് സ്‌പെഷ്യല്‍ എക്‌സിക്യൂട്ടീവ് മജിസ്‌ട്രേറ്റ് മുന്‍കരുതല്‍ നടപടികള്‍ സ്വീകരിച്ചതെന്ന് അഡീഷണല്‍ സോളിസിറ്റര്‍ ജനറല്‍ ചേതന്‍ ശര്‍മ്മ വാദിച്ചു.
https://www.facebook.com/Malayalivartha
