പലതരത്തില്‍ മലയാളികളെ അമ്പരപ്പിച്ച താരമാണ് സരിത എസ് നായര്‍. കഴിഞ്ഞ സര്‍ക്കാരിനെ മുള്‍മുനയില്‍ നിര്‍ത്തിയ സരിത നായര്‍ക്ക് ആരാധകരേറെയാണ്. മലയാളികളില്‍ പലര്‍ക്കും വാട്‌സാപ്പ് ഇല്ലാത്ത കാലത്ത് സരിത ഉണ്ടാക്കിയ ഇമേജ് ചെറുതല്ല. സരിതയുടെ ഒരു വീഡിയോ ഷെയര്‍ ചെയ്തതിന്റെ പേരില്‍ അറസ്റ്റ് ഭയന്ന മലയാളികളുടെ നീണ്ട നിര കണ്ട് അന്നത്തെ സര്‍ക്കാര്‍ പോലും കണ്ണ് തള്ളി. കോടതിയില്‍ നിന്നും കോടതിയിലേക്ക് പോകുമ്പോഴും ആ പഴയ സരിത നായര്‍ ഇപ്പോഴത്തെ സ്വപ്ന സുരേഷിനെപ്പോലെ നാണം കുണുങ്ങിയായിരുന്നില്ല. ഇവിടെ സ്വപ്ന കറുത്ത പര്‍ദയ്ക്കുള്ളില്‍ ഉടുതുണിക്ക് മറുതുണിയില്ലാതെ വീര്‍പ്പ് മുട്ടുമ്പോള്‍ സരിത മലയാളികളെ കയ്യിലെടുത്തത് തന്റെ കളര്‍ഫുള്‍ സാരികള്‍ കൊണ്ടാണ്. സരിതയുടെ സാരികള്‍ പോലും ചര്‍ച്ചയായിരുന്ന കാലത്ത് സരിതയ്ക്ക് ഏറെ ആരാധകരുമുണ്ടായി. ഇതോടെ സരിതയെ സിനിമയിലും എടുത്തു. എന്തിന് നര്‍ത്തകിയായും ചാനല്‍ ചര്‍ച്ചക്കാരിയായും മലയാളികളെ സരിത അമ്പരപ്പിച്ചിരുന്നു.

എന്നാല്‍ പതിയെ പതിയെ സരിതയെ മഷിയിട്ട് നോക്കിയാല്‍ കാണാന്‍ പറ്റാത്ത അവസ്ഥയായിരുന്നു. സോളാര്‍ കേസ് നനഞ്ഞ പടക്കം മൂലയ്‌ക്കൊതുങ്ങിയപ്പോള്‍ എല്ലാം മറക്കുന്ന മലയാളികള്‍ സരിതയും സോളാറും എല്ലാവരും മറന്നു. അപ്പോഴാണ് സ്വര്‍ണത്തിന്റെ രൂപത്തില്‍ സ്വപ്ന സുരേഷ് വരുന്നത്. സ്വപ്നയുടെ വരവ് തന്നെ പഴയ സരിതയെ ഓര്‍മ്മിപ്പിച്ചാണ്. പ്രതിപക്ഷം സരിതയെ മറക്കാന്‍ ശ്രമിച്ചപ്പോള്‍ ഭരണപക്ഷം പലവട്ടം ഓര്‍മ്മിപ്പിച്ചു. അങ്ങനെ സ്വപ്നയും സരിതയും ചാനല്‍ ചര്‍ച്ചകളില്‍ വന്നപ്പോഴും സരിതയെ മാത്രം കാണാനില്ലായിരുന്നു. എന്നാല്‍ ഇപ്പോള്‍ പൂര്‍വാധികം ശക്തിയോടെ സരിത വന്നിരിക്കുയാണ്. സരിത നായര്‍ മുഖ്യ കഥാപാത്രത്തെ അവതരിപ്പിച്ച വയ്യാവേലി എന്ന സിനിമയാണ് സമൂഹമാധ്യമങ്ങളില്‍ വൈറലാകുന്നത്. കേരള രാഷ്ട്രീയത്തെ അടിമുടി ഉലച്ച, നേതാക്കളുടെ ഉറക്കം കെടുത്തിയ സോളാര്‍ കേസിലെ നായിക പുതിയ ചിത്രത്തില്‍ പൊലീസ് ഓഫീസറായാണ് എത്തുന്നത്. ഇവിടെ സ്വര്‍ണക്കടത്ത് നടക്കുമ്പോള്‍ അന്വേഷണവുമായി എത്തുന്നതാകട്ടെ സരിതയും. ഇത് കണ്ടതോടെ മലയാളികള്‍ക്ക് ചിരി പൊട്ടി

പഴയ താരത്തിന്റെ ചിത്രം പുറത്തിറങ്ങിയതിന് പുറകെ ട്രോളന്മാരും സജീവമായിട്ടുണ്ട്. ചിത്രത്തിലെ സരിതയുടെയും മറ്റുള്ള നടീനടന്മാരുടെയും പ്രകടനത്തെയാണ് ട്രോളുകള്‍ പ്രധാനമായും ലക്ഷ്യം വയ്ക്കുന്നത്. നാല് വര്‍ഷങ്ങള്‍ക്ക് മുന്‍പാണ് സരിത പൊലീസ് വേഷത്തില്‍ എത്തുന്ന ചിത്രത്തെ സംബന്ധിച്ച വാര്‍ത്തകള്‍ സോഷ്യല്‍ മീഡിയയിലും മറ്റുമായി നിറയുന്നത്.പിന്നെ പരതി നോക്കിയിട്ടും കണ്ടില്ല. എന്നാല്‍ ഏതാനും ആഴ്ചകള്‍ക്ക് മുന്‍പ് ചിത്രം യൂട്യൂബില്‍ പ്രത്യക്ഷപ്പെടുകയായിരുന്നു. ചിത്രം ഇറങ്ങി അധികം താമസിയാതെ വിഡിയോ ട്രോളുകളും പുറത്തിറങ്ങുകയായിരുന്നു. ശിവജി ഗുരുവായൂര്‍, കൊച്ചു പ്രേമന്‍ എന്നിവരും ചിത്രത്തില്‍ വേഷമിടുന്നുണ്ട്.

വി.വി. സന്തോഷ് എന്ന ആളാണ് സിനിമയുടെ സംവിധാനം. തിരക്കഥ എഴുതിയത് അശോക് നായര്‍. ഇദ്ദേഹം തന്നെയാണ് സിനിമയുടെ നിര്‍മാതാവ്.

അന്ത്യകൂദാശ എന്ന ചിത്രത്തിലാണ് ഇതിന് മുന്‍പ് സരിത അഭിനയിച്ചത്. സരിത നായികയായതിനാല്‍ തന്നെ ചിത്രവും സൂപ്പര്‍ ഹിറ്റായിരുന്നു. അന്ത്യകൂദാശയ്ക്ക് ശേഷമാണ് വയ്യാവേലി എടുത്തതെങ്കിലും അത് അന്നാരും ശ്രദ്ദിച്ചിരുന്നില്ല. കാരണം സരിത തന്നെ ചാനലുകളില്‍ നിന്നും അപ്രത്യക്ഷമായിരുന്നു. എന്നാല്‍ സ്വപ്ന സുരേഷ് കളം നിറഞ്ഞതോടെ ഈ ചിത്രവും ശ്രദ്ധ നേടി. ഇത് പറ്റിയ സമയമായതിനാല്‍ കാണുന്നവര്‍ കാണുന്നവര്‍ ഷെയര്‍ ചെയ്തതോടെ ചിത്രം അങ്ങ് ഹിറ്റാവുകയും ചെയ്തു. മാത്രമല്ല ട്രോളര്‍മാര്‍ക്കും ഇതില്‍പ്പരം സന്തോഷമില്ല. സ്വപ്ന വന്നതോടെ ഗ്ലാമര്‍ നഷ്ടപ്പെട്ട സരിതയെ മുഖ്യധാരയിലേക്ക് കൊണ്ടു വരാന്‍ വയ്യാവേലിയ്ക്കായി. സരിതയുടെ പോലീസ് വേഷവും മാസ് ഡയലോഗുകളും ചിരിയടക്കാതെ ആര്‍ക്കും കാണാനാവില്ല. അതാണ് സരിത എസ്. നായര്‍.