കൊറോണ മനുഷ്യരിൽ ഉളവാക്കുന്ന ഭീതി മൂലം പരസ്പരം സഹായിക്കുക എന്ന നന്മപോലും മനുഷ്യർ മറക്കുകയാണ് എന്നതിന്റെ തെളിവുകളാണ് ഇപ്പോൾ പുറത്തേക്ക് വരുന്നത്. ഹൃദയാഘാതം വന്ന ഡോക്‌ടറെ ആശുപത്രിയിൽ എത്തിക്കാൻ വീട്ടിൽ കൂടെയുണ്ടായിരുന്ന ഭാര്യാമാതാവ്‌ സഹായത്തിന്‌ അയൽപക്കക്കാരെ വിളിച്ചെങ്കിലും, കോവിഡ്‌ ഭീതിയാൽ ആരും വരാൻ തയ്യാറായില്ല. ഇതേതുടർന്ന് ആലപ്പുഴ ജില്ലയിലെ ഒരു പ്രാഥമികാരോഗ്യകേന്ദ്രത്തിലെ മെഡിക്കൽ ഓഫീസറായിരുന്ന ആ ഡോക്‌ടർ മരണപ്പെട്ടതായുള്ള വാർത്ത ഏറെ വേദന നൽകുന്നു എന്ന് വ്യക്തമാക്കി ഡോ. ഷിംന അസീസ് രംഗത്ത് എത്തുകയുണ്ടായി.

ഫേസ്ബുക് പോസ്റ്റ് ഇങ്ങനെ;

ഹൃദയാഘാതം വന്ന ഡോക്‌ടറെ ആശുപത്രിയിൽ എത്തിക്കാൻ വീട്ടിൽ കൂടെയുണ്ടായിരുന്ന ഭാര്യാമാതാവ്‌ സഹായത്തിന്‌ അയൽപക്കക്കാരെ വിളിച്ചെങ്കിലും, കോവിഡ്‌ ഭീതിയാൽ ആരും വരാൻ തയ്യാറായില്ലെന്ന്‌ കേട്ടു. ആലപ്പുഴ ജില്ലയിലെ ഒരു പ്രാഥമികാരോഗ്യകേന്ദ്രത്തിലെ മെഡിക്കൽ ഓഫീസറായിരുന്ന ആ ഡോക്‌ടർ മരണപ്പെട്ടു.

ആലപ്പുഴ ചെറിയനാട്‌ പിഎച്‌സിയിലെ ചാർജ്‌ മെഡിക്കൽ ഓഫീസർ കൂടിയായിരുന്നു പൾമനോളജി വിദഗ്‌ധനായ ഡോ.ഫൈസൽ. ഇന്നലെ അദ്ദേഹം ഹൃദയാഘാതം സംഭവിച്ച്‌ അബോധാവസ്‌ഥയിൽ ആവുകയും അന്നേരം വീട്ടിൽ ഉണ്ടായിരുന്ന ഭാര്യയുടെ അമ്മ ചുറ്റുമുള്ളവരോട്‌ സഹായം തേടിയെങ്കിലും കോവിഡ്‌ രോഗം ഡോക്‌ടറിൽ നിന്ന്‌ തങ്ങൾക്ക്‌ പകർന്നേക്കുമെന്ന ഭീതിയാൽ ആരും എത്തുകയുമുണ്ടായില്ല. (ഇതേക്കുറിച്ച്‌ സീനിയർ ഡോക്‌ടർ കൂടിയായ അദ്ദേഹത്തിന്റെ സഹോദരി എഴുതിയ ഫേസ്‌ബുക്ക് പോസ്‌റ്റ്‌ ആദ്യകമന്റിൽ ചേർക്കുന്നു)

ഈ കോവിഡ്‌ കാലത്ത്‌ സർക്കാരിന്റെ കോവിഡ്‌ പ്രതിരോധ പ്രവർത്തനങ്ങളിൽ അഹോരാത്രം പങ്കാളികളാകുന്ന ഡോക്‌ടർമാർ ഉൾപ്പെടെയുള്ള ആരോഗ്യപ്രവർത്തകർ ഏറ്റെടുക്കുന്ന വെല്ലുവിളികൾ ചെറുതല്ല. ഒന്നും പർവ്വതീകരിച്ച്‌ പറഞ്ഞ്‌ ഞങ്ങളെ ആരും മാലാഖയും ദൈവത്തിന്റെ വലംകൈയുമൊന്നും ആക്കുകയും വേണ്ട.

ജീവൻ പിടയുമ്പോൾ ഞങ്ങൾക്കും പേടിയാവും, വല്ലാതെ വേദനിക്കും, വെപ്രാളപ്പെടും. പച്ച മനുഷ്യരാണ്‌ ഞങ്ങളും. പലപ്പോഴും വീടും നാടും കുടുംബവും മറന്ന്‌ നാടിന്‌ കാവൽ നിന്നിട്ട്‌ ഇതൊക്കെയാണ്‌ തിരിച്ച്‌ കിട്ടുന്നത്‌ എന്നത്‌ വല്ലാത്ത നൊമ്പരമാണ്‌, നിരാശയാണ്‌. ഞങ്ങളെ കരുതേണ്ടത്‌, ശ്രദ്ധയോടെ കാത്തു വെക്കേണ്ടത്‌ ഞങ്ങളുടെ മാത്രം ആവശ്യമല്ലെന്ന്‌ ഓർക്കുമല്ലോ...ഈ വാർത്ത ഒരു തരത്തിലും ഉൾക്കൊള്ളാനാവുന്നില്ല.
പ്രിയ സഹപ്രവർത്തകന്‌ ആദരാഞ്ജലികൾ.