ചേവായൂര്‍ പൊലീസ്, മലപ്പുറത്തെയും കോഴിക്കോട്ടെയും പ്ലമിങ്, ഇലക്ട്രിക്കല്‍ കടകള്‍ കുത്തിത്തുറന്നു ചെമ്പ്, പിച്ചള ഉപകരണങ്ങള്‍ മോഷ്ടിക്കുന്ന യുവാവിനേയും യുവതിയേയും പിടികൂടി. തിങ്കളാഴ്ച രാത്രി തിരൂരങ്ങാടി സ്റ്റേഷന്‍ പരിധിയിലെ പടിക്കല്‍ ഭാഗത്തെ 2 കടകളില്‍ നിന്ന് മോഷണം നടത്തി ഇരുചക്രവാഹനത്തില്‍ മോഷണ മുതലടങ്ങിയ ചാക്കുകെട്ടുമായി വരുമ്പോഴാണു ഫറോക്കില്‍ താമസിക്കുന്ന കണ്ണന്‍, സുഹൃത്ത് മീനു എന്നിവര്‍ മലാപ്പറമ്പില്‍ പിടിയിലായത്. 

പന്തീരാങ്കാവിലെ ലീഗാമ ട്രേഡേഴ്‌സില്‍ കഴിഞ്ഞ ജൂലൈ 27-ന് ഷട്ടര്‍ തകര്‍ത്തു നടത്തിയ മോഷണമാണ് അന്വേഷണത്തില്‍ വഴിത്തിരിവായത്. ഇവിടെ നിന്നു രണ്ട് ലക്ഷത്തോളം രൂപ വിലമതിക്കുന്ന സാധനങ്ങള്‍ മോഷണം പോയിരുന്നു. ലീഗാമ ട്രേഡേഴ്‌സിന് സമീപത്തെ അയ്യപ്പ മഠത്തിലെ സിസിടിവി ദൃശ്യങ്ങളില്‍ ഒരു പുരുഷനും സ്ത്രീയും നടന്നുവരുന്നതും മോഷണത്തിന് ശേഷം ബൈക്കില്‍ തിരിച്ചുപോകുന്നതും വ്യക്തമായിരുന്നു.

ഇതില്‍ നിന്നും മോഷണത്തില്‍ സ്ത്രീകൂടി പങ്കാളിയാണെന്ന് അന്നു വ്യക്തമായി. മൂന്നാഴ്ച മുന്‍പു മോഷണം നടന്ന കോവൂരിലെ ഗ്യാലക്‌സി ഏജന്‍സീസ് എന്ന കടയുടെ സമീത്തുള്ള സിസിടിവിയിലും ഇവരുടെ ചിത്രം പതിഞ്ഞിരുന്നു. അസമയത്ത് ചാക്കുകെട്ടുമായി വന്ന സ്ത്രീയെയും പുരുഷനെയും ശ്രദ്ധിച്ചത് മോഷണത്തില്‍ സ്ത്രീകൂടി പങ്കാളിയാണെന്ന് വ്യക്തമായതിനാലാണെന്ന് പൊലീസ് പറഞ്ഞു.

മെഡിക്കല്‍ കോളജ്, കുന്നമംഗലം, ഫാറൂഖ്, തേഞ്ഞിപ്പലം തുടങ്ങി വിവിധ സ്റ്റേഷനുകളില്‍ ഇവര്‍ക്കെതിരെ കേസ് നിലവിലുണ്ടെന്നും പ്രതികളെ ഇന്നു കൂടുതല്‍ ചോദ്യം ചെയ്യുമെന്നും പൊലീസ് അറിയിച്ചു. കോട്ടൂളി, മേത്തോട്ടുതാഴം, ഫറോക്ക്, കുന്നമംഗലം, മലാപ്പറമ്പ്, കോവൂര്‍, മാത്തറ എന്നിവിടങ്ങളിലെ കടകളിലും കോവിഡ് കാലത്ത് സമാന രീതിയില്‍ മോഷണം നടന്നിരുന്നു.