സിനിമാ ലോകം ഞെട്ടലോടെയാണ് ആ വാര്‍ത്ത കേട്ടത്. മുരളി ഗോപിയെന്ന സനിമാ പ്രവര്‍ത്തകന്റെ കരുത്തും ആത്മവിശ്വാസവുമായിരുന്നു ഭാര്യ അഞ്ജന അകാലത്തില്‍ അന്തരിച്ചു. എസ്.ബി.ഐ പട്ടം ശാഖയില്‍ അസിസ്റ്റന്റ് മാനേജരായിരുന്നു. ഞായറാഴ്ച ഉച്ചയ്ക്ക് രണ്ടു മണിയോടെ, ട്യൂഷന് പോയിരുന്ന മക്കളുമായി വഴുതക്കാട്ടെ ഫ്‌ളാറ്റിലെത്തി ലിഫ്റ്റിലേക്ക് കയറാന്‍ തുടങ്ങുമ്പോള്‍ കുഴഞ്ഞു വീഴുകയായിരുന്നു. തുടര്‍ന്ന് പി.ആര്‍.എസ് ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. പരേതനായ നീലകണ്ഠപ്പിള്ളയുടെയും ഏജീസ് ഓഫീസ് ഉദ്യോഗസ്ഥയായിരുന്ന ജലജയുടെയും മകളാണ്. 
മുരളിയുടെ കലാ ജീവിതത്തിന്റെ താങ്ങും തണലുമായിരുന്നു അഞ്ജന.ക്യാമറയ്ക്ക് പിന്നില്‍ നിന്ന് മുരളിയെ പ്രോല്‍സാഹിപ്പിക്കാനായിരുന്നു അവരുടെ താല്‍പ്പര്യം. തിരിച്ചടികളുണ്ടാകുമ്പോള്‍ താങ്ങും തണലുമായി അഞ്ജനയുണ്ടായിരുന്നു. പത്രപ്രവര്‍ത്തകനില്‍ നിന്ന് നടനും തിരക്കഥാകൃത്തും ഗായകനുമൊക്കെയായി മാറിയ മുരളി ഗോപിയുടെ യഥാര്‍ത്ഥ ശക്തി ഭാര്യയായിരുന്നു. മുരളിയുടെ സുഹൃത്തുക്കളോടും സഹപ്രവര്‍ത്തകരോടും അടുത്ത പരിചയം സൂക്ഷിച്ചിരുന്ന വ്യക്തി കൂടിയായിരുന്നു അഞ്ജന.
മലയാളത്തിലെ ഏറ്റവും മികച്ച നടന്മാരില്‍ ഒരാളായിരുന്ന ഭരത് ഗോപിയുടെ മകന്‍. പത്രപ്രവര്‍ത്തകനായാണ് ജോലി തുടങ്ങുന്നത്. അതിനിടെ വിവാഹവും കഴിഞ്ഞു. അച്ഛന്റെ രോഗവും ചികില്‍സയുമെല്ലാം നിറഞ്ഞ കാലം. കണ്ടതും കേട്ടതുമെല്ലാം മനസ്സിലൊതുക്കി മുരളി നീങ്ങി. ജേര്‍ണലിസം പഠിച്ച് ഇംഗ്ലീഷ് പത്രത്തില്‍ ജോലിക്കും കയറി. അപ്പോഴും മനസ്സ് നിറയെ സിനിമയായിരുന്നു. അച്ഛന്റെ വഴിയേ നീങ്ങാനായിരുന്നു ആഗ്രഹം. അതിനിടെയില്‍ ഭരത് ഗോപിയും വിട്ടുപരിഞ്ഞു. പിന്നീട് അഞ്ജനയുടെ പ്രേരണയാല്‍ സിനിമ ലോകത്ത് പ്രതീക്ഷകളര്‍പ്പിച്ചു. പത്രപ്രവര്‍ത്തകനെന്ന നിലയില്‍ കിട്ടിയ സൗഹൃദങ്ങളുടെ കുരത്തില്‍ മുരളി സിനിമാ ലോകത്തിലെത്തി.
എല്ലാ വിധ പിന്തുണയുമായി അഞ്ജ ഒപ്പം നിന്നു. മികച്ച ശമ്പളമുള്ള പത്രവര്‍ത്തന ജോലി ഉപേക്ഷിക്കാനും സിനിമയില്‍ കൈനോക്കാനും മുരളിക്ക് താങ്ങും തണലുമായത് ഭാര്യയായിരുന്നു. ലാല്‍ ജോസിനൊപ്പം രസികന്‍ വലിയ വിജയമായിരുന്നില്ല. അതില്‍ വില്ലന്‍ വേഷവും സക്രിപ്റ്റും ചെയ്തു. ബോക്‌സ് ഓഫീസില്‍ ശ്രദ്ധിക്കപ്പെട്ടില്ലെങ്കിലും മുരളിയുടെ പ്രതിഭ തരിച്ചറിഞ്ഞു. പിന്നെ ഭ്രമരമെത്തി. മോഹന്‍ലാലിനൊപ്പം മുരളി തകര്‍ത്തഭിനയിച്ചതോടെ ഗോപിയുടെ മകന്റെ അഭിനയ കരുത്ത് മലയാളി തിരിച്ചറിഞ്ഞു. ഈ അടുത്ത കാലത്തിന് രചനയൊരുക്കി ന്യൂ ജെനറേഷന്‍ സിനിമകള്‍ക്ക് പുതുവഴിയും മുരളി തെളിച്ചു. പന്നീട് ലെഫ്റ്റ് റൈറ്റ് ലെഫ്റ്റ് പറഞ്ഞ് മുന്നോട്ട് നീങ്ങമ്പോഴും കുടുംബമായിരുന്നു മുരളിയുടെ കരുത്ത്.
സിനിമയുടെ ഗ്ലാമറിന് പിന്നില്‍ നില്‍ക്കാനായിരുന്നു അഞ്ജനയ്ക്ക് താല്‍പ്പര്യം. ജോലിയും മക്കളുടെ പഠനകാര്യവും നോക്കി അവര്‍ മുരളിക്ക് എല്ലാ പിന്തുണയും നല്‍കി. അതു തന്നെയായിരുന്നു രണ്ടാം വരവില്‍ മലയാള സിനിമയിലെ പ്രധാനിയായി മുരളിയെ മാറ്റിയത്. അതിനാണ് അകാലത്തില്‍ അവസാനമാകുന്നത്. ഹൃദയാഘാതത്തെ തുടര്‍ന്ന് ഭാര്യ വിടവാങ്ങുമ്പോള്‍ മുരളിയെന്ന കുടുംബസ്ഥന് അത് താങ്ങാവുന്നതിലും അപ്പുറമാണ്. എന്നും താങ്ങും തണലുമായി നിന്ന ജീവിത സഖിയാണ് വിടവാങ്ങുന്നത്. യഥാര്‍ത്ഥത്തില്‍ മുരളിയെന്ന പ്രതിഭയെ ആത്മവിശ്വാസം നല്‍കി മലയാളത്തിന് സമ്മാനിച്ച വ്യക്തിത്വമാണ് വിടവാങ്ങുന്നത്.
രണ്ട് കുട്ടികളാണ് അഞ്ജനയ്ക്കും മുരളി ഗോപിക്കും. മൂത്ത മകള്‍ ഗൗരി പത്തിലും രണ്ടാമത്തെ മകന്‍ ഗൗരവ് രണ്ടാം ക്ലാസിലും പഠിക്കുന്നു. അന്തരിച്ച നീലകണ്ഠ പിള്ളയുടെയും ജലജയുടെയും മകളാണ് അഞ്ജന. അഖിലേഷാണ് ഏക സഹോദരന്‍. സ്വകാര്യതയ്ക്ക് വളരെ ഏറെ പ്രാധാന്യം നല്‍കുന്ന മുരളി ഗോപി പൊതു പരിപാടികളില്‍ അധികം കുടുംബത്തോടൊപ്പം പങ്കെടുത്തിരുന്നില്ല. എന്നാല്‍ തനിക്ക് എല്ലാ പിന്തുണയും നല്‍കുന്നത് ഭാര്യയയാണെന്ന് ഒരു അഭിമുഖത്തില്‍ നടന്‍ പറഞ്ഞിരുന്നു. അതിനപ്പുറത്തേക്ക് മാദ്ധ്യമങ്ങളിലൂടെ നിറയാന്‍ അഞ്ജനയും ആഗ്രഹിച്ചില്ലെന്നതാണ് സത്യം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha