കഴിഞ്ഞ ജന്മത്തിലെ ശത്രുക്കള്‍ ഈ ജന്മത്തില്‍ മക്കളായി ജനിയ്ക്കുമെന്ന് പുരാണത്തില്‍ പറയുന്നത് ശരിയാണ്. അല്ലെങ്കില്‍ സിപിഎം സംസ്ഥാന സെക്രട്ടറിയായ കോടിയേരി ബാലകൃഷ്ണന്റെ അവസ്ഥ നോക്കണേ. അദ്ദേഹം കാരണം ഒരു പേരു ദോഷവും വരുത്തിയിട്ടില്ല. പക്ഷെ എന്തിന് തടി മിടുക്കന്‍മാരായ മക്കളുണ്ടല്ലോ പേരുദോഷം കേള്‍പ്പിക്കാന്‍. മൂത്തമകന്‍ ബിനോയ് കോടിയേരരി ഉണ്ടാക്കിയതിന്റെ നാണക്കേട് ഇപ്പോഴും മാറിയിട്ടില്ല. ഒരുനാള്‍ രാജി വയ്ക്കാന്‍ പോലും കോടിയേരി ഇരുന്നതാണ്. എന്നാല്‍ പാര്‍ട്ടിയുടെ ശക്തമായ പിന്തുണ ഒന്നു കൊണ്ട് മാത്രമാണ് അന്ന് രക്ഷപ്പെട്ടത്.

ബിനോയ് കോടിയേരിക്കെതിരെ ഉണ്ടായ ലൈംഗികാരോപണ കേസാണ് അന്ന് ആകെ വെട്ടിലാക്കിയത്. ഡാന്‍സ് ബാര്‍ ജീവനക്കാരിയായ യുവതിയാണ് പരാതിയുമായി രംഗത്തെത്തിയിരിക്കുന്നത്. വിവാഹ വാഗ്ദാനം നല്‍കി പീഡിപ്പിച്ചുവെന്നാണ് പരാതി. വിവാഹ വാഗ്ദാനം നല്‍കി 2009 മുതല്‍ 2018 വരെ പീഡിപ്പിച്ചെന്നുവെന്നാണ് യുവതിയുടെ പരാതിയില്‍ പറയുന്നത്. ബന്ധത്തില്‍ എട്ടു വയസ്സുള്ള കുട്ടിയുണ്ടെന്നും യുവതി പറയുന്നു. അന്ധേരിയിലെ ഒഷിവാര പൊലീസ് സ്‌റ്റേഷനിലാണ് മുപ്പത്തിമൂന്നുകാരിയായ യുവതി പരാതി നല്‍കിയത്. പരാതിയുടെ അടിസ്ഥാനത്തില്‍ മുംബൈ ഓഷിവാര പൊലീസ് കേസെടുത്തു .

പരാതിക്കാരിയെ അറിയാമെന്ന് പറഞ്ഞ ബിനോയ് കോടിയേരി ഇത് ബ്ലാക്ക് മെയിലിങ്ങാണെന്നാണ് വിശദീകരിച്ചത്. ഈ കേസില്‍ നിന്നും വലിയ പാടുപെട്ടാണ് ബിനോയ് തടിയൂരിയത്. നവോത്ഥാനം ശബരിമലയ്ക്ക് മാറ്റി നവോത്ഥാനം വീട്ടിലേക്ക് ആക്കണമെന്നാണ് ശബരിമല വിഷയം മുന്‍നിര്‍ത്തി ബിജെപി നേതാക്കള്‍ ഇപ്പോഴും കളിയാക്കി കൊണ്ടിരിക്കുന്നത്.

അതേസമയം സിനിമാ നടന്‍ കൂടിയായ ഇളയമകന്‍ ബിനീഷ് കോടിയേരിയാണ് ഇപ്പോള്‍ കളം നിറയുന്നത്. മയക്ക് മരുന്ന് മാഫിയ അറസ്റ്റിലായതോടെയാണ് ബിനീഷ് കോടിയേരിയുടെ പേര് ഒളിഞ്ഞും തെളിഞ്ഞും വന്നത്. ഇതോടെ ബിജെപി ആരോപണം ശക്തമാക്കുകയും ചെയ്തു.

രാജ്യാന്തര സ്വര്‍ണക്കള്ളക്കടത്ത് കേസില്‍ മുഖ്യമന്ത്രിയുടെ ഓഫിസിന് മാത്രമല്ല എകെജി സെന്ററിനും ബന്ധമെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞത്. ദേശീയ അന്വേഷണ ഏജന്‍സി നല്‍കിയ റിമാന്‍ഡ് റിപ്പോര്‍ട്ടില്‍ സ്വര്‍ണക്കള്ളക്കടത്തില്‍ മതതീവ്രവാദികള്‍ക്ക് ബന്ധമുണ്ടെന്ന് പറയുന്നുണ്ടെന്നും സുരേന്ദ്രന്‍ പറഞ്ഞു.

തീവ്രവാദ സംഘടനകളുമായും ബന്ധമുള്ള സ്വര്‍ണക്കടത്ത് കേസിന് മയക്കുമരുന്ന് വാഹകരുമായും ബന്ധമുണ്ടെന്നത് ഞെട്ടിക്കുന്നതാണ്. ബെംഗളൂരുവില്‍ പിടിയിലായ രാജ്യാന്തര മയക്കുമരുന്ന് മാഫിയ കണ്ണി അനൂപ് മുഹമ്മദ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മകന്‍ ബിനീഷ് കോടിയേരിയുടെ ബെനാമി പാര്‍ട്ണറാണ്. കര്‍ണാടകയിലെയും കേരളത്തിലെയും ചില സിനിമാതാരങ്ങള്‍ക്കും മയക്കുമരുന്ന് സംഘവുമായി ബന്ധമുണ്ടെന്നാണ് നാര്‍ക്കോട്ടിക്ക് സെല്ലിന്റെ ചോദ്യം ചെയ്യലില്‍ മനസിലായിരിക്കുന്നത്. 2012 മുതല്‍ മുഹമ്മദ് അനൂപും സംഘവും മയക്കുമരുന്നു കച്ചവടം നടത്തുകയാണ്. ഇയാളുമായി അപ്പോള്‍ മുതല്‍ ബന്ധമുണ്ടെന്ന് ബിനീഷ് കോടിയേരി സമ്മതിക്കുകയും ചെയ്തുവെന്നും സുരേന്ദ്രന്‍ പറഞ്ഞു.

അതേ സമയം അനൂപുമായി നല്ല സൗഹൃദത്തിലാണെന്നും പണം കടം കൊടുത്തതായും ബിനീഷ് കോടിയേരി വ്യക്തമാക്കിയതോടെ പ്രതിരോധ ശ്രമങ്ങളും പാളി. പുറത്ത് വരുന്ന തെളിവുകളും ബിനീഷിനെ വെള്ളം കുടിപ്പിക്കുന്നതാണ്. അനൂപ് മുഹമ്മദ് ബിനീഷ് കോടിയേരിയെ പതിവായി വിളിക്കാറുണ്ടെന്ന ഫോണ്‍ രേഖകളും പുറത്തായിരിക്കുകയാണ്. അനൂപിന്റെ നമ്പറില്‍ നിന്ന് ബിനീഷ് കോടിയേരിയുടെ 456ല്‍ അവസാനിക്കുന്ന മൊബൈല്‍ നമ്പറിലേക്കായിരുന്നു കോളുകള്‍.

അനൂപ് മുഹമ്മദിന് ബെംഗളൂരുവില്‍ സാമ്പത്തിക സഹായം നല്‍കിയത് ബിനീഷ് കോടിയേരിയുടെ ബെംഗളൂരുവിലെ ധനകാര്യ സ്ഥാപനത്തിന്റെ മറവിലെന്ന് ആരോപണമുണ്ട്. ഇതിന് പിന്നാലെയാണ് കോള്‍ ലിസ്റ്റും പുറത്തായത്.

പറഞ്ഞിട്ട് കാര്യമില്ല. രണ്ട് മക്കളും ഓരോരോ പൊല്ലാപ്പില്‍ ചെന്ന് ചാടിയതിന്റെ ദു:ഖത്തിലാണ് കോടിയേരി. എല്ലാത്തിനും അച്ഛന്‍ തന്നെ മറുപടി പറയുകയെന്നു വച്ചാല്‍...