കോഴിക്കോട് ജില്ലയിലെ ചക്കിട്ടപാറയില്‍ കൃഷിയിടത്തില്‍ കുരങ്ങ്,പന്നി എന്നിവ ഉള്‍പ്പെടെയുള്ള വന്യമൃഗങ്ങള്‍ നാശം വിതയ്ക്കുന്നു. കാട്ടുപന്നികളെ ഉപാധികളോടെ വെടിവയ്ക്കാന്‍ സര്‍ക്കാര്‍ തീരുമാനം ഉണ്ടെങ്കിലും അപേക്ഷകള്‍ നല്‍കി വനം വകുപ്പിന്റെ അനുമതിക്കായുള്ള കര്‍ഷകരുടെ കാത്തിരിപ്പ് നീളുന്നു.

ചക്കിട്ടപാറ പഞ്ചായത്തില്‍ 4-ാം വാര്‍ഡിലെ പൂഴിത്തോട് മൂങ്ങാംമാക്കല്‍ ജോര്‍ജ് മാത്യു എന്ന ബേബി കഴിഞ്ഞ 7 വര്‍ഷമായി തോക്ക് ലൈസന്‍സിനായി ഒട്ടേറെ തവണ വനം വകുപ്പ് ഓഫിസ് കയറിയിറങ്ങി. 1989 മുതല്‍ 2013 വരെ ഈ കര്‍ഷകന് തോക്ക് ലൈസന്‍സ് ഉണ്ടായിരുന്നു. 2013-ല്‍ ലൈസന്‍സ് പുതുക്കാന്‍ കലക്ടര്‍ക്ക് അപേക്ഷ നല്‍കി. എന്നാല്‍ വന്യജീവി സങ്കേതത്തിനു സമീപമാണ് കൃഷി ഭൂമിയെന്ന പേരില്‍ വനം വകുപ്പിന്റെ എതിര്‍പ്പും പ്രശ്‌നബാധിത മേഖലയ്ക്ക് അടുത്താണ് എന്ന പൊലീസിന്റെ റിപ്പോര്‍ട്ടും കാരണം ലൈസന്‍സ് പുതുക്കി കിട്ടിയില്ല. ബേബിയുടെ കൃഷിയിടത്തില്‍ കുരങ്ങ്,പന്നി എന്നിവ ഉള്‍പ്പെടെയുള്ള വന്യമൃഗങ്ങള്‍ നാശം വിതയ്ക്കുന്നതോടെ കാര്‍ഷിക വരുമാനം നിലച്ചിരിക്കുകയാണ്. കരിക്ക് പൂര്‍ണമായും കുരങ്ങ് നശിപ്പിച്ചു. ഇടവിള കൃഷികള്‍ കാട്ടുപന്നിക്കൂട്ടം തകര്‍ക്കുകയും ചെയ്തു.

കാര്‍ഷിക വിളകള്‍ വന്യമൃഗങ്ങളില്‍ നിന്നും സംരക്ഷിക്കുന്നതിനായി 2017-ല്‍ കര്‍ഷകന്‍ ലൈസന്‍സിന് വേണ്ടി ഹൈക്കോടതിയില്‍ കേസ് ഫയല്‍ ചെയ്തു. കോടതി കലക്ടര്‍ക്ക് നോട്ടിസ് നല്‍കിയപ്പോള്‍ തോക്ക് ലൈസന്‍സ് റദ്ദാക്കിയതായി കലക്ടര്‍ റിപ്പോര്‍ട്ട് നല്‍കി. പിന്നീട് തിരുവനന്തപുരം ലാന്‍ഡ് റവന്യു കമ്മിഷണര്‍ക്ക് പുനഃപരിശോധന ഹര്‍ജി നല്‍കുകയും 4 തവണ ഹിയറിങ്ങിനു ഹാജരാകുകയും ചെയ്തു. ലൈസന്‍സ് അപേക്ഷ പുനഃപരിശോധിക്കണമെന്ന് കോഴിക്കോട് എഡിഎമ്മിനു ഉത്തരവ് നല്‍കി. പെരുവണ്ണാമൂഴി പൊലീസ് തോക്ക് ലൈസന്‍സിന് അനുകൂലമായ റിപ്പോര്‍ട്ട് നല്‍കിയിട്ടുണ്ട്. എഡിഎം വനം വകുപ്പിനോട് റിപ്പോര്‍ട്ട് ആവശ്യപ്പെട്ട് അയച്ച ഫയല്‍ ഡിവിഷനല്‍ ഫോറസ്റ്റ് ഓഫിസിലാണ് ഉള്ളത്. ഡിഎഫ്ഒയുടെ ഓഫിസില്‍ നിന്നും ഫയല്‍ തീര്‍പ്പാക്കാത്തതാണു പ്രശ്‌നം.

കാട്ടുപന്നിയെ വെടിവയ്ക്കാന്‍ ചക്കിട്ടപാറ പഞ്ചായത്തില്‍ ഒരാള്‍ക്ക് മാത്രമാണ് അനുമതി നല്‍കിയത്. വനാതിര്‍ത്തിയില്‍ നിന്നുള്ള ബഫര്‍ സോണ്‍ പ്രശ്‌നവും തടസ്സമാണെന്നു അറിയുന്നു. മലയോര മേഖലയിലെ നൂറുകണക്കിനു കര്‍ഷകര്‍ കൃഷി ഭൂമിയിലെ ആദായം പൂര്‍ണമായും നഷ്ടപ്പെടുന്ന സ്ഥിതിയിലാണ്. തെങ്ങുകളില്‍ കരിക്ക് പൂര്‍ണമായും കുരങ്ങ് നശിപ്പിക്കുകയാണ്.

കര്‍ഷകന്‍ തോക്ക് ലൈസന്‍സിനു നല്‍കിയ അപേക്ഷയിന്മേല്‍ റിപ്പോര്‍ട്ടിനായി പെരുവണ്ണാമൂഴി റേഞ്ച് ഫോറസ്റ്റ് ഓഫിസര്‍ക്ക് അയച്ചിട്ടുണ്ടെന്നു ഡിഎഫ്ഒ എം.രാജീവന്‍ അറിയിച്ചു.