സ്വര്‍ണക്കടത്തു കേസില്‍ ആരോപണവിധേയനായ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനെതിരേ വിജിലന്‍സ് അന്വേഷണം ഉടന്‍ പ്രഖ്യാപിച്ചേക്കും
സ്വര്‍ണക്കടത്തു കേസില്‍ ആരോപണവിധേയനായ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനെതിരേ വിജിലന്‍സ് അന്വേഷണം. ഐടി വകുപ്പിനു കീഴിലുള്ള കെ.എസ്.ഐ.ടി.ഐ.എല്ലില്‍ ശിവശങ്കര്‍ ഇടപെട്ടു നടത്തിയ നിയമനങ്ങളാണ് അന്വേഷിക്കുന്നത്. സ്വര്‍ണക്കടത്തു കേസ് പ്രതി സ്വപ്ന സുരേഷ് കെ.എസ്.ഐ.ടി.ഐ.എല്ലിനു കീഴിലെ സ്പേസ് പാര്‍ക്കില്‍ വ്യാജ സര്‍ട്ടിഫിക്കറ്റ് ഹാജരാക്കി ജോലി നേടിയതും ഇതില്‍ ശിവശങ്കറിന്റെ ഇടപെടലും വിവാദമായിരുന്നു. വിജിലന്‍സ് അന്വേഷണം സംബന്ധിച്ച ഫയല്‍ ചീഫ് സെക്രട്ടറി ബിശ്വാസ് മേത്ത മുഖ്യമന്ത്രിയുടെ ഓഫീസിനു കൈമാറിയെന്നാണു വിവരം. അന്വേഷണം ഉടന്‍ പ്രഖ്യാപിച്ചേക്കും.
കെ.എസ്.ഐ.ടി.ഐ.എല്‍: എം.ഡിയെ കാണാന്‍ സ്വപ്നയോട് ശിവശങ്കര്‍ ആവശ്യപ്പെട്ടിരുന്നതായി എന്‍ഫോഴ്സ് ഡയറക്ടറേറ്റ് (ഇ.ഡി) കുറ്റപത്രത്തില്‍ ചൂണ്ടിക്കാട്ടിയിരുന്നു. മുഖ്യമന്ത്രിയുടെ ഓഫീസിലെ മുന്‍ ഐ.ടി. ഫെലോ അരുണ്‍ ബാലചന്ദ്രനും മതിയായ യോഗ്യതയില്ലാതെയാണു നിയമനം നേടിയതെന്നു പ്രതിപക്ഷം ആരോപിച്ചിരുന്നു.
യു.എസ്. പൗരത്വമുള്ള ഒരു വനിതയ്ക്ക് ഐടി സ്റ്റാര്‍ട്ടപ്പ് മിഷനില്‍ ജോലി നല്‍കിയതും വിവാദമായി. ഐടി വകുപ്പിലെ കരാര്‍ നിയമനങ്ങളെക്കുറിച്ച് സര്‍ക്കാര്‍ നിയോഗിച്ച അഞ്ചംഗ സമിതിയുടെ അന്വേഷണം തുടരുകയാണ്. എന്നാല്‍ ലൈഫ് മിഷന്‍ വിജിലന്‍സ് അന്വേഷണം ഇഴയുന്നതായി ആക്ഷേപമുണ്ട്. ശിവശങ്കറിന്റെ മൊഴി ഉടന്‍ രേഖപ്പെടുത്താന്‍ നോട്ടീസ് നല്‍കും. കേസുമായി ബന്ധപ്പെട്ട ഫയലുകള്‍ കോടതിയിലാണ്.
"
https://www.facebook.com/Malayalivartha
