വധശിക്ഷയ്ക്ക് വിധിക്കപ്പെട്ട പോലീസ് ഉദ്യോഗസ്ഥന് കാന്സര് ബാധിച്ചു മരിച്ചു, ഉദയകുമാര് ഉരുട്ടിക്കൊല കേസില് തുടര് ചികിത്സകള്ക്കായി അനുവദിച്ച ജാമ്യത്തില് കഴിയവേ മരണം
മുന് പോലീസ് ഉദ്യോഗസ്ഥനും ഉദയകുമാര് ഉരുട്ടിക്കൊല കേസില് പ്രതിയുമായ നെയ്യാറ്റിന്കര കോണ്വെന്റ് റോഡ് തങ്കം ബില്ഡിംഗ്സില് ശ്രീകുമാര് (44) കാന്സര് ബാധിച്ചു മരിച്ചു. വധശിക്ഷയ്ക്ക് വിധിക്കപ്പെട്ട ശ്രീകുമാര് രോഗബാധ കണ്ടെത്തിയതിന് പിന്നാലെ കഴിഞ്ഞ മൂന്ന് വര്ഷങ്ങളായി ചികിത്സയിലായിരുന്നു. നെയ്യാറ്റിന്കരയിലെ സ്വകാര്യ ആശുപത്രിയില് തുടരവെ ഇന്നലെ വൈകുന്നേരം 5.30-നാണ് മരിച്ചത്.
സര്വീസിലിരിക്കെ വധശിക്ഷ ലഭിക്കുന്ന അപൂര്വ്വതയാണ് ഈ കേസില് സംഭവിച്ചത്. ഒന്നാംപ്രതി കെ.ജിതകുമാറായിരുന്നു. കേസിലെ രണ്ടാം പ്രതിയായ ശ്രീകുമാറിന് വധശിക്ഷയും പിഴയുമാണ് 2018-ല് സി.ബി.ഐ പ്രത്യേക കോടതി വിധിച്ചത്. 13 വര്ഷത്തിന് ശേഷമായിരുന്നു വിധി വന്നത്. കാന്സര് ചികിത്സയില് തുടരവെ ശ്രീകുമാറിന് കൊവിഡും ബാധിച്ചിരുന്നു. തുടര് ചികിത്സകള്ക്കായി അനുവദിച്ച ജാമ്യത്തില് കഴിയുമ്പോഴാണ് മരണം.
കോനിഡ് പോസിറ്റീവ് ആയെങ്കിലും പിന്നീട് കൊവിഡ് വിമുക്തനായിരുന്നു. മലപ്പുറത്ത് ഹയര് സെക്കന്ഡറി സ്കൂള് അദ്ധ്യാപികയായ ലക്ഷ്മിപ്രിയ ആണ് ഭാര്യ. മകള് പ്ലസ് ടൂ വിദ്യാര്ത്ഥിനി ശ്രീപാര്വ്വതി. അവസാനമായി തിരുവനന്തപുരത്ത് കന്റോണ്മെന്റ് സ്റ്റേഷനിലാണ് ശ്രീകുമാര് ജോലി നോക്കിയത്.
കേസിലെ മൂന്നാംപ്രതി കെ.വി. സോമനും വിചാരണവേളയില് മരണമടഞ്ഞിരുന്നു. ആദ്യ മൂന്ന് പ്രതികളും കുറ്റകൃത്യത്തില് നേരിട്ടു പങ്കെടുത്തതായിട്ടാണ് സിബിഐ കോടതി കണ്ടെത്തിയത്. കേസിലെ മറ്റ് മൂന്ന് പ്രതികളായ പോലീസുകാര്ക്ക് മൂന്ന് വര്ഷം തടവാണ് വിധിച്ചത്. മോഷണക്കുറ്റം ആരോപിച്ച് കസ്റ്റഡിയില് എടുത്ത ഉദയകുമാര് 2005 സെപ്തംബര് 27-നായിരുന്നു മരിച്ചത്.
https://www.facebook.com/Malayalivartha
