തലേന്ന് കിടക്കുന്നതിന് മുമ്പ് ഒന്നുകൂടി സ്വയം ഓര്‍മ്മിപ്പിക്കും. രാവിലെ നേരത്തേ എഴുന്നേല്‍ക്കണം, പാല്‍ വാങ്ങാന്‍ പോകണമല്ലോ എന്ന്...! എന്നാല്‍ തിരുവനന്തപുരം, കൊച്ചി, കോഴിക്കോട് ജില്ലാക്കാര്‍ക്കൊന്നും അങ്ങനൊരു ടെന്‍ഷനേ ഇപ്പോഴില്ല. രാവിലെ മില്‍മ പടിക്കലെത്തും. പാല്‍ മാത്രമല്ല, പാലുല്‍പന്നങ്ങളും പച്ചക്കറിയും മുതല്‍ ഇറച്ചി വരെയും മില്‍മ വീട്ടിലെത്തിക്കും. തിരുവനന്തപുരം, കൊച്ചി, കോഴിക്കോട് ജില്ലകളില്‍ വിജയകരമായി മുന്നേറുന്ന മില്‍മയുടെ ഓണ്‍ലൈന്‍ വിതരണ സംരംഭം ഇന്നു മുതല്‍ തൃശൂരിലും ആരംഭിക്കുകയാണ്.

നഗര പരിധിയിലാണ് ആദ്യഘട്ടത്തില്‍ വിതരണം. എഎം നീഡ്‌സ് (AM Needs) എന്ന ഓണ്‍ലൈന്‍ ആപ് വഴി മില്‍മയുടെ ഉല്‍പന്നങ്ങളും പ്രമുഖ കമ്പനികളുടെ ചപ്പാത്തി, ദോശ- ഇഡ്ഡലി മാവ്, പുട്ട്-അപ്പം പൊടി എന്നിവയും ഓര്‍ഡര്‍ ചെയ്യാം.

സപ്ലൈകോ, മത്സ്യഫെഡ്, മീറ്റ് പ്രോഡക്ട്‌സ് ഓഫ് ഇന്ത്യ, നാളികേര വികസന കോര്‍പറേഷന്‍, ഹോര്‍ട്ടികോര്‍പ്, വിഎഫ്പിസികെ എന്നീ സ്ഥാപനങ്ങളുമായി സഹകരിച്ച് മഞ്ഞള്‍പ്പൊടി, മല്ലിപ്പൊടി, ചായപ്പൊടി, കാപ്പിപ്പൊടി തുടങ്ങിയ നിത്യോപയോഗ സാധനങ്ങളുടെയും മത്സ്യ-മാംസ ഉല്‍പന്നങ്ങളുടെയും 'കേരജം' വെളിച്ചെണ്ണ, പച്ചക്കറികള്‍ എന്നിവയുടെയും വിതരണം ഉടന്‍ ആരംഭിക്കും. വിപണി വിലയേക്കാള്‍ 20 % വരെ കുറവില്‍ ലഭ്യമാക്കുകയാണ് ലക്ഷ്യം.

ജില്ലാതല ഉദ്ഘാടനം ഇന്നു 11-നു പേള്‍ റീജന്‍സിയില്‍ മന്ത്രി വി.എസ്.സുനില്‍കുമാര്‍ നിര്‍വഹിക്കും. മില്‍മ എറണാകുളം മേഖലാ ചെയര്‍മാന്‍ ജോണ്‍ തെരുവത്ത് അധ്യക്ഷത വഹിക്കും. മില്‍മ ഫെഡറേഷന്‍ ചെയര്‍മാന്‍ പി.എ.ബാലന്‍ പ്രസംഗിക്കും.

പ്ലേ സ്റ്റോര്‍, ഐഒഎസ് എന്നിവയില്‍ നിന്ന് ആപ് ഡൗണ്‍ലോഡ് ചെയ്യാം. ലോഗിന്‍ ചെയ്ത് ഓര്‍ഡറുകള്‍ നല്‍കാം. 97468 11118 എന്ന നമ്പറില്‍ വിളിച്ചും (വാട്‌സാപ് മുഖേനയും) ഓര്‍ഡര്‍ നല്‍കാം. വിതരണ സമയം 5 മുതല്‍ 8 വരെ (രാവിലെ മാത്രം).

തലേന്നു രാത്രി 8 വരെ ഓര്‍ഡര്‍ ചെയ്യാം. ഡെലിവറി ദിനങ്ങള്‍ ഇഷ്ടാനുസരണം തിരഞ്ഞെടുക്കാം. വീട്ടില്‍ ആളില്ലെങ്കില്‍ വിതരണം 'പോസ്' ചെയ്ത് മറ്റൊരു ദിവസത്തേക്കു മാറ്റാനും സൗകര്യമുണ്ട്.

തിരുവനന്തപുരത്തും കൊച്ചിയിലും കോഴിക്കോട്ടുമായി ഇതുവരെ 15 മാസത്തിനിടെ പത്തുലക്ഷം വിതരണം പൂര്‍ത്തീകരിച്ചു. ആപ് ഡൗണ്‍ലോഡ് ചെയ്തത് ഒരു ലക്ഷത്തോളം പേര്‍. റജിസ്റ്റര്‍ ചെയ്ത 35,000 ഉപഭോക്താക്കള്‍. പ്രതിദിനം 3000 വീടുകളില്‍ വിതരണം 1.5 കോടി രൂപയുടെ പ്രതിമാസ വിറ്റുവരവ്. ഇരുന്നൂറോളം വിതരണ ജീവനക്കാര്‍