കരിപ്പൂര്‍ വിമാന ദുരന്തം സിബിഐ അന്വേഷിക്കണമെന്ന ഹരജി ഹൈക്കോടതി തള്ളി.സംഭവത്തില്‍ അന്വേഷണം ആവശ്യപ്പെട്ട് അഭിഭാഷകനായ യശ്വന്ത് ഷേണായി നല്‍കിയ ഹരജിയാണ് ചീഫ് ജസ്റ്റിസ് എസ് മണികുമാര്‍ അധ്യക്ഷനായ ബെഞ്ച് തള്ളിയത്. സുപ്രിം കോടതിയില്‍ നിന്നോ ഹൈക്കോടതിയില്‍ നിന്നോ വിരമിച്ച ജഡ്ജിയുടെ നേതൃത്വത്തിലാണ് നിഷ്പക്ഷമായ അന്വേഷണം ആവശ്യപ്പെട്ടത്.

വിമാനാപകടങ്ങള്‍ അന്വേഷിക്കുന്നതിന് കൃത്യമായ നടപടിക്രമം ഉണ്ടെന്നും നിലവില്‍ അന്വേഷണം നടക്കുന്നതിനാല്‍ ഇടപെടാനാകില്ലെന്നും കോടതി വ്യക്തമാക്കി. അന്വേഷണത്തില്‍ എന്തെങ്കിലും കുറവ് കണ്ടെത്തിയാല്‍ കേന്ദ്രത്തിന് ഉചിതമായ സമയത്ത് ഉചിതമായ തീരുമാനമെടുക്കാമെന്നും കോടതി പറഞ്ഞു. ചീഫ് ജസ്റ്റിസിനെ കൂടാതെ ജസ്റ്റിസ് ഷാജി പി ചാലിയും ബെഞ്ചിലുണ്ടായിരുന്നു. ദുബൈയില്‍ നിന്ന് വരികയായിരുന്ന വിമാനമാണ് കരിപ്പൂര്‍ വിമാനത്താവളത്തില്‍ ഓഗസ്റ്റ് ഏഴിന് അപകടത്തില്‍പ്പെട്ടത്. സംഭവത്തില്‍ 19 യാത്രക്കാരും രണ്ട് പൈലറ്റുമാരും മരിച്ചു.