വിദ്യാഭ്യാസ വകുപ്പ് 10, 12 ക്ലാസുകളുടെ ഡിജിറ്റല്‍ ക്ലാസുകളുടെ എണ്ണം കൂട്ടുന്നു. പാഠഭാഗങ്ങള്‍ ജനുവരിയില്‍ പഠിപ്പിച്ചുതീര്‍ക്കാന്‍ ലക്ഷ്യമിട്ടാണ് നടപടി. കൈറ്റ് വിക്ടേഴ്‌സ് ചാനലില്‍ ഡിസംബര്‍ മുതല്‍ കൂടുതല്‍ സമയം നീക്കിവയ്ക്കും.

സാധാരണയായി ഡിസംബറിനകം പഠിപ്പിച്ചുതീര്‍ത്തു ജനുവരി മുതല്‍ റിവിഷന്‍ നടത്തുകയാണ് ചെയ്യുന്നത്. എന്നാല്‍ കോവിഡ് മൂലം ഇത് നടന്നില്ല. ഇപ്പോള്‍ പ്രതിദിനം ഒന്നര മണിക്കൂറില്‍ 3 ക്ലാസുകളാണ് 10,12 ക്ലാസുകാര്‍ക്ക് നല്‍കുന്നത്. ഇത് ഇരട്ടിയെങ്കിലുമാക്കിയാലേ ജനുവരിയില്‍ പഠിപ്പിച്ചുതീര്‍ക്കാനാകൂ. പിറകിലായ വിഷയങ്ങള്‍ക്ക് ഊന്നല്‍ നല്‍കിയാകും ക്ലാസ് പുനഃക്രമീകരണം.

വിദ്യാഭ്യാസ വകുപ്പ് സ്‌കൂളുകള്‍ തുറക്കാന്‍ തയാറാണെന്ന് അറിയിച്ചെങ്കിലും കോവിഡ് നിയന്ത്രണവിധേയമായ ശേഷം തീരുമാനിക്കാമെന്നാണ് സര്‍ക്കാരിന്റെ നിലപാട്.

ജനുവരി മുതല്‍ 10,12 ക്ലാസുകാര്‍ക്കെങ്കിലും സ്‌കൂളുകളില്‍ ക്ലാസ് നടത്താനാവുമെന്നാണ് പ്രതീക്ഷ. കോവിഡ് ബാധിതരുടെ എണ്ണം കുറഞ്ഞു തുടങ്ങിയതിനാല്‍ ഇതു സാധ്യമാവുമെന്നാണ് കരുതുന്നത്. എന്നാല്‍ തദ്ദേശ തിരഞ്ഞെടുപ്പിനു ശേഷം കോവിഡ് വ്യാപനം വര്‍ധിച്ചാല്‍ ഈ കണക്കുകൂട്ടലും തെറ്റും.

ഇപ്പോഴും വാര്‍ഷിക പരീക്ഷയുടെ കാര്യത്തില്‍ തീരുമാനമായിട്ടില്ല. ഏപ്രിലില്‍ നിയമസഭാ തിരഞ്ഞെടുപ്പ് പ്രതീക്ഷിക്കുന്നതിനാല്‍ മാര്‍ച്ചിലോ മേയിലോ മാത്രമേ പരീക്ഷ നടത്താനാകൂ. പ്രാക്ടിക്കല്‍ പരീക്ഷകള്‍ എങ്ങനെ നടത്തുമെന്ന പ്രശ്‌നവുമുണ്ട്. ഇതുവരെ പരീക്ഷകളൊന്നും നടക്കാത്തതിനാല്‍ വാര്‍ഷിക പരീക്ഷയ്ക്കു മുന്‍പ് മോഡല്‍ പരീക്ഷ നടത്തണമെന്ന നിര്‍ദേശവും പരിഗണനയിലുണ്ട്. മറ്റു ക്ലാസുകാര്‍ക്കു പരീക്ഷ നടത്തുന്നതിനെക്കുറിച്ച് ഇതുവരെ ചര്‍ച്ച നടന്നിട്ടില്ല.