തൃശൂർ കൊരട്ടിയില്‍ അരി ലോറിയില്‍ കടത്താന്‍ ശ്രമിച്ച 15 കിലോ കഞ്ചാവ് പിടികൂടി.സംഭവത്തില്‍ രണ്ടു പേരെ പോലീസ് കസ്റ്റഡിയിലെടുത്തു. ആലപ്പുഴ സ്വദേശി അനീഷ്, കൊല്ലം സ്വദേശി സജീവ് എന്നിവരാണ് പിടിയിലായത്. തൃശ്ശൂരില്‍ നിന്നു എറണാകുളത്തേക്ക് പോകുന്ന ലോറികളില്‍ നടത്തിയ പരിശോധനയ്ക്കിടെയാണ് കഞ്ചാവ് പിടികൂടിയത്. രഹസ്യ വിവരത്തെ തുടര്‍ന്ന് നടത്തിയ പരിശോധനയിലാണ് കഞ്ചാവ് പിടികൂടിയത്. അരിച്ചാക്കുകള്‍ക്കിടയില്‍ പോളിത്തീന്‍ കവറില്‍ പൊതിഞ്ഞ നിലയിലായിരുന്നു കഞ്ചാവ്.വിപണിയില്‍ 10 ലക്ഷത്തോളം വില വരുന്ന കഞ്ചാവാണ് പിടികൂടിയതെന്ന് പൊലീസ് വ്യക്തമാക്കി. ആന്ധയില്‍ നിന്നാണ് കഞ്ചാവെത്തിച്ചതെന്നും മധ്യ കേരളത്തിലെ വിവിധയിടങ്ങളില്‍ വില്‍പന നടത്താനായിരുന്നു പദ്ധതിയെന്നും പ്രതികള്‍ പറഞ്ഞു.