കൊയിലാണ്ടി ചങ്ങോട്ടുകാവ് ബൈപാസില്‍ നിയന്ത്രണംവിട്ട രണ്ട് കാറുകള്‍ കൂട്ടിയിടിച്ചുണ്ടായ അപകടത്തില്‍ പരുക്കേറ്റ് ചികിത്സയിലായിരുന്ന യുവാവ് മരിച്ചു. കരിമക്കാട്ട് നാസര്‍ ഹമീദിന്റെ മകന്‍ മുഹമ്മദ് ഇഹ്‌സാന്‍ (19) ആണ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ മരിച്ചത്. ഈ മാസം 13ന് രാവിലെ 11 മണിയോടെ ചെങ്ങോട്ടുകാവ് ഓവര്‍ബ്രിജിനു സമീപത്തെ സര്‍വീസ് റോഡിലായിരുന്നു അപകടം. നിയന്ത്രണംവിട്ട രണ്ട് കാറുകള്‍ കൂട്ടിയിടിച്ച് മറിയുകയായിരുന്നു.

കോഴിക്കോട് ഭാഗത്ത് നിന്നും വന്ന കാറും കണ്ണൂര്‍ ഭാഗത്തുനിന്ന് വന്ന കാറും നേര്‍ക്കുനേര്‍ ഇടിക്കുകയായിരുന്നു. ഇടിയുടെ ആഘാതത്തില്‍ പൂര്‍ണമായും തകര്‍ന്ന വാഹനങ്ങള്‍ക്കുള്ളില്‍ യാത്രക്കാര്‍ കുടുങ്ങി കിടക്കുകയായിരുന്നു. അപകടം നടന്നയുടന്‍ നാട്ടുകാരും, വിവരമറിഞ്ഞ് സ്ഥലത്തെത്തിയ കൊയിലാണ്ടി പൊലീസും ഫയര്‍ ഫോഴ്‌സും ചേര്‍ന്നാണ് രക്ഷാപ്രവര്‍ത്തനം നടത്തിയത്. വാഹനങ്ങള്‍ വെട്ടിപ്പൊളിച്ചാണ് ഉള്ളില്‍ കുടുങ്ങിയവരെ പുറത്തെടുത്തത്.

ഇഹ്‌സാന്‍ ഉള്‍പ്പെടെ എട്ടു പേര്‍ക്കാണ് അപകടത്തില്‍ പരുക്കേറ്റത്. ഇവരെ കൊയിലാണ്ടി താലൂക്ക് ആശുപത്രിയിലും തുടര്‍ന്നു വിദഗ്ധ ചികിത്സയ്ക്കായി കോഴിക്കോട് മെഡിക്കല്‍ കോളജ് ആശുപത്രിയിലേക്കും മാറ്റുകയായിരുന്നു. ദിവസങ്ങളായി തീവ്രപരിചരണ വിഭാഗത്തില്‍ തുടര്‍ന്ന ശേഷമാണ് ഇഹ്‌സാന്‍ മരണത്തിനു കീഴടങ്ങിയത്.