തിരുവനന്തപുരം കടക്കാവൂരില്‍ അമ്മ മകനെ ലൈംഗികമായി പീഡിപ്പിച്ചെന്ന കേസിലെ പ്രതിയായ യുവതിയുടെ ജാമ്യ ഹരജിയില്‍ സര്‍ക്കാറിന്റെ വിശദീകരണം തേടി ഹൈക്കോടതി . പതിമൂന്നു വയസുകാരനായ മകന്‍ നല്‍കിയ പരാതിയില്‍ അറസ്​റ്റിലായ യുവതിയുടെ ഹര്‍ജിയാണ്​ ഹൈക്കോടതി ജസ്​റ്റിസ്​ വി. ഷേര്‍സി പരിഗണിച്ചത്​.ഇക്കഴിഞ്ഞ ഡിസംബര്‍ 28നാണ്​ യുവതിയെ ജുഡീഷ്യല്‍ കസ്​റ്റഡിയില്‍ വിട്ടത്​. തിരുവനന്തപുരം പോക്​സോ കോടതി ജാമ്യഹരജി തള്ളിയതിനെത്തുടര്‍ന്നാണ്​ ഹൈകോടതിയെ സമീപിച്ചത്​. താനുമായുള്ള വിവാഹ ബന്ധം വേര്‍പെടുത്താതെ ഭര്‍ത്താവ് മറ്റൊരു സ്​ത്രീയെ വിവാഹം കഴിച്ച്‌​ താമസിക്കുകയായിരുന്നു, ഇത് ചോദ്യംചെയ്തതിനാണ് തന്നെ കള്ളക്കേസില്‍ കുടുക്കാന്‍ ശ്രമിക്കുന്നതെന്നാണ്​ ഹരജിക്കാരിയുടെ വാദം. ഹരജിക്കാരിയും മക്കളും താമസിക്കുന്ന വീട്ടില്‍തന്നെ ഭര്‍ത്താവ്​ രണ്ടാമത്​ വിവാഹം കഴിച്ച സ്​ത്രീയും താമസിക്കാന്‍ തുടങ്ങിയതോടെ കുട്ടികളെയും കൂട്ടി മാതാപിതാക്കള്‍ക്കൊപ്പം താമസിക്കുകയായിരുന്നു. കുട്ടികളെ തന്നോടൊപ്പം വിടണമെന്നും ജീവനാംശം ലഭിക്കണമെന്നും ആവശ്യപ്പെട്ട് കേസും നല്‍കി. ഇതിനുപിന്നാലെ മൂന്നാഴ്ച കഴിഞ്ഞപ്പോള്‍ ഭര്‍ത്താവ് മൂന്ന് കുട്ടികളെ കൂട്ടിക്കൊണ്ടുപോയി. തുടര്‍ന്നാണ്​​ രണ്ടാമത്തെ മകനെ ഉപയോഗിച്ച്‌ വ്യാജ പരാതി നല്‍കിയതെന്ന്​ ഹരജിയില്‍ ആരോപിക്കുന്നു. ഹരജി വീണ്ടും ചൊവ്വാഴ്​ച പരിഗണിക്കും.